Skip to content

Skip to table of contents

Va tu Tanga mu ku Yoya Miaka Yose

Va tu Tanga mu ku Yoya Miaka Yose

IYA HA kati ketu ka lemene ku yoya muono ua laha kaha ua ndzolela? Na umo uahi. Aci singaniekenu honi nga tua hasele ku yoya miaka yose, na cihindu ca ku tantuluka kaha mu ndzolela! Mua vusunga, nga tue ku sikama miaka ya yingi na vaze va tua lema, ku enda mangendzi mu ku tantekeya mavu ose, ku lilongesa vutongue vua ku liseza-seza, na ku lilongesa na civando viose vi tua tonda. Oyo ndzolela yaco nga havueni, ni vati?

Kulihi honi vantu va tundisa cizango ca ku yoya miaka yose? Mbimbiliya nguayo cizango caco Njambi ikeye ua tu hakaco mu mitima! (Ekelesiaste 3:11) Kaha naua Mbimbiliya nguayo “Njambi ikeye cilemo.” (1 Yoano 4:8) Halumo evi vihasa ku tu lingisa ku lihula nguetu ‘Nga Njambi ikeye cilemo, nkuma a hasa ku tu tanga na cizango ca ku yoya miaka yose, vunoni ka tu hana vuhasi vua ku ci puisamo ni?’

Na umo uahi ua lema ku-tsa. Ngeci Mbimbiliya ya ci tumbula nguayo “citozi.” Kaha ka tua lemene citozi uaco a tu suene. (1 Kolintu 15:26) Kuli vamo, ce ku livanga ku iza, kuli vakuavo ce ku kotokela. Vunoni tu zange ka tua zangele ce ku iza vene. Vamo ka va lemene ku singanieka ha ku-tsa muomu ve ku ivua liova. Vuno ou citozi tangua tu ka hasa ku mu vula ni? Kaha citava vene ku mu vula ni?

VUKALEHO VUA TU HANA LULAVELELO

Halumo ci hasa ku mi komouesa ku tantekeya ngecize ku-tsa ka ca kele mu vutumbe vua Njambi mua tu tangele. Mu Mbimbiliya, ku livulu lia Njenisisi, tu uanako vukaleho vua muesa ngecize Njambi ua tondele vantu va pue na ku yoya miaka yose ha mavu. Ca ku muenako, Yehova Njambi ua tangele mavu na ku hakaho viose via tondekeleho linga vantu va hase ku yoyelaho mu ndzolela. Kaha ua tangele yala ua katete, Andama, na ku mu haka mu citungu ca Endene. Mu nima yevi, “Njambi ua muene viose via na pangele, kaha talenu, via viukile cikuma.”—Njenisisi 1:26, 31.

Njambi ua tangele Andama mu cifua ceni kaha naua mu vutantuluke. (Ndeutelonomi 32:4) Eva, mpuevo ya Andama, neni ua puile ua ku tantuluka ka kele na cipenga na cimo cahi. Kaha Yehova ua va vezikisile ngueni: “Semenu, na ku lilanesa, kaha sulisenu  mavu naua, na ku a ononuesa; kaha sikenu vantsi va mu mema a kalunga, na tuzila va mu melu, na viuma viose via muono vi enda hano ha mavu.”—Njenisisi 1:28.

Ku sulisa mavu na vana vavo, ce ku ambatele ntsimbu ya kama. Eva ue ku semene vana, kaha ovo vana veni navo ve ku semene vana, ngoco lika noho mavu ose eku sulile na vantu kuliya na vutumbe vua Njambi. (Isaya 45:18) Ngeci mukemuo, tu hasa ku lihula nguetu, ‘Vuno Yehova nga ua hanene vaAndama na Eva civezikiso ca ku sema na ku sulisa mavu, oku na tantekeya ngueni va ka yoya lika miaka ya yindende ni? Va ka mona lika vana na vatekulu kunahu, ku sula ca mavu ka va ka ci mono ni?’

Aci singaniekenu naua ha cipanga ca ku ononuesa tusitu ca va hanene. Andama ua tambuile cipanga ca ku luka tusitu mazina, kaha eci ce ku ambatele ntsimbu. (Njenisisi 2:19) Cikuavo naua, ku vononuesa ce ku tondekele ku lilongesa vilinga via tusitu vaco linga a tantekeye vati a hasa ku va niunga. Kaha eci ce ku ambatele ntsimbu ku hiana na ntsimbu ya ku va luka mazina.

Ku tsiha mpanga, civezikiso ca ku sulisa mavu na ku ononuesa tusitu ca hanene Njambi kuli va Andama na Eva, ca muesa ngecize ua va tangele va yoye miaka ya yingi. Kaha cili vene, Andama ua yoyele miaka ya yingi.

NJAMBI UA TONDA VANTU VA YOYE MIAKA YOSE MU CITUNGU HA MAVU

VA YOYELE MIAKA YA YINGI CIKUMA

Andama, miaka 930

Metusela, miaka 969

Noa, miaka 950

Lelo lino, miaka 70-80

Mbimbiliya ya muesa ngecize vantu laza va yoyele miaka ya yingi ku hiana lelo. Nguayo: “Kaha matangua ose a a yoyele Andama a puile vihita vitanu na viuana via miaka na makumi atatu” 930. Kaha ya tumbula naua vantu 6 va yoyele miaka i tuvakana 900! Mazina avo Sete, Enose, Kenane, Yalende, Metusela na Noa. Vose va yoyele tele Livazi lia ku matangua a Noa kanda liize, kaha Noa ua yoyele naua miaka 350 mu nima ya Livazi. (Njenisisi 5:5-27; 7:6; 9:29) Vati honi va hasele ku yoya miaka ya yingi ngoco?

Muomu vose va kele ku hiehi na ku tantuluka, ni nguetu va semukile tele kanda mu hite ntsimbu ya kama tunde ha ku vulumuna ca va Andama na Eva. Citava ovu vukevuo vusunga vua kama vua va lingisile ku yoya miaka ya yingi. Vati honi ku tantuluka ca likuata na ku yoya miaka ya yingi? Kaha vati ku-tsa va ka ci vula? Linga tu uane vikumbululo, ha katete tua pande ku tantekeya vika tue ku kulupila na ku-tsa.