Skip to content

Skip to table of contents

Vati mu Hasa ku Yoya Muono ua ku Hiana ou ua Lelo?

Vati mu Hasa ku Yoya Muono ua ku Hiana ou ua Lelo?

LELO LINO muono ka ua puile naua ngue mua tondele Njambi tunde ha katete. Ha mavu tele nga ha kala vantu ve ku singimika Sakatanga uavo, ve ku tava ku tuamenena ceni na ku tambuluisa cilemo ceni na vifua vieni vikuavo. Tele nga ve ku likuatasanene umo na mukuavo mu ku lela masoko avo, mu ku lilongesa viuma via viha, na mu ku puisa mavu ose citungu.

NJAMBI UA KULAHESA KU ALULULA ANO MAVU LINGA A FUE NGUE MUA TONDELE IKEYE

  • “A lingisa zindzita ku likela na haze ha lenga mavu.”​Visamo 46:9.

  • Ikeza “ntsimbu ya . . . ku enieka vaze venieka mavu.”​Ku-Solola 11:18.

  • “Mundambo ka li ka handeka ngueni, Nji ku vavala.”​Isaya 33:24.

  • “Vaze va nji na hangula va ka viukilila vipanga via mavoko avo ntsimbu ya kama.”​Isaya 65:22.

Vati ovu vupolofeto vu ka lipuisamo? Njambi ua hangula Muaneni, Yesu, ku pua Muangana ua nguvulu ya ku tantuluka ize i ka sika mavu ku tundilila muilu. Mbimbiliya ya luka nguvulu yaco nguayo Vuangana vua Njambi. “Kaha ku matangua a vamiangana vaze Njambi ua muilu a ka tumbika vuangana vumosi vuntsa ka va kenieka ku miaka yose ya ya-ye, cipue mpoko yavuo ka va ka i eca ku vantu veka; vunoni vukevuo vu ka vatuola na ku lia mavuangana aa ose, kaha vu ka mana ku miaka yose ya ya-ye.” (Ndaniele 2:44) Mbimbiliya ya handeka via Yesu nguayo: “Njambi a ka mu hia citumamo ca vuangana . . . , na vuangana vueni ka vu ka hua.”—Luka 1:32, 33.

Mua kele ha mavu, Yesu ua lingile vikomoueso via kama mu ku muesa ngecize mua ka pua Muangana a ka viukisa muono ua vantu ku hiana nou u tuli nauo lelo.

YESU UA MUESELE VIUMA VIA CILI VIA KA LINGILA VANTU VA KU ONONOKA

  • Ua kanguisile mavezi a vifua viose, mu ku muesa vati a ka manusula mavezi ose ha kati ka vantu.Mateo 9:35.

  • Ua holuesele cisali, mu ku muesa vati a ka niunga vantu mu ku lembamesa ngolo ya viyovo.Mako 4:36-39.

  • Ua lisile makulukazi, mu ku muesa ngecize a ka hasa ku suka vantu.—Mako 6:41-44.

  • Ua himpuisile mema ku pua viniu, mu ku muesa ngecize a ka kuasa vantu ku yoya mu ndzolela.Yoano 2:7-11.

Vati mu hasa ku kala na muono u ali na ku viukisa Njambi mu ku hana kuli vaze va lema? Kuli imo “njila” i mua pande ku endela. Mbimbiliya ya i luka lizina nguayo “njila ya lisuata, ya ya ku muono, kaha va vandende lika va i uana.”—Mateo 7:14.

MUA KU UANENA NJILA I TUALA KU MUONO

Njila ika ya tuala ku muono? Njambi ngueni: “Ange nji Yehova Njambi yove, Uze a ku longesa  vize vi silivila, Uze a ku tuamena mu njila ize ya ku pande.” (Isaya 48:17) Ku endela mu njila eyi cikeco ku yoya muono ua hiana yose.

Yesu ua handekele ngueni: “Yange njila, na vusunga, na muono.” (Yoano 14:6) Tu hasa ku suena kuli Njambi na ku yoya muono ua cili, mu ku tsiliela vilongesa via Yesu na ku kava lungano lueni.

Vati mu hasa ku uana njila i tuala ku muono? Kua kala malombelo a engi vunoni Yesu, ua mamuine ngueni: “Kati uose a handeka nange, ngueni, Muangana, Muangana, a kengila mu vuangana vua muilu, cahi; ku vanga uze ue ku linga cizango ca Tata u li muilu.” (Mateo 7:21) Ua handekele naua ngueni: “Ku mihako yavo mu ka va tantekeya.” (Mateo 7:16) Mbimbiliya i hasa ku mi kuasa ku nongonona vulombelo vua vusunga na ku vu tepesa ku malombelo a makuli.—Yoano 17:17.

Vati mu hasa ku endela mu njila i tuala ku muono? Ku endela mu njila i tuala ku muono ca lomboloka ku lilongesa via Uze ua hana muono ku viuma viose. Ku lilongesa vikumbululo via vihula ngeci mua: Ikeye iya? Lizina lieni iya? Vati vua fua vuntu vueni? Vika ali na ku tu lingila? Kaha ua tonda tu linge vika? *

Njambi ka tondele lika vantu va pue na ku panga, ku lia, ku heha, na ku kala na vusoko houe. Ua tonda naua tu mu tantekeye na ku mu puisa kavusamba ketu. Tu hasa ku muesa ngecize tua mu lema mu ku linga cizango ceni. Yesu ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”—Yoano 17:3.

NJAMBI UE KU MI “LONGESA VIZE VI SILIVILA” KU HITILA MU MBIMBILIYA.​—ISAYA 48:17

HANENU CINANGA CA KATETE MU VUNGENDZI VUACO

Ku lilongesa ku linga vize viaya Njambi umo lika ua vusunga ku mutima ca tondeka ku alulula vimo viuma mu muono. Ku linga evi, ci hasa ku soloka ngue ca cikalu cikuma. Vunoni houe, ku lingamo ca pua ku enda vungendzi vua ndzolela, ngue nkala vungendzi vene. Mu ku mi kuasa ku uana vikumbululo via vihula ku tuala hali Njambi, etu Vakaleho va Yehova tue ku hana vilongesa via Mbimbiliya via vuana ha ntsimbu na cihela vi mu hangula enu vavene. Mu hasa ku handeka netu ku hitila mu saiti www.jw.org.

^ cin. 20 Talenu mu Vutala vua Kaniungi, No. 1 2019.