Skip to content

Skip to table of contents

Enu Vamala mua Ambata Yoyenu Vuino na Vampuevo Venu

Enu Vamala mua Ambata Yoyenu Vuino na Vampuevo Venu

VATI yala na pande ku niunga mpueyeni? Vantu va vengi va tsiliela nguavo, cuma ca katete ca pande ku linga yala ha ndzivo ca pua ku neha vimbongo via vingi ha ndzivo. Vunoni, cingi ca vampuevo va somboka ku vamala va kala na vimbongo via vingi, ka va kele na ciyulo mu visinganieka kaha ve ku ivua vuoma. Ca ku muenako, umo mpuevo ua ku somboka ku Espanha ua lizina Rosa ua handekele via yalieni ngueni, “Ku vantu veka ua kele na ku soloka ngue muntu ua cili, vunoni ha ndzivo ka puile yala ua ngozi.” Va Joy, va ku Nigeria, navo naua nguavo, “Mu tua honene ku litavasiana ha vimo na yaliange ua kele na ku nji leka ngueni, ‘Ove ua pande ku linga viose vi nji ku leka muomu yange nja ku ambata.’”

Vati yala a hasa ku niunga vuino mpueyeni na cilemo? Vika na pande ku linga yala linga ha ndzivo ha pue cihela ca “ku huima,” ku mpueyeni?—Lute 1:9.

VI YA HANDEKA MBIMBILIYA KU TUALA HA MPOKO YA YALA UA AMBATA

Vutuhu yala na mpuevo va pua hamo lika ku meso Njambi, Mbimbiliya nguayo nkala muntu ali na kapandi keni ha ndzivo. Loma 7:2 nguayo, mpuevo ua ku somboka na pande ku singimika “mezi a lisiko a yala.” Ngue mu ca fua ku nkala cikota, ve ku hangula muntu umo linga a tuamenene viuma, Njambi neni ua hangula yala ua ambata ku pua mutue ua mpueyeni. (1 Kolintu 11:3) Vamala vakevo va pande ku tuamenena viuma ha vindzivo.

Vamala va ambata vati mu hasa ku pangesa vuino mpoko ya mi hana Njambi? Mbimbiliya nguayo, “Lemenu vampuevo venu, ngue Kilistu naua mua na leme mbunga yeni.” (Efeso 5:25) Vutuhu Yesu Kilistu ka ambatele, lungano lueni lu hasa ku mi kuasa ku pua yala ua cili. Tu ci talenu vati mu hasa ku lingamo.

MUONO UA YESU UA PUA LUNGANO LUA KU TANTULUKA KU VAMALA VA AMBATA

Yesu ua kaniamesele vakuavo na ku va kuasa. Yesu ua laniene vose va kele na ku ivua ku lemuua omo lia visoti viavo ngueni: “Tuayenu kuli ange, . . .kaha nji ka mi huimisa.” (Mateo 11:28, 29) Ua va tepuluile ku visoti viavo na ku va longesa via Yehova. Ngeci mukemuo vavengi va livuile ku zituka kuli Yesu, muomu va kele na vusunga ngecize a kehuisa mukambo uavo!

 Vati vamala va ambata va hasa ku temunuina Yesu. Tondenu vinjila via ku kuaselamo mpueyenu. Vampuevo vamo ve ku ivua ngeci mua Rosa ua liniengele ngueni: “Yaliange ua nji tengele ngue nji ngamba yeni ua mpuevo.” Vunoni umo yala ua lizina Kweku, ua kala mu vulo vua cili ngueni: “Nje ku hula mpueyange nga a tonda nji mu kuase. Muomu nja mu lema, kaha nja kala na cizango ca ku mu kuasa ku viuma vi tondeka.”

Yesu ua muesele kasingimiko na cikeketima. Kua kele umo mpuevo ua cihutu, ua vavalele vuvezi vua ku pihia cikuma miaka 12. Omo ua vuile vikomoueso via kele na ku linga Yesu, “ua handekele ngueni: ‘Nga nji saleka livoko lika ku vuzalo vueni, nji ka kanguka.’” Cili ua handekele. Ua suenene kuli Yesu, kaha ua ka kuatele ku mukunduilo, ua vuzalo vueni, kaha ua kangukile haze vene. Vutuhu kuli vamo va mu muene va singaniekele nguavo ou mpuevo uaco ua lingile mua ku pihia, Yesu ua muene ngecize uze mpuevo ua kele na ku yanda. * Na ngozi ua mu lekele ngueni: “Muanange ku-tsiliela cove ci na ku kanguisa.” Yesu ka vi lingilile mu ku mu sahuisa ni ku mu tenukila, vunoni ua tantekeyele vuvezi vueni.—Ua muesele ku pua yala ua nkeke.​—Mako 5:25-34.

 Vati vamala va ambata va hasa ku temunuina Yesu. Nga mpueyenu ka hindukile, mu talenu na ngozi na lukakatela. Setekenu ku mona viuma ngue mu ali na ku vi muenamo ikeye. Ca ku muenako va Ricardo nguavo, “Mu nje ku tantekeya ngecize mpueyange, ali na ku niengua vuasi, nje ku hangula vuino mezi ange, linga kati nji handeke viuma vi mu nienguesa cikuma.”

Yesu ua kele na ku handeka na vandongesi veni. Yesu ua kele na ntsimbu ya ku handeka na vandongesi veni. Ua va lekele ngueni: “Muomu viose vi nji nevu kuli Tata, nji na mi zimbuilavio.” (Yoano 15:15) Tua tantekeya nguetu ntsimbu imo Yesu ua tondele ku kala lika lieni na ku vundila. Vunoni ua kele na ku leka vandongesi veni via kele na ku ivua. Ku vutsiki vua hatele ku litangua li va mu sompesele na ku mu tsiha ngue muhuza, Yesu ua lekele vandongesi veni ngueni “Mutima uange u li na ku vavala cikumakuma.” (Mateo 26:38) Cipue omo vilinga viavo ka via mu ile ku mutima, Yesu ka likelele ku handeka na vavusamba veni.—Mateo 26:40, 41.

Ku hilula vuino ha lungano lua Yesu ci hasa ku kuasa yala ku pua cisemi ua cili na mutue ua ndzivo

Vati vamala va ambata va hasa ku temuinina Yesu. Lekenu mpueyenu visinganieka vienu na vika mu li na ku ivua. Halumo mpuevo a hasa ku linienga ngueni yaliange ka kele na citanga ca ku handeka ha mbunga vunoni ku ndzivo ke ku simutuila. Umo mpuevo ua lizina Ana omo yalieni ua kele na ku simutuila neni, ua handekele ngueni, “Nje ku mona nguange ua nji lema, kaha nje ku livua ku zituka kuli ikeye.”

Kati mu yandese mpueyenu mu ku viana ku simutuila neni. Umo mpuevo ngueni, “Yaliange nga na niengua nange, ka kele na ku handeka nange, ua kele na ku nji lingisa ku li vua mulonga na vungoco.” Edwin co ngueni, ue ku seteka ku tambuluisa lungano lua Yesu. “Mu nje ku niengua na mpueyange, ka nje ku mu kumbulula oho vene, vunoni nje ku tonda ntsimbu ya cili ya ku simutuila ha viuma viaco.”

Va Joy, va tu na tumbula ku vuputukilo vua cimpande cino, va mono ku aluluka ca yaliavo tunde ha putukila ku lilongesa Mbimbiliya na Vakaleho va Yehova. Va Joy nguavo, “Na aluluka cikuma, kaha ali na ku likolesa ku pua yala ua cilemo mu ku tambuluisa lungano lua Yesu.” Makulukazi na makulukazi a vantu va liambata navo ve ku tambula vukuasi ku vilongesa via mu Mbimbiliya. Nenu mu tonda ku lilongesa ni? Mu hasa ku handeka na nkala Mukaleho ua Yehova a lilongese nenu Mbimbiliya..

^ cin. 10 Kuli ya na Lisiko lia Mosesa, vuvezi vua kele navuo mpuevo vua mu puisile ua ku zuala, kaha nkala muntu ua mu kuatele neni ua puile ua ku zuala.​—Levitiku 15:19, 25.