Skip to content

Skip to table of contents

 CIMPANDE CA HELU | VUNO VIA LINGILE MPUNDU NI?

Vika Yesu ua Yandelele na ku Tsa?

Vika Yesu ua Yandelele na ku Tsa?

“Hali yala umo lika, [Andama] vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose muomu va na lingi vupi.”—Loma 5:12

Vati mu kumbulula nga va mi hula, “Mu tonda ku yoya miaka yose ni?” Cingi ca vantu va hasa ku kumbulula nguavo va tonda, vunoni ve ku singanieka nguavo ka citava ku vi tsiliela. Muomu nguavo ku tsa ca kala ha vantu, fumeko.

Vati co nga va mi hula ngecize, “Tangua lika mu tonda ku tsa?” Cingi ca vantu nga vali vuino ve ku kumbulula nguavo ka va tondo ku tsa. Omo lia vika? Muomu tu vose tua kala na cizango ca ku yoya, vutuhu tue ku hita mu visoti via kama. Mbimbiliya nguayo Njambi ua tangele muntu na cizango ca ku tonda ku yoya. Ya handeka mpundu nguayo, “Na hake ntsimbu ka ye ku hua mu mitima yavo.”—Ekelesiaste 3:11.

Vunoni vusunga kasi vumo, vantu ka vesi na ku yoya miaka yose. Vika via lingikile? Vuno Njambi ua lingako mumo linga a alulule viuma ni? Mbimbiliya ya kala na vikumbululo vi simpisa mutima, kaha vi hasa ku tu kuasa ku ivuisisa vika ua yandelele Yesu na ku tsa.

VIKA VIA LINGIKILE

Ku tupitulu tutatu tua katete tua ku mukanda ua Njenisisi, ku li muzimbu ua muesa ngecize Njambi ua kulahesele va yala na mpuevo va katete, Andama na Eva muono ka ue ku hua, kaha ua va lekele naua vi va pande ku linga va u tambule. Kaha muzimbu uaco u lekesa vati va honene ku singimika Njambi ngeci na lulavelelo luaco lua huile. Ou muzimbu uaco ua pua ua uasi cikuma ku uivuisisa—ngeci vamo ve ku u sembulula nguavo ua pua cisimo ca ngoco. Vunoni mukanda ua Njenisisi ua pua ua vusunga vene ngeci mua mikanda ya handeka via muzimbu ua Yesu. *

Vika viezamo omo Andama ua muesele lisino? Mbimbiliya ya kumbulula nguayo: “Ngoco vene ngue hali yala umo lika, [Andama] vupi vua kovelele hano ha mavu, na ku-tsa ha vupi; kaha ngecize ku-tsa ci na hete ku vantu vose muomu vose va na lingi vupi.” (Loma 5:12) Andama ua lingile vupi, mu ku muesa lisino kuli Njambi. Ngeci ka lavelele ku ka yoya miaka yose kaha ua tsile. Netu mu ku linga tua pua vana veni tua suana vupi vueni. Ngeci tue ku vavala, ku kulupa, na ku tsa. Ovu vusunga vua  lombolola vika tue ku tsila, vua litombola na vilongesa via vakua siensia ku tuala ha vati vana ve ku suana vimo vifua ku visemi. Vuno Njambi ua lingako mumo linga alulule viuma ni?

VIA NA LINGI NJAMBI

Mua vusunga, Njambi ua viukisila viuma linga a hiluise ni ku landa lueka, via zimbalesa Andama ku vana veni, lulavelelo lua ku yoya miaka yose. Vati Njambi ua vi puisilemo?

Mbimbiliya ku Loma 6:23 nguayo, “Muomu fueto ya vupi, ku-tsa.” Eci ca lomboloka ngecize ku tsa ceza omo vupi. Andama ua lingile vupi, ngeci ua tsile. Na vuno vene, etu tu vakua ku vulumuna ngeci tue ku tambula fueto ya vupi ku tsa. Vunoni kati omo lia mulonga uetu houe, muomu tua semukila mu vupi. Kaha Njambi ku cilemo ceni, ua tumine Muaneni, Yesu, a ku tambule ‘fueto ya vupi’ vuetu. Vati viendele?

Ku tsa ca Yesu ca sokolola njila i tuala ku muono ka ue ku hua

Omo vupi na ku tsa vieza ku hitila mu lisino lia muesele Andama yala umo ua ku tantuluka, kua tondekele yala ueka ua ku tantuluka ua ku ononoka na ha ku tsa linga a ku tu patule ku fueto ya vupi. Mbimbiliya nguayo: “Ngue ha lisino lia muntu uze umo lika, vaze va vengi va na pu vakua vupi, ngecize naua ha ku ononoka ca uze ueka umo lika, vaze va vengi va ka pua vakua vuviuke.” (Loma 5:19) “Uze ueka umo lika” ua pua Yesu. Ua tundile muilu, na kua ku pua muntu ua ku tantuluka *, kaha ua tu tsila. Eci ci na asiuisa linga tu uane kavumbi ku meso a Njambi na ku kala na lulavelelo lua muono ka ue ku hua.

VIKA YESU UA YANDELELE NA KU TSA

Omo lia vika, ca tondekele Yesu ku tsa mu ku puisamo evi? Vuno Njambi kati Mukua Ngolo Yose? Vika kecelele lika vana va Andama va semuke na ku yoya miaka yose? Tua tantekeya nguetu ali na mpoko ya ku lingamo. Vunoni nga ua lingilemo, nga ua sembuluile lisiko lieni lia muesa ngecize fueto ya vupi ku tsa. Eli lisiko liaco ka lia puile lia sembulule. Lisiko liaco lia solola vuoloke vua vusunga.​—Visamo 37:28.

Nga Njambi ua hakele vuoloke ku mukulo ha ntsimbu yaco, vantu lelo nga ve ku lihula nga tangua  a ka lingamo naua ntsimbu imo. Ca ku muenako, vuno nga ca pua ca cili Njambi ku hangula vamo ha kati ka vana va Andama linga va ka tambule muono ni? Vuno nga citava ku tsiliela mu vikulaheso vieni ni? Kapandi ka lihakela ka ku tonda ku tu ovola mu njila ya vuoloke, ka muesa ngecize Njambi ue ku linga vuoloke ntsimbu yose.

Ku hitila mu cikombelo ca Yesu, Njambi ua sokolola njila linga tu kale na lulavelelo lua ku ka yoya muono ka ue ku hua mu Palandaizi ha mavu. Aci talenu mezi a handekele Yesu a li ku mukanda ua Yoano 3:16: “Muomu Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.” Ku tsa ca Yesu ka ca soluele lika vuoloke vua Yehova, vunoni ca seho ya kama, ca pua cilemo ceni ca kama ku vantu.

Cipue ngoco, vika Yesu ua yandelele na ku tsa mua ku pihia ngue mu va vi soneka ku mikanda ya handeka via muono ueni? Yesu ua hitile mu vieseko via kama vunoni uononokele, ku likolesa ceni ca soluele ngecize vantu va hasa ku tualelelaho ku ononoka Njambi cipue nga va hita mu vieseko via Ndiavu. (Yombi 2:4, 5) Ovu vusunga vuaco tele ku vua keleko fume ha hungumuine Satana Andama ua ku tantuluka ku linga vupi. Vunoni Yesu neni ua puile ua ku tantuluka ngeci mua Andama, kaha uononokele na ku ku tsa, cipue mua hitile mu vieseko. (1 Kolintu 15:45) Eci ca muesele ngecize Andama neni citava nga uononokele Njambi nga ua hanguile ku lingamo. Yesu ua tu sila lungano lua ku kolesa nga tu hita mu vieseko.—1 Petulu 2:21.

KU VEZIKA CI MU HASA KU UANAHO

Ku tsa ca Yesu ca lingikile mpundu. Njila ya muono ka ue ku hua ya sokoloka. Mu tonda ku yoya miaka yose ni? Yesu ua tu lekele vi tua pande ku linga mua handekele ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”—Yoano 17:3.

Vakaleho va Yehova va na mi lania mu lilongese via vingi ku tuala hali Yehova, Njambi ua vusunga, na Muaneni Yesu Kilistu. Vakaleho va Yehova va muimbo lienu va ka viukilila ku mi kuasa. Mu hasa naua ku lilongesa via vingi nga mu kovela mu site www.jw.org.

^ cin. 8 Talenu O Caráter Histórico de Gênesis, (The Historical Character of Genesis,”) mu livulu Insight on the Scriptures, page 922 ni nguetu Estudo Persicaz volume 2 pagina 204, li va tuhula Vakaleho va Yehova.

^ cin. 13 Njambi ua nunguluile muono ua Muaneni ku tunda muilu na ku u haka muzimo lia Maliya, kaha sipilitu santu ya Njambi ya niungile Yesu linga kati a suane vupi kuli Maliya.—Luka 1:31, 35.