Skip to content

Skip to table of contents

Vusunga ku Tuala ha Viuma vi ka Soloka ku Lutue

Vusunga ku Tuala ha Viuma vi ka Soloka ku Lutue

Mua lihulaho laza vika vi ka soloka ku lutue ni? Mbimbiliya ya muesa ngecize ku lutue ku ka soloka vimo vi ka kuata ku miono ya vantu vose ha mavu.

Yesu ua lomboluele vati tu ka tantekeya “ngecize Vuangana vua Njambi vu li mu hiehi.” (Luka 21:31) Ua polofetele ngueni ku ka soloka viuma via vingi, ngeci mua vindzita via kama, mandunduma, vindzala na mavezi a ku litambuisa. Evi vikevio mpundu vi tue ku mona matangua ano.—Luka 21:10-17.

Mbimbiliya ya vuezako naua ngecize ku ‘matangua a ku kotokela’ vantu navo va ka muesa vifua via ku vihia. Mu hasa ku tanda vifua viaco ku 2 Timoteo 3:1-5. Ngeci mukemuo, nga mu mona vantu va muesa vifua viaco ku matangua ano, ce ku mi lingisa ku tava ngecize vi ya polofetele Mbimbiliya vili na ku lipuisamo lelo lino.

Kaha evi via lomboloka vika? Via lomboloka ngecize vuovuno Vuangana vua Njambi vu ka alulula ano mavu na ku a puisa cihela ca cili ca ku yoyela. (Luka 21:36) Mu Mbimbiliya, mua kala vi kulaheso via cili ku tuala ha viuma via ka linga Njambi ha mavu na ku vantu va ka yoyelaho. Tu talenu vimo vimueso.

VUANGANA VUA CILI

“Kaha kuli ikeye [Yesu] va hanene vusuana, na vumpahu, na vuangana, Mangana vose vantu, na miyati na malimi Va mu pangele: Vusuana vueni vukevuo vusuana vua ku miaka yose ya ya-ye, Ka vu ka fumako, Na vuangana vueni Ka vu ka nonga.”​NDANIELE 7:14.

Eci ca lomboloka ngecize: Mu ka hasa ku yoya muono ua ku tovala muintsi lia Vuangana vua Njambi vu ka sika mavu ose, kaha Yesu ua pua muangana ua vuangana vuaco.

 CIHINDU CA CILI

“Kaha mundambo ka li ka handeka ngueni, Nji ku vavala.”​ISAYA 33:24.

Eci ca lomboloka ngecize: Na limo litangua liahi mu ka vavala, mu ka kala na cihindu ca cili kaha na umo uahi a katsa naua.

CIYULO CA KU TANTULUKA

“A lingisa zindzita ku likela na ha haze ha lenga mavu.”​VISAMO 46:9.

Eci ca lomboloka ngecize: Ka ku ka kala ku zuzuisa ca vindzita ni vene visoti vi ye ku koka.

MAVU A KA SULA NA VANTU VA CILI

“Mukua vupi ka li ka kalako . . . Vunoni vakua ku konkama va ka suana cifuti.”​VISAMO 37:10, 11.

Eci ca lomboloka ngecize: Ka ku ka kala vantu va vapi, vunoni ku ka kala lika vaze ve ku ononoka Njambi.

MAVU OSE A KA PUA CITUNGU

“Kaha va ka tunga zindzivo, na ku kalamo; kaha va ka tombeka vitungu via viniu na ku lia vusuka vuavio.”​ISAYA 65:21, 22.

Eci ca lomboloka ngecize: Mavu ose a ka pua a cili. Muomu Njambi a ka kumbulula vivundilo vietu kaha cizango ceni va ka ci linga hano “ha mavu.”​—Mateo 6:10.