Skip to content

Skip to table of contents

1 Vukuasi mu ku Manusula Visoti

1 Vukuasi mu ku Manusula Visoti

Mbimbiliya ya handeka nguayo vimamuna viayo Njambi ua vi huiminamo, kaha “vi silivila ku longesa, ku handekela, ku sungamesa, ku longesa vize via vuviuke.” (2 Timoteo 3:16) Cili oco ni? Tu ci hilulenu ha vati mana a mu Mbimbiliya a kuasa vantu va vengi ku lihenga ni ku viana vimo via visoti via vikalu cikuma ntsimbu kanda vi ci va tengule.

KU NUA CIKUMA VUALA

Delphine u tu na tumbuile mu cimpande ca ku nima, ua vuile ngecize vitanga vieni via kele na ku mu lingisa ku nua cikuma vuala. Mbimbiliya ka ya vindikile ku nua vuala mu ku puisamo, vunoni nguayo: “Kati u kale ha kati ka vakua ku nua viniu.” (Visimo 23:20) Ku penda ce ku koka mavezi, ku tsiha malo na ku sondolola vavusamba, kaha na ku koka vimponde via vingi vie ku soloka muaka ku muaka. Cingi cevi visoti nga ka vie ku soloka, nga vantu va niungile vimamuna via mana via mu Mbimbiliya.

Mukemuo mua lingile Delphine. Vuovuno ngueni: “Nja muene honi ngecize vuala ka vuesi na ku manusula visoti viange. Ngeci nja kavele cimamuna ci li ku mukanda ua Filipu 4:6, 7, uze ua handeka nguauo: ‘Na vimo viahi u umina mutima; vunoni. . . tumbula vizango viove kuli Njambi.’ Nkala vutsiki vu nja kele na ku singanieka cikuma na ku uma cikuma mutima, nja kele na ku lambelela Yehova. Kaha nja kele na ku mu leka viose vi nja kele na ku ivua, ngeci mua matoto, ku vavala ku mutima, na vuzeye, kaha nja mu vundilile a nji kuase ku uana vinjila via cili via ku muenamo viuma. Kaha nkala cimene, nja kele na ku linga cose mu ku litundisa visinganieka viaco. Ku li izilisa ku vundila kuli Njambi ca nji kuasele ku tuala mana ku vize vi nja kele navio kati ku vize ka nja kele navio. Kaha nja hanguile ku likela ku nua vuala. Muomu nja uana ciyulo ca seho ya kama, ka nje ku tonda ku ci zimbalesa.”

VUPANGALA

Vupangala vua pua vumo vua vitanga vie ku neha lamba na ku vavala ca kama cikuma ku mitima ya vantu. Vunoni vitume via Mbimbiliya vi hasa ku tu kuasa ku viana ni ku lihenga ku vupi vuaco, mu ku tu kuasa ku tina ku viuma vie ku  koka vupangala—ngeci mua ku handeka ni ku linga viuma vi katula masungu a mukua vilio vieka, na ku tala via vuntselentsele. Umo mukuendze ua lizina Samuele ua handekele ngueni: “Ca puile ca casi ku uila mu ngandzo ya ku handeka ni ku linga viuma vie ku katula masungu. Ca ku muenako, vintsimbu vimo, halumo umo muana mpuevo ka nji ile ku mutima, vunoni nja kele na ku mona ngecize ikeye ua nji lema—eci ca nji lingisile ku nji lingisa nji hehe neni mu cifua ce ku katula masungu.” Ku sua kumo, Samuele va kele na ku mu vangeya nguavo ue ku linga viuma vie ku katuisa masungu a vakuavo—ambe nga ka lingilemo—ngeci ua putukile honi ku lingamo ku cizango. Vunoni vilinga viaco vize via kele na ku mu sila citakutaku. Ngeci ua handekele ngueni, “Ce ku vindamesa lika, muomu ce ku lingisa muntu ku tuala mana ku vizango vieni lika.”

Kaha Samuele ua kovelele mu saiti jw.org na ku tandamo cimo cimpande ca handeka via vakuendze na vahumbe. Ua singaniekele cikuma ha mezi a ku Visimo 20:11, nguao: “Cipue kanike a lisolola ha vilinga vieni, nga vipanga vieni via lele, kaha nga via ku viuka.” Vukuasi vuka ua uanene ku mezi aa? Ua muene honi ngecize vilinga vieni ka via lelele kaha kati via cili. Hano honi ngueni: “Nja nongonuene naua ngecize mukuendze ni muhumbe uze ue ku handeka ni ku linga viuma vie ku katuola masungu a vakuavo a li na ku lilongesa vifua vi ka mu puisa yala ni mpuevo ua mupi mu vulo. Nja putukile ku singanieka vati mpuevo u nji ka ambata ku lutue a ka livua ku mutima nga a ka nji mona nji handeka ni ku linga viuma vi katula masungu a mpuevo ueka. Vikevio via nji lingisile ku mona honi nguange eci cilinga caco nkuma cili vene ce ku vindamesa lika. Vutuhu ca casi ku handeka ni ku linga viuma vie ku katula masungu, eci ka ca lombolokele ngecize ca pua ca cili ku vi linga.” Samuele ua seza vilinga viaco. Ku vi seza ca mu kuasele naua ku viana vupangala.

Vunoni umo mukuendze ua lizina Antonio ua kele mpundu mu vusonde vua kama vua ku uila mu ngandzo ya vupangala: Ua tengukile ku ku tala via vuntselentsele. Vutuhu tele ua ambata mpuevo uze ya lemene cikuma, kasi ikeye ua kele na ku tala via vuntselentsele ku sua kumo. Vunoni ngueni ku singanieka cikuma ha mezi a ku mukanda ua 1 Petulu 5:8 ca mu kuasele mpundu, nguao: “Vingilenu: citozi cenu, Satana, ngue ndumba ua ku ohia, a li na ku endangana, a lengeya ou ya lia.” Antonio ngueni: “Vikupulo via vantu va li vuntselentsele via kala kuose, via tu zengeleka, kaha evi vikupulo viaco nga u vi tala ka vie ku tunda mu vuongo. Vunoni eci cinimbu ca nji kuasele ku singanieka cikuma ha iya ua pua mpundu ndundzi ya vieseko viaco. Nja pandele ku lilongesa ku tokakanesa vuasi vize vikupulo ku ndundzi yavio Satana. Nja tantekeya honi ngecize Yehova lika a hasa ku nji kuasa ‘ku vingila’ linga nji hase ku luisa vieseko viaco mu visinganieka viange, mu mutima, na mu vulo vuange.” Antonio ua tambuile vukuasi, ngeci ua hasa honi ku seza vilinga viaco via ku pihia. Kaha ku lingamo ca mu kuasa ku tina ku vitanga vikuavo via ku pihia cikumakuma.

Cili vene, mu Mbimbiliya mua kala vimamuna via cili vize vi hasa ku tu kuasa ku viana ni ku lihenga ku visoti via vikalu. Vuno vati co tu linga nga cisoti caco ci na likulisa laza kaha ci na pu ca cikalu ku likelaco? Tu talenu vati Lizi lia Njambi li hasa ku tu kuasa ku manusula visoti viaco.

Vimamuna via mu Mbimbiliya vi hasa ku tu kuasa ku lihenga ku visoti