Skip to content

Skip to table of contents

Mbimbiliya na Muono Uenu ua ku Lutue

Mbimbiliya na Muono Uenu ua ku Lutue

ACI SINGANIEKENU nga mu li na ku enda mu milima ya kama vutsiki. Vutuhu litangua li na lahuka laza, vunoni ka muesi na ku lisosomua muomu mu li na cimo citetekeso ca kama. Kaha omo mu ci tetekesa ha mavu, mu mona vuino viose vi liho. Omo mu ci tetekesa mu njila, mu mona vuino vilimo cipue vize vi li ku laako ku lutue.

Mu vinjila vimo, tu hasa ku handeka nguetu, Mbimbiliya ya pua ngue citetekeso caco. Ngue mu tu na mono ku vimpande vi na hiti, Lizi lia Njambi li hasa ku tu kuasa mu visoti via lelo lino—ngeci mua visoti via tangua na tangua vi ve ku lua navio vantu vose mu mavu ano. Vunoni Mbimbiliya ka ya lengelele lika oho. Muomu ye ku tu tetekela naua mu njila linga tu hase ku mona via ku lutue, na ku endela mu njila i tuala ku ndzolela na ku viukilila via ya-ye. (Visamo 119:105) Vati ye ku lingamo?

Tu ci talenu vinjila vivali vi ye ku tu kuaselamo Mbimbiliya ku kala na lulavelelo lua cili ku lutue: 1 Ye ku kuasa ku uana vutumbe mu muono, kaha 2 ye ku tu longesa mua ku likuatela vusamba vua ya ye na Sakatanga uetu.

1 VUTUMBE VUA MUONO

Mu Mbimbiliya mua kala vimamuna via ku kola vi hasa ku tu kuasa ku lua na visoti vietu, vunoni ka ya lengelele lika oho. Ka ye ku tu mamuna lika ku tuala mana ku visoti vietu, vunoni ye ku tu longesa tu limone etu vavene ngecize tuli ha civunga ca kama. Muomu ku lingamo cikeco lika ci hasa ku lingisa muono uetu ku kala na vutumbe vua vusunga.

Tu ci talenu eci citume ca mu Mbimbiliya: “Ku-hana ca hiana ku tambula mu ku vezika.” (Vilinga 20:35) Mu vuluka tangua lika mua kuasele umo ua tondekele vukuasi ni? Cipue mua lihanene mu ku halakana muntu ua kele na ku mi leka via cimo cisoti ceni ni? Vati mua livuile? Mua vusunga, mua viukililile cikuma ku mona ngecize mu na kuasa umo ua kele mu vukalu vua kama.

Ndzolela i tue ku ivua mu ku muesa vuhuanga ye ku hiana nga tu kuasa vakuetu ca ku hona ku lavelela nguetu navo va ka tu hiluisilako vimo. Umo mukua ku soneka mavulu ngueni: “Vakua ku lihana mu ku kuasa  vakuavo ve ku tambula via vingi cikuma ku hiana na vize vi ve ku hana, ca kama lika nga va lingamo ca ku hona ku lavelela fueto.Kaha, nga tu linga cose mu ku kuasa vakuetu​—cikumakuma vaze ka vesi nomu mua ku tu hiluisila​—cili vene tue ku tambula vilunguiso. Tue ku lihaka ha civunga cimo lika na Njambi, ca vaze ve ku muesa vuhuanga. Muomu tue ku pangela hamo na Sakatanga uetu, uze ue ku mona vukuasi vuaco ngue tu li na ku mu kumuisavuo ikeye. (Visimo 19:17) Ikeye ua haka cikuma seho ku viose vi tue ku linga mu ku kuasa vihutu, kaha ua likuminia ngueni a ka tu lunguisa na muono ua ya ye mu citungu ha mavu​—mua vusunga olu lulavelelo lue ku tu vuisa ndzolela ya kama!​—Visamo 37:29; Luka 14:12-14. *

Ku hiana evi viose, Mbimbiliya ya longesa naua nguayo muono uetu u ka kala lika na vutumbe nga tu lemesa Njambi ua vusunga, Yehova. Lizi lieni lia tu mamuna ku mu sangaziala, ku mu singimika, kaha na ku mu ononoka. (Ekelesiaste 12:13; Ku-Solola 4:11) Nga tu lingamo, tu li na ku puisamo cuma ca ku komouesa: Tuli na ku vuisa Sakatanga uetu ndzolela omo lia vilinga vietu. Neni vene ua tu mamuna ngueni: “Muanange, kuata mangana, na ku zolesa mutima uange.” (Visimo 27:11) Singaniekenuho lika​—mu tue ku linga vihangula via litombola na vitume via mu Mbimbiliya, tue ku zolesa mutima ua Tatetu ua muilu. Omo lia vika? Muomu ikeye ua tu haka seho na ku tu lela kaha ua tonda tu vezike omo lia ku niunga vimamuna vieni. (Isaya 48:17, 18) Mua vusunga, ka kuesi cuma ceka ci hasa ku tu hana vutumbe mu muono, ca hiana ku lemesa Muangana ua melu na mavu na ku yoya mu cifua cize ci ka mu vuisa ndzolela!

2 VUSAMBA NA SAKATANGA UETU

Mbimbiliya ya tu mamuna naua ku likuata vusamba vua cili na Sakatanga uetu, nguayo: “Suenenu kuli Njambi, kaha ikeye a ka suena kuli enu.” (Tiango 4:8) Vintsimbu vimo hamo tue ku komoka nga citava mpundu ku likuata vusamba na Sakatanga mukua ngolo yose. Vunoni Mbimbiliya ya tu muesa ngecize citava muomu nguayo nga tu ‘lengeya Njambi,’ tu ka “mu uana” mpundu muomu “kesi ku laako netu vose.” (Vilinga 17:27) Cimamuna ca mu Mbimbiliya ca ku likuata vusamba na Njambi ca pua ca cili cikuma omo lia viuma vi ka tu solokela ku lutue. Mu njila ika?

Aci singaniekenu ha vusunga ovu: Etu vantu ambe tu linge cose, ku ndzili yetu lika ka tu hasa ku vula citozi cetu ua ku sulumuina​—ku-tsa. (1 Kolintu 15:26) Vunoni, Njambi ua yoya miaka yose. Ke ku tsa na limo litangua liahi, kaha ua tonda vavusamba veni navo va ka yoye miaka yose. Mbimbiliya ya pangesa mezi a andende vunoni a ku tovala, mu ku muesa via tonda Yehova kuli vaze ve ku mu lengeya, nguayo va “yoye ku miaka na miaka ya ya-ye.”​—Visamo 22:26.

Vati mu hasa ku likuata vusamba ka vue ku hua na Njambi? Tualelelenuho ku lilongesa vieni ku hitila mu Lizi lieni, Mbimbiliya. (Yoano 17:3; 2 Timoteo 3:16) Vundilenu vukuasi vueni linga mu ivuisise Mbimbiliya. Ikeyo ya tu mamuna nguayo nga tu ‘vundila mana kuli Njambi’ mu vusunga, ikeye a ka tu hanao. * (Tiango 1:5) Kaha mu ku manusula, lihakelenu kapandi ka ku pangesa vize vi mu lilongesamo, mu ku puisa Lizi lia Njambi “ndeya ku viliato [vienu], na ceke ku njila [yenu]”​—vuovuno na ku miaka yose ya ya-ye.​—Visamo 119:105.

^ cin. 8 Nga mu tonda mizimbu ikuavo ku tuala ha cikulaheso ca Njambi ca muono ua ya ye mu Citungu, talenu kapitulu 3, mu livulu Vika i Hasa ku tu Longesa Mbimbiliya? li va tuhula Vakaleho va Yehova.

^ cin. 13 Vakaleho va Yehova ve ku hana vilongesa via Mbimbiliya via vuana vize vi hasa ku mi kuasa ku vueza ku mana enu a ku ivuisisa Mbimbiliya. Linga mu tantekeye vati vie ku enda vilongesa viaco, tua mi vundila mu tale video Vati ca Fua Cilongesa ca Mbimbiliya? Linga mu uane video yaco kovelenu mu saiti jw.org, niatenu ha lizi Ku-tondesesa, kaha sonekenuho mutue uayo.

Njambi ua yoya miaka yose, kaha ua tonda vavusamba veni navo va ka yoye miaka yose