Skip to content

Skip to table of contents

Ku Mona ku Sevuka mu Njila ya Cili

Ku Mona ku Sevuka mu Njila ya Cili

VaDon na VaMargaret * va viukilile ku tambula munavo na yalieni hamo na vatekulu. Mu ku linga VaMargaret va puile vakua ku teleka tele va cipanga, mu lia hetele litangua lia ku lisalesa, va telekele via-ku-lia vivalema cikuma vatekuliavo vavali. Macarao na musozi ua mazi.

Omo mbunga yose va tumamene ku mesa vaMargaret va nehele ndeho yaco na ku itumbika ha kati. Kaha mu va fukuileko, mua kele lika musozi ua ku seta. VaMargaret va suvile ku hakamo macarao!

Cipue nga tu vakuluntu ni tu vanike, tu vose tue ku sevuka. Tu hasa ku handeka ni ku linga vimo kati vikevio vuino, ni halumo tu hasa ku suva vimo. Omo lia vika tue ku sevuka? Vati tua pande ku muenamo ku sevuka cetu? Tu hasa ku lihenga ku cimo ku sevuka ni? Ku mona ku sevuka mu njila ya cili ci hasa ku tu kuasa.

KU MONA KU SEVUKA NGUE MUE KU CI MUENAMO NJAMBI

Mu tue ku linga viuma via cili, tua lema ku tu sangala na ku limona nguetu tua fuila ku tu handeka vuino. Vuno nga tua sevuka, cipue nga vakuetu ka va ci muene, ka tua pandele ku litavela ku sevuka caco ni? Vunoni ku lingamo ca tondeka ku likehesa.

Nga tue ku limona ngue tu va seho cikuma, tu hasa ku putuka ku sembulula ku sevuka cetu, ku sangulukila vakuetu ni halumo ku viana. Ku muesa vilinga viaco ce ku neha luvinda. Muomu ci hasa ku kaluuisa ku manusuila citanga caco ni tu ka lingisa vakuetu ku yandela viuma ka va lingile. Vutuhu ntsimbu ino tu hasa ku livua vuino mu ku sevunuka milonga, tua pande ku vuluka ngecize tangua tu vose “muntu ku muntu, tu ka liambuluila etu vavene kuli Njambi.”​—Loma 14:12.

Njambi ue ku mona ku sevuka ngue mu ca pande. Mu livulu lia Visamo, Njambi va mu tumbula ku pua “mukua cikeketima na kavumbi,” kaha “Ka li ka handekela ntsimbu yose; Cipue ka li ka niunga vutenu vueni ku miaka yose.” A tantekeya ngecize ka tua tantulukile kaha tua semuka na vuzeye, “A vuluka ngecize etu tu mpumputa.”​—Visamo 103:8, 9, 14.

Ngeci mukemuo, Njambi cisemi cetu ua ngozi, a tonda ngueni yetu vana veni, tu pue na ku mona ku sevuka ngue mue ku ci muenamo ikeye. (Visamo 130:3) Mu Lizi lieni mua kala vimamuna via cilemo vi hasa ku tu kuasa ku pinda na ku sevuka cetu na ca vakuetu.

VI TUA PANDE KU LINGA KU TUALA HA VIPENGA VIETU

Muntu nga na sevuka ue ku setesa vuongo a tuike vakuavo mulonga ni ku seteka ku lihakuila via na lingi ni via na handeka. Vunoni nga mezi eni ana luvalesa muntu, ca cili ku lomba ku konekela mu sungamese viuma linga vusamba vuenu vu tualeleho. Nenu mua lingaho laza vimo via nienguesele vakuenu ni halumo via mi vuisile ku  pihia ni? Mu cihela ca ku lipaya ni ku vangeya vakueni, vika ka mu lihakela kapandi ka ku sungamesa viuma? Ku seteka ku limuesa ngue kati yetu tua sevuka ci hasa lika ku tuala vimpande ku laako. Ca cili ku sungamesa viuma kaha na ku lilongesela ha ku sevuka cetu.

Vunoni nga mukuetu na sevuka, ca casi kuli yetu ku muesa ku niengua cetu. Mua vusunga ca pua ca seho ku kava cimamuna ca Yesu Kilistu ua handekele ngueni: “Viuma viose mu hianga vantu va mi lingilevio, mukemuo vene va lingilienuvio enu naua.” (Mateo 7:12) Mu mue ku sevuka cipue mu viuma via vindende, mue ku tonda va mi vuileko ngozi ni va suve ku sevuka caco. Kaha vika ka mu lihakela kapandi ka ku muesa ngozi ku vakuenu nga va sevuka?​—Efeso 4:32.

VIMAMUNA VI HASA KU KUASA KU TEPULULA KU SEVUKA

Imo Dicionaliu nguayo, vantu ve ku sevuka omo lia “ku hona ku ivuisisa vuino, ku hona ku tantekeya vuino, ni ku hona ku tuala mana.” Mua vusunga tu vose vintsimbu vimo, tue ku uila mu vingandzo viaco. Vutuhu ngoco tu hasa ku tepulula ku ku sevuka cetu nga tu kava vimo vimamuna via Mbimbiliya.

Cimamuna ca ku livanga ca ku Visimo 18:13 nguaco: “Uze a kuania [ni a kumbulula] te kanda evua, cikeco vuheve na ntsoni kuli ikeye.” Cili vene, ku halakana vuino ku muzimbu ci ka mi kuasa mu kumbulule vuino, na ku lihenga ku vutenu ni ku handeka vimo kati vikevio. Ku halakana mua cili ce ku ohiela mu ku linga viuma ca ku hona ku ivuisisa vuino​—kaha ce ku tu niunga ku ku sevuka.

Cimamuna ca mu civali nguaco: “Nga ci tava, ngue na cizango cenu cose kalenu na ciyulo na vantu vose.” (Loma 12:18) Lingenu cose mu ku pua vakua ciyulo na ku litavasiana. Omo mu panga na vakuenu, va hakenu seho na ku va singimika kaha puenu na ku va sangala na ku va kaniamesa. Ku lihakela kapandi ka ku muesa evi vifua viaco, ce ku asiuisa ku liecela ku ku sevuka ca mezi na vilinga. Kaha cipue nga ku sevuka caco ca kama ca casi ku ci suva.

Puenu na ku lilongesela ha ku sevuka cenu. Mu cihela ca ku tonda ntsambuelo ya vimo vi mua lingi ni vi mua handeka, vi puisenu vukovelelo vua ku lihakela kapandi ka ku muesa vifua vieni via cili. Mua tonda ku vueza vifua vieni ngeci mua lukakatela, ngozi ni ku lipokuesa? Amba vifua vikuavo co ngeci mua ku konkama, ciyulo, na cilemo? (Ngalata 5:22, 23) Mu ntsimbu yaco, mu ka lilongesa vize ka mua pandele ku linga ntsimbu ikuavo. Kati mu tuale cikuma mana ha cifua ci muli na ku livuilamo. Ku pua ua kuehuka ci hasa ku tepulula mu ku livua mua ku pihia.

KU VEZIKA CA KALA HA KU MONA VIPENGA MU NJILA YA CILI

Ku mona ku sevuka mu njila ya cili ci ka tu kuasa ku lua naco nga ca soloka. Tu kevua ciyulo kaha na ku kala vuino na vakuetu. Nga tu pua na ku lilongesela ha ku sevuka cetu, tu ka pua va ku zangama kaha vakuetu va ka tu lema. Ka tu ka livua ku pihia cikuma ni ku limona ngue ka tuesi na seho. Ku tantekeya ngecize vakuetu navo ve ku lua na ku sevuka cavo ci ka tu suenesa mu hiehi navo. Vunoni ca hiana seho, tu ka vezika mu ku lilongesa ku tambuluisa cilemo ca Njambi na cizango ceni ca ku ecela.​​—Kolose 3:13.

Vuno cize ku sevuka ca vaMargaret va tua tumbula ha katete ca nienguesele cikuma vakuavo ni? Na limo litangua liahi. Vunoni vose va zolele lika ku sevuka caco, cikuma-kuma vaMargaret, kaha via-ku-lia viaco via tovalele​—musozi ua ku hona macarao! Mu miaka ya ku lutue, vatekulieni va simutuilile via via-ku-lia viaco ku vana vavo ce ku vavuluisa vasamba vuavo na va kukuavo. Muomu ca puile ku sevuka ca ngoco!

^ cin. 2 Mazina va na alulula.