Skip to content

Skip to table of contents

 CILONGESA 21

Yehova a ka mi Hana Ngolo

Yehova a ka mi Hana Ngolo

“Omo nji na zeye kaha nja kaniama.”​—2 KOL. 12:10.

MUASO 73 Tu Hane ku Simpa

VI TU LILONGESAMO *

1-2. Vitanga vika ve ku pinda navio cingi ca Vakaleho va Yehova?

KAPOSTOLO Paulu, ua kaniamesele Timoteo kaha na Vakua Kilistu vose vene, va puisemo mu vutuntu cipanga cavo ca ku ambulula. (2 Tim. 4:5) Tu vose tue ku lihakela kapandi ka ku kava eci cimamuna ca Paulu. Vunoni vintsimbu vimo ca cikalu. Vamuanetu vavengi ve ku tondeka ku simpa cikuma linga va ambulule. (2 Tim. 4:2) Ca ku muenako, aci singaniekenu ha vamuanetu va kala ku vifuti vi va vindika vipanga vietu. Ve ku ambulula, vutuhu va tantekeya ngecize va hasa ku va tuala mu kamenga!

2 Vangamba va Yehova ve ku pinda na visoti via ku liseza-seza vize vi hasa ku va vuisa vusiua. Ca ku muenako, vamo ve ku fuitangana viola via vingi, linga va uaneko kamo ka ku likuasa nako ha ndzivo. Kaha vamuanetu vaco, ve ku tonda ku linga via vingi mu cipanga ca ku ambulula, vunoni mu ve ku heta ku ntsongo ya simano va na zeye. Vamo co, misongo ka ye ku kanguka na vukulupe via va tumbika ha mavu. Vakuavo ve ku pinda na visinganieka via ku livua vungoco. Umo ndumbuetu ua lizina Mary, * Ngueni: “Ku lua na visinganieka via ku livua vungoco, ce ku nji lolola cikuma. Kaha ku hona ci nje ku tundisaho ce ku nji sila citaku-taku, muomu ka nje ku kala na ndzili ni ntsimbu ya ku ambulula.”

3. Vika tu lilongesa mu cilongesa cino?

3 Ambe nga tua kala na visoti via ku fua vati, Yehova a hasa ku tu hana ngolo ya ku kolesa mu visoti viaco na ku tualelelaho ku mu pangela. Mu cilongesa cino, tu hilula vati Yehova a hasa ku tu hana ngolo yaco. Vunoni ha katete, tu ci talenu vati ua kaniamesele Paulu na Timoteo, linga va hase ku puisamo mu vutuntu cipanga cavo ca ku ambulula, vutuhu va kele mu visoti.

YEHOVA UE KU TU HANA NDZILI YA KU PUISAMO CIPANGA CA KU AMBULULA

4. Visoti vika ua pindile navio Paulu?

4 Paulu ua hitile mu visoti via ku liseza-seza. Ca ku muenako, ua tondele cikuma ngolo ya ku kolesa mu va mu tinguile, ku muasa  mavue, na ku mu haka mu tumenga. (2 Kol. 11:23-25) Cikuavo naua, ua litavelele ngecize vintsimbu vimo, ua kele na ku pinda na visinganieka via ku livua vungoco. (Loma 7:18, 19, 24) Kaha naua, ua kele na cimo citanga ca cihindu, ca mu puililile ngue “lumbimbo mu muvila,” ngeci ua lambelelele Njambi linga a mu tundise co.—2 Kol. 12:7, 8.

Vika via kuasele Paulu na Timoteo ku tualelelaho ku ambulula? (Talenu vinanga 5-6) *

5. Vika ua hasele ku puisamo Paulu vutuhu ua hitile mu visoti?

5 Yehova ua hanene ngolo kuli Paulu linga a puisemo cipanga ca ku ambulula, vutuhu ua hitile mu visoti via vingi. Tu ci hilulenu via puisilemo Paulu. Ca ku muenako, mua kele mu kamenga ka ku ndzivo ku Loma, Paulu na ntuima yose ua hakuilile muzimbu ua cili, mu ku ambuluila vakuluntu va vaYundeya na vakua nguvulu. (Vili. 28:17; Filp. 4:21, 22) Kaha cikuavo naua, ua kele na ku ambulula ku Tuniungi va ku Nganda vavengi, na ku vose va ile mu ku mu meneka. (Vili. 28:30, 31; Filp. 1:13) Mu ntsimbu yaco, Paulu naua ua sonekele mikanda ya ku huimina ize ye ku kuasa Vakua Kilistu va vusunga na lelo lino. Lungano lua Paulu, lua kaniamesele cikungulukilo ca ku Loma, ngeci vamuanetu va ku cikungulukilo caco va hasele “ku simpa mu ku zimbula lizi lia Njambi na vuoma vuahi.” (Filp. 1:14) Vutuhu ha vintsimbu vimo, Paulu ka hasele ku linga viose via tondele, vunoni ua lihakelele kapandi ka ku pangesa vuino nkala vukovelelo vua mu solokelele. Ngeci mukemuo, kapandi ka lihakelele ka hasele “ku suenesa ku lutue zimpande zia cili.”—Filp. 1:12.

6. Kuliya na 2 Kolintu 12:9, 10, vika via kuasele Paulu ku puisamo cipanga ceni ca ku ambulula?

6 Paulu ua tantekeyele ngecize viose via hasele ku puisamo mu vipanga via Yehova, ka vi puisilemo ku ngolo yeni, vunoni Njambi ikeye ua mu kuasele. Kaha naua ua nongonuene ngecize ‘ngolo ya Njambi ya kele na ku lipuisamo mu ku zeya’ ceni. (Tandenu 2 Kolintu 12:9, 10.) Ku hitila mu sipilitu santu, Yehova ua hanene ngolo kuli Paulu linga a puisemo mu vutuntu cipanga ceni ca ku ambulula, vutuhu ua hitile mu ku mu luisa, mu tumenga na mu visoti vikuavo.

Vika via kuasele Paulu na Timoteo ku tualelelaho ku ambulula? (Talenu cinanga 7) *

7. Visoti vika ua pandele ku vula Timoteo, linga a hase ku puisamo mu vutuntu cipanga ceni ca ku ambulula?

7 Mukuendze Timoteo, uze ua puile kavusamba ka Paulu, neni ua hitukilile ha ngolo ya Njambi linga a hase ku puisamo cipanga ceni ca ku ambulula. Timoteo ua kele na ku enda na Paulu mu mangendzi a laha a vumisionaliu. Cikuavo naua, Paulu ua kele na ku mu tuma-tuma  mu mangendzi akuavo linga a ka meneke na ku kaniamesa vikungulukilo. (1 Kol. 4:17) Vunoni Timoteo ua kele na ku pinda na vimo visoti. Ca ku muenako, citava ua kele na ku livua ngecize nevi via hasa ku puisamo viahi. Kaha halumo vikevio via lingisile Paulu a mu mamune ngueni: “Na umo uahi a yengule vukuendze vuove.” (1 Tim. 4:12) Cikuavo naua, ha ntsimbu yaco, Timoteo neni ua kele na lumo lumbimbo mu muvila ni nguetu ua kele na “ku vavala ntsimbu yose.” (1 Tim. 5:23) Vunoni Timoteo ua tantekeyele ngecize Yehova a ka mu hana ngolo yeni, sipilitu santu linga a kale na ndzili ya tondekele mu ku ambulula na ku kuasa vamuanaye.—2 Tim. 1:7.

NGOLO YA KU TUALELELAHO KU ONONOKA MU VIESEKO

8. Vati Yehova ue ku kaniamesa vangamba veni lelo lino?

8 Lelo lino, Yehova ue ku hana vangamba veni “ngolo ya ku hiana cikumakuma” linga va tualeleleho ku mu pangela na lukakatela. (2 Kol. 4:7) Tu hilulenu vukuasi vuuana, vue ku tu hana Yehova mu ku tu kuasa ku kolesa: (1) civundilo, (2) Mbimbiliya, (3) vamuanetu, (4) cipanga ca ku ambulula.

Yehova ue ku tu hana ngolo ku hitila mu ku vundila (Talenu cinanga 9)

9. Vati ku vundila ci hasa ku tu kuasa?

9 Vivundilo vie ku tu kaniamesa. Ngue mu ya muesa Efeso 6:18, Paulu ua tu kaniamesa tu pue na “ku vundila ntsimbu yose.” Kaha Njambi a ka tu kuasa. Muanetu Jonnie ua ku Bolivia, ua tambuile vukuasi vuaco mua hitile mu vieseko via ku likava. Vaise, vanaye kaha na mpueyeni, vose va vavalele mua kama ha ntsimbu imo lika. Kaha ku niunga ava vantu vatatu ha ntsimbu imo lika, ca mu kaluuilile cikuma. Vanaye, va hetele vene ha ku toka, kaha va ise na mpueyeni va ambatele ntsimbu ya kama amba va kanguke. Muanetu Jonnie ue ku vuluka ntsimbu yaco ngueni: “Mu via nji tsekele visoti, cuma ca nji kuasele, ca puile ku leka Yehova cifua ci nja kele na ku livuilamo mpundu ku mutima ku hitila mu vivundilo.” Ngeci Yehova ua hanene Jonnie ngolo ya tondekele linga a hase ku kolesa. Muanetu Ronald, ua pua mukuluntu mu cikungulukilo ku Bolivia, va mu lekele nguavo vanaye va na va uana na cancer. Kaha mu nima ya ngonde imo va tokele. Vika via mu kuasele ku kolesa? Ivene ngueni: “Ku vundila ca nji kuasele ku tundisa viose via kele mu mutima uange mu ku vi leka Yehova. Nji tantekeya ngecize ka kuesi ueka ue ku nji ivuisisa ku tuvakana Yehova. Yehova a nji tantekeya ku hiana nange ivene.” Vintsimbu vimo, tue ku livua vene ngo, nomo mua ku lingila muahi, ambe viuma via ku tumbula mu civundilo tue ku vi honoua. Vunoni Yehova ua tu lania tu vundile ambe nga ka tuesi na ku hasa ku lombolola cifua ci tuli na ku livuilamo mpundu.—Loma 8:26, 27.

Yehova ue ku tu hana ngolo ku hitila mu Mbimbiliya (Talenu cinanga 10)

10. Ngue muya muesa VaHevelu 4:12, omo lia vika ku tanda Mbimbiliya na ku ihilula ca pua ca seho ya kama?

10 Mbimbiliya ye ku tu kaniamesa. Paulu ua kele na ku tanda Visoneka via ku lela linga a hase ku uana ngolo na ku lembezieka ca a tondekele. Netu tu hasa ku lingamo. (Loma 15:4) Omo tu tanda Lizi lia Njambi na ku lihilula, Yehova a hasa ku pangesa sipilitu santu yeni, linga a tu kuase ku ivuisisa vati vize vi tu na tanda via likuata na cisoti cetu. (Tandenu VaHevelu 4:12.) Muanetu Ronald u tu na tumbula laza ngueni: “Kali-kali nja liizilisa ku tanda Mbimbiliya matangua ose, kaha nje ku lingamo ku ntsimbu ya vutsiki. Nje ku hilula cikuma ha vifua via Yehova, na seho ye ku muesa ku vangamba veni. Ku linga evi, ce ku nji kaniamesa.”

11. Vati Mbimbiliya ya kuasele umo ndumbuetu ua kele mu vusiua?

11 Ku hilula viuma vi tue ku tanda mu Lizi lia Njambi, ci hasa ku tu kuasa ku mona visoti vietu mu njila ya cili. Tu hilulenu vati Mbimbiliya ya kuasele umo ndumbuetu ua tsisile yalieni. Umo mukuluntu mu cikungulukilo ua lekele uze ndumbuetu uaco ngueni: “Apue na  ku tanda livulu lia Yombi, muomu a hasa ku lilongesako via vingi. Ha katete mua putukile ku tanda livulu liaco, ua putukile ku paya Yombi omo lia ku yayavala cikuma.” Ivene ngueni: “Ha katete nja kele na ku singanieka nguange, Naaana Yombi! Iya ua linienga ngoco!” Vunoni mu nima ya ku hilulaho vuino, ua muene ngecize neni mukemuo vene mua kele na ku linga. Ku lingamo, ca mu kuasele ku sungamesa visinganieka vieni, na ku mu hana ngolo ya ku kolesa vutuhu ua tsisile yalieni.

Yehova ue ku tu hana ngolo ku hitila mu ku likata na vamuanetu (Talenu cinanga 12)

12. Vati Yehova ue ku tu kaniamesa ku hitila muli vamuanetu?

12 Vamuanetu ve ku tu kaniamesa. Njila ikuavo ye ku pangesa Yehova mu ku tu kaniamesa, ya pua ku hitila muli vamuanetu. Paulu ua sonekele ngecize, ua tondele cikuma ku kala hamo lika na vamuanaye va mu lutsilielo “linga va likolese umo na mukuavo.” (Loma 1:11, 12) Ndumbuetu Mary u tu na tumbuile ha katete, ua haka seho ya kama ku ku likata na vamuanetu. Ivene ngueni: “Vamo vamuanetu na vandumbuetu va pangesa Yehova mu ku nji kuasa, ka va tantekeyele ngecize nja kala mu visoti. Vunoni mezi a va kele na ku nji leka cipue mu kanua, ni mu ku nji sonekela mukanda, akeo mpundu a nja tondekele. Cikuavo naua ce ku nji kuasa, ca pua ku lekako visoti viange kuli vamo vandumbuetu va hita mu visoti via ku lifua na viange, kaha na ku lilongesa ku lungano luavo. Kaha ntsimbu yose, vakuluntu ve ku nji vuisa ngecize nja pua cilio ca seho ya kama mu cikungulukilo.”

13. Vati tu hasa ku likaniamesa umo na mukuavo?

13 Viuano vietu, via pua cimo cihela ca cili cikuma ci tue ku likaniamesela umo na mukuavo. Ngeci mukemuo, ci ka pua ca cili nga muntu ku muntu tu lihakela kapandi ka ku kaniamesa vakuetu, mu ku va santsela na ku va muesa ngecize va pua va seho. Ca ku muenako, umo mukuluntu mu cikungulukilo ua lizina Peter, ua lekele umo ndumbuetu ua kala na yala ka puile Mukaleho, ngueni: “Ku mi mona kuno ce ku tu kaniamesa cikuma-kuma. Vana venu 6, ka mue ku va viukisa lika ku muvila vunoni na ku vikumbululo.” Uze ndumbuetu uaco, ua vuile misozi ya ndzolela mu meso na ku mu kumbulula ngueni: “Mezi enu akeo mpundu a nji na tondekele ku ivua lelo.”

Yehova ue ku tu hana ngolo ku hitila mu ku ambulula (Talenu cinanga 14)

14. Vati ku ambulula ce ku tu kuasa?

14 Ku ambulula ce ku tu kaniamesa. Nga tu na ambuluila muntu, tue ku livua vuino cikuma, cipue nga na tava muzimbu uetu ni kuahi. (Visi. 11:25) Umo ndumbuetu ua lizina Stacy, ua livuililile ngolo ye ku iza mu cipanga ca ku ambulula. Mua uile umo kavusoko keni mu cikungulukilo, ndumbuetu Stacy ua zeyele mua kama na ku lihula ngueni, ‘Vuno kuli vimo vieka vi nji ne ku lingile mu ku mu kuasa ni?’ Kaha visinganieka viaco, vikevio lika via mu sulile ku mbunge. Vika via mu kuasele ku kolesa? Cipanga ca ku ambulula! Mua kele na ku ambulula, ua putukile ku tuala mana ku vantu va tondekele vukuasi vueni mu liha. Ivene ngueni: “Mu ntsimbu yaco, Yehova ua nji hele umo cilongesa ca Mbimbiliya ua putukile ku kola vuasi mu lutsilielo. Kaha vize via nji kaniamesele cikuma. Cuma ce ku nji kuasa cikuma mu muono ca pua ku tuhuka mu lihia.”

15. Vika mua lilongesa ku mezi a ndumbuetu Mary’?

15 Vamo ve ku livua ngecize ka ve ku puisamo via vingi mu cipanga ca ku ambulula omo lia vimo vitanga. Nga nenu mukemuo mu mue ku livua, vulukenu ngecize Yehova ue ku tuala mana ku kapandi ka mue ku lihakela. Tu hilulenu naua ha lungano lua ndumbuetu Mary. Ndumbuetu Mary ua nungulukilile ku cihela ci va kele na ku handeka lilimi lieka, lize ka tantekeyele. Ngeci ua livuile ngecize na via vingi via hasa ku linga mu cipanga ca ku ambulula viahi. Ivene ngueni, “Mu imo ntsimbu ka nja hasele ku linga via vingi, vunoni ku hana kacikumbululo ka cinike ku viuano, cipue ku tanda lika cinimbu  ca mu Mbimbiliya. Nga njili mu lihia co ku hana lika kamo katratadu.” Evi via mu lingisile ku livua vungoco, muomu ua lisetekesele na vavene lilimi. Vunoni ua sungamesele cifua ca kele na ku muenamo viuma. Kaha ua putukile ku nongonona ngecize Yehova a hasa ku mu pangesa ambe nga ka kele na vutongue vua kama. Ivene ngueni, “Vusunga vua mu Mbimbiliya vua pua vua vuasi, kaha vukevuo vu va tonda vantu linga va aluluke.”

16. Vika vi hasa ku kaniamesa vaze ka ve ku hasa ku tunda ha ndzivo?

16 Yehova ue ku mona cizango cenu ca ku ambulula kaha ua ci haka seho ya kama, ambe nga ka mue ku hasa ku tunda ha ndzivo. A hasa ku mi sokoluela vukovelelo vua ku ambuluila kuli vakua ku mi niunga, ni vene ku vandotolo na vafilimelo. Nga mu setekesa viuma vi mua lingile laza na via vuovuno, mu hasa ku uila mu vusiua. Vunoni nga mu tuala mana ku cifua ca ali na ku mi kuaselamo Yehova lelo lino, mu ka kaniama na ku kolesa mu visoti vienu na ndzolela.

17. Kuliya na Ekelesiaste 11:6, omo lia vika tua pande ku tualelelaho ku ambulula cipue nga cipanga caco ka cesi na ku kola vuasi?

17 Ka tu tantekeya mbuto ika ya vusunga i ka kuata na ku kola. (Tandenu Ekelesiaste 11:6.) Ca ku muenako, ndumbuetu Barbara, endela ku miaka 80, ue ku ambuluila ku telefone na ku soneka mikanda kusua kumo. Tangua limo, ua sonekele mukanda na ku hakamo Vutala vua 1 ya Março ya 2014, vua kele na cimpande “O que Deus tem feito por você?” Ku ndzimba yeni ua tumine mukanda uaco kuli vamo vayala na mpuevo va puile Vakaleho va Yehova laza. Kaha va tandele vuze Vutala, ku hilukila na ku hilukila. Yala, ua livuile mpundu ngue Yehova ua kele na ku handeka neni. Ngeci vaze vayala na mpuevo va putukile ku kunguluka kusua kumo, kaha mu nima ya miaka i tuvakana 27, va hilukile mu cikungulukilo. Mua vusunga ku mona viuma viezile mu mukanda umo lika ua sonekele, ca mu kaniamesele na ku mu kolesa cikuma!

Yehova ue ku tu hana ngolo ku hitila mu (1) ku vundila, (2) Mbimbiliya, (3) ku likata na vamuanetu, (4) ku ambulula (Talenu vinanga 9-10, 12, 14)

18. Vika tu hasa ku linga mangana ngolo ya Njambi i tu kuase?

18 Yehova ue ku tu hana vukovelelo vua vuingi linga tu uane vukuasi ku ngolo yeni. Nga tu pua na ku pangesa vukovelelo vua ku vundila, ku tanda Mbimbiliya, ku likata na vamuanetu, na ku ambulula, tu ka muesa ngecize tua kulahela nguetu Yehova a hasa ku tu kuasa kaha ua kala mpundu na cizango ca ku lingamo. Ngeci mukemuo, tu kulahelenu muli Tatetu ua muilu “uze ua lema ku kuasa na zindzili zieni vaze vali na mutima ua ku tantuluka kuli ikeye.”—2 Miz. 16:9.

MUASO 61 Tualelelenuho, Vakaleho!

^ cin. 5 Tuli na ku yoyela ku matangua a akalu cikuma, vunoni Yehova ue ku tu hana vukuasi vu tua tondeka linga tu hase ku kolesa. Mu cilongesa cino, tu simutuila vati Yehova ua kuasele kapostolo Paulu na Timoteo linga va tualeleho ku mu pangela, vutuhu va hitile mu visoti. Kaha tu simutuila naua, viuma 4 via tu vuahesela Yehova mu ku tu kuasa ku kolesa.

^ cin. 2 Lizina va li alulula.

^ cin. 53 VI LI HA VIKUPULO: Paulu ali mu kamenga ka ku ndzivo ku Loma kaha ali na ku soneka mikanda ya ingi mu ku tuma ku vikungulukilo na ku ambuluila vantu ve ku iza mu ku mu meneka.

^ cin. 55 VI LI HA VIKUPULO: Timoteo ali na ku meneka vikungulukilo mu ku kaniamesa vamuanaye.