Skip to content

Skip to table of contents

 CILONGESA 4

‘Sipilitu ye ku Ambulula Vukaleho’

‘Sipilitu ye ku Ambulula Vukaleho’

“Sipilitu ivene; ikeye a ambulula vukaleho kumo na cimbembesi cetu, ngecize tu vana va Njambi.”—LOMA 8:16.

MUASO 25 Cikota ca ku Lela

VI TU LILONGESAMO *

Yehova ua muaniene sipilitu santu mu cifua ca ku komouesa ha pentekosta ha civunga ca Vakua Kilistu va ku pua 120 (Talenu vinanga 1-2)

1-2. Viuma vika via ku komouesa via solokele ha litangua lia pentekosta ya mu 33?

NTSIMBU Yesu kanda a hiluke muilu ua sikile vandongesi veni ngueni, va kale mu Yelusalema muomu va ka tambula vuana vua ku lifuila. (Vili. 1:4, 5) Kaha mu muaka uze vene ua 33, mu cimo calumingu ku cimene lia puile litangua lia Pentekosta mu Yelusalema. Civunga ca vandongesi va heta ku 120 va likunguluile mu hondo ya kuilu. (Vili. 1:13-15; 2:1) Vika via solokele mu nima yaco?

2 “Kaha vuasi-vuasi kuilu kua fumine ntsindo ngue ya luhundzi lua kama lua ku hita lusi,” ya sulisile ndzivo yose. Kaha “kua va solokelele malimi ngue a tuhia” a tumamene ha mitue ya vandongesi, Kaha vose va sulile na “sipilitu santu.” (Vili. 2:2-4) Yehova ua muaniene sipilitu santu yeni mu cifua ca ku lifuila, ha civunga ca vandongesi. (Vili. 1:8) Ava vakevo va puile va ku livanga va va vuavesele na sipilitu santu * linga va ka sike hamo na Yesu muilu.

VIKA VIE KU SOLOKA KU MUNTU NGA VA NA MU VUAVESA?

3. Omo lia vika vaze va kele ku pentekosta va kele na vusunga ngecize va va vuasele na sipilintu?

3 Nga mua puile umo ua vaze vandongesi 120 va likunguluile mu hondo ya kuilu mu Yelusalema, mua vusunga nga ka mu ka  suvu litangua liaco. Mua muene vimo ngue milengi ya tuhia ya tonkamene ha mitue, ngeci mua putukile ku handeka malimi! (Vili. 2:5-12) Cili vene mu ka kala na vusunga ngueni va mi vuavesa mpundu na sipilitu santu. Vuno vose va ve ku vuavesa na sipilitu santu, ve ku va vuavesa mu cifua cimo ca ku komouesa mu imo ntsimbu ni? Houe. Vati tua tantekeyamo?

4. Vuno vakua Kilistu va katete vose va va vuavesele mu cifua cimo lika ni? Lombololenu.

4 Tu ci hindenu ha ntsimbu ya ku vuavesa. Cize civunga ca vakua Kilistu va vavuasele lia Pentekosta ya 33 tele kati vakevo lika. Vati omuo? Mu litangua liaco kua kele naua vakuavo va ku pua 3.000 va tambuile sipilitu santu. Ava vaco va va vuavesele ha ntsimbu ya mbatizimu. (Vili. 2:37, 38, 41) Vunoni mu miaka ya hateleko, kati vakua Kilistu vose va va vuavesele ha ntsimbu ya mbatizimu. Vakua Samaliya va va vuavesele na sipilitu santu mu nima ya imo ntsimbu tunde ha mbatizimu yavo. (Vili. 8:14-17) Kaha mu cifua cimo ca ku lifuila cikuma, Koloneliu na vakua ndzivo yeni vose va va vuavesele ntsimbu kanda va va mbatize.—Vili. 10:44-48.

5. Kuliya na 2 Kolintu 1:21, 22, vika vie ku soloka nga muntu va mu vuavesa na sipilitu santu?

5 Tu hindeni honi ha viuma vie ku soloka nga muntu va na mu vuavesa na sipilitu santu. Vamo ce ku va kaluila ku ivuisisa ku tava ngecize Yehova na va vuavesa. Halumo va hasa ku lihula nguavo, ‘Vika honi Njambi na nji hanguila?’ Vamo co ka va hasa ku livua ngoco. Muose omuo mue ku livuila muntu, kapostolo Paulu ua lombololuele viose vie ku soloka ku vose va ku vuavesa ngueni: “Muli ikeye enu naua, omo mua vuile lizi lia vusunga, zimpande zia cili zia vuovoke vuenu, muli ikeye, omo mua tsililielele, va mi hakele citantekeyeso ca sipilitu santu mukua litavasiano, ikeye ntompo * ua vusuana vuetu noho Njambi a ka kula vieni, mu ku zumbangeya vumpahu vueni.” (Efe. 1:13, 14) Ngeci Yehova ue ku pangesa sipilitu santu yeni mu ku kuasa Vakua Kilistu ku ivuisisa ngecize ua va  hangula. Mu njila eyi sipilitu yeni ye ku pua ‘ntompo’ [ni vukaleho] ye ku hana vusunga ngecize tangua va ka yoya miaka yose muilu kati ha mavu.—Tandenu 2 Kolintu 1:21, 22.

6. Vika Mukua Kilistu ua ku vuavesa na pande ku linga a ka tambule fueto yeni muilu?

6 Vuno nga mukua Kilistu va mu vuavesa, eci ca lomboloka ngecize na tambula laza fueto yeni ya muilu ni? Houe. Ue ku kala na vusunga ngecize va na mu hangula ku kaya muilu, vunoni na pande ku vuluka eci cimamuna: “Vamuanetu, litakamesienu cikumakuma ku kolesa ku ku-mi-sana cenu na ku ku-mi-hangula cenu: muomu nga mu linga viuma evi, ka mu ka suntsuka na hamo hahi.” (2 Pet. 1:10) Ngeci mukemuo, nga Mukua Kilistu va na mu vuavesa, ni va na mu hangula ku ka ya muilu, a ka tambula lika fueto yeni nga a tualelaho kuononoka.—Filp. 3:12-14; VaHe. 3:1; Ku-So. 2:10.

VATI MUNTU UE KU KALA NA VUSUNGA NGECIZE VA NA MU VUAVESA?

7. Vati Muntu ue ku tantekeya ngecize va na mu hangula a ka yoyele muili?

7 Vati honi muntu ue ku tantekeya ngecize va na mu hangula linga a ka yoyele muilu. Cikumbululo tu ci uana ku mezi a kapostolo Paulu a sonekelele vakua Loma va tumbuile ngueni, “va va sanene mu ku pua vakua ku lela.” Ua va lekele ngueni: “Muomu cimbembesi ca vundungo cintsa ka mua tambuile cimbembesi ca ku puisa vumuana, eci vene tue ku tambeka naco, nguetu, Aba Tata. Sipilitu ivene; ikeye a ambulula vukaleho kumo na cimbembesi cetu, ngecize tu vana va Njambi.” (Loma 1:7; 8:15, 16) Ngeci ku hitila mu sipilitu santu, Njambi ue ku kuasa muntu ya na hangula evuisise ngecize na mu lania ku ka ya muilu.—1 Tes. 2:12.

8. Vati ua 1 Yoano 2:20, 27, ua muesa ngecize Vakua kilistu va ku vuavesa ka ci tondeka umo a va leke ngecize va kaya muilu?

8 Yehova ue ku kuasa muntu linga kati a kale na vimpata mu mutima ueni ngecize va na mulania ku ka yoyela muilu. (Tandenu 1 Yoano 2:20, 27.) Mua vusunga, Vakua Kilistu va ku vuavesa ve ku va longesa kuli Yehova ku hitila mu cikungulukilo ngeci mua nkala muntu uose. Vunoni ka citondeka umo a va leke ngecize vapua va ku vuavesa. Muomu Yehova na pangesa ngolo yeni ya ku hiana viose muilu na ha mavu, sipilitu santu, linga a va kuase ku ivuisisa ngecize tangua va kaya muilu.

VE KU “SEMUUA LUVALI”

9. Ngue mu ya muesa Efeso 1:18, ku aluluka cika ue ku hita muntu mu ve ku mu vuavesa?

9 Cingi ca vangamba va Yehova lelo lino, ce ku va kaluila ku ivuisisa vika vie ku soloka ku muntu nga va na mu vuavesa. Eci ka ca puile citanga, vali na vusunga vuaco muomu vakevo ka va puile va ku vuavesa. Kaha naua Njambi ua tangele vantu linga va yoyele hano ha mavu keti muilu. (Njen. 1:28; Visa. 37:29) Vunoni Yehova ua hangulaho vamo linga va ka yoyele muilu. Ngeci mukemuo Yehova mue ku vuavesa muntu, lulavelelo lua muntu uaco na visinganieka vieni vie ku aluluka. Kaha ue ku lavelela lika honi ku ka yoyela muilu.—Tandenu Efeso 1:18.

10. Vika ca lomboloka ku “semuua luvali”? (kaha Talenu ha litota.)

10 Vakua Kilistu mu ve ku va vuavesa na sipilitu santu, ve “ku semua luvali, ni “va semukila ku ka ya muilu.” * Yesu ua lomboluele ngueni ka citava ku leka muntu ua ku hona ku vuavesa vati ca fua nga muntu va na mu vuavesa ni na “semuua luvali,” ni ku “semuua ku sipilitu.”—Yoa. 3:3-8.

11. Lombololenu ku aluluka ce ku soloka ku muntu nga va mu vuavesa?

 11 Ku aluluka cika ce ku hita mu visinganieka via Vakua Kilistu va ku vuavesa? Ntsimbu kanda Yehova a va vuavese, ve ku lavelela ngecize va ka yoyela ha mavu miaka yose. Ve ku lavelela na ndzolela yose omo Yehova a ka tundisako ku vavala na ku alulula ano mavu ku pua citungu. Halumo va singaniekele ku ka sesa vavusoko vuavo vatsa. Vunoni mu nima ya ku va vuavesa, ve ku putuka ku alulula visinganieka viavo. Omo lia vika? Kati nguavo halumo lulavelelo lua ku ka yoyela ha mavu lua va futula. Ka va aluluile visinganieka viavo omo lia ku uma mutima ni ku zeya cikuma. Ka va singaniekele nguavo halumo ku ka yoyela ha mavu miaka yose ci ka futula houe. Vunoni Yehova mpundu ue ku pangesa sipilitu santu yeni mu ku alulula visinganieka viavo na lulavelelo lu va haka seho ya kama.

12. Kuliya na 1 Petulu 1:3, 4 vati Vakua Kilistu va ku vuavesa ve ku ivua ku tuala ha lulavelelo luavo?

12 Muntu u va na vuavesa a hasa ku livua ku hona ku fuila ku tambula vuana vuaco. Vunoni ke ku kala na vimpata ngecize Yehova na mu hangula mpundu. Kaha mutima ueni ue ku sula na ndzolela ya kama mue ku singanieka lulavelelo lueni lua ku lutue.—Tandenu 1 Petulu 1:3, 4.

13. Vati Vakua Kilistu va ku vuavesa ve ku ivua ku tuala ha muono uavo hano ha mavu?

13 Vunoni eci ca lomboloka ngecize Vakua Kilistu va ku vuavesa va tonda ku-tsa ni? Kapostolo Paulu ua kumbuluile eci cihula. Ua setekesele muvila ua muntu na mbalaka: “Muomu cili vene, etu tu ci li mu mbalaka ino, tue ku vindzuoka, omo tua lemuua; kati ngue tua hianga va tu zule, vunoni va tu zike, linga eci ca vutsi ci nonge na muono.” (2 Kol. 5:4) Ava Vakua Kilistu navo kasi va tonda vene ku yoya, ku va tondo ku-tsa vuasi-vuasi. Vunoni viose ovio vi ve ku linga, ntsimbu yose ve ku vuluka lulavelelo luavo lua vumpahu lu va lavelela ku lutue.—1 Kol. 15:53; 2 Pet. 1:4; 1 Yoa. 3:2, 3; Ku-So. 20:6.

NENU YEHOVA NA MI VUAVESA NI?

14. Vika ka via pandele ku lingisa muntu ku singanieka ngueni va na mu vuavesa na sipilitu santu?

14 Mue ku takania nga Yehova ua mi hangula ku ka ya muilu ni? Nga mue ku ivua ngueni halumo va mi hangula, singaniekenu ha vihula vino via seho: Vuno mua kala na cizango ca ku hiana mu ku linga cizango ca Yehova ni? Vuno mua kala na ntuima ya ku lifuila mu cipanga ca ku ambulula ni? Vuno mua kala na cizango ca ku lilongesa Mbimbiliya linga mu tantekeye viuma “via ku lova via Njambi” ni? (1 Kol. 2:10) Mue ku ivua ngecize Yehova ue ku vezikisa cikuma cipanga cenu ca ku ambulula ni? Vuno mue ku livua ngecize mua kala na kapandi ka ku kuasa vakuenu ku tantekeya via Yehova ni? Vuno mue ku mona ngecize Yehova ue ku mi kuasa cikuma mu vinjila via ku lifuila mu muono uenu ni? Nga mua kumbulula ngueni eyo, vuno eci ca lomboloka ngecize va mi hangula ku ka yoyela muilu ni? Houe kati mukemuo. Omo lia vika? Muomu uose ngamba ya Njambi a hasa ku ivua ngoco, a pue ua ku vuavesa ni kuahi. Yehova a hasa ku hana ndzili yeni ku hitila mu sipilitu santu kuli nkala ngamba yeni, a pue ua ku vuavesa ni kuahi. Nga mue ku takania nguenu va mi vuavesa ni kuahi, kaha ka va mi hanguile. Muomu uose ue ku hangula Yehova ke ku takania ni nguetu kesi ku ndzimba! Ali mpundu na vusunga vuaco!

Yehova ua pangesele sipilitu santu mu ku kuasa Avilahama, Sala, Ndaviti na Yoano mukua ku Mbatiza linga va puisemo viuma via ku komouesa, vunoni ka pangesele sipilitu yeni mu ku va hana lulavelelo lua ku yoyela muilu (Talenu vinanga 15-16) *

15. Vati tua tantekeya nguetu kati vose ve ku tambula sipilitu ya Njambi tangua va ka yoyela muilu?

15 Mu Mbimbiliya, mua kala mizimbu ya muesa ngecize Yehova ua hele sipilitu santu ku vangamba veni, vunoni ka va kele  na lulavelelo lua ku ka yoyele muilu. Ca ku muaneko, sipilitu santu ya kele na ku mu tuamenena Ndaviti. (1Sam. 16:13) Ya mu kuasele ku ivuisisa viuma via ku lova ku tuala hali Yehova, na ku mu tuamena ku soneka imo mikanda mu Mbimbiliya. (Mako 12:36) Vutuhu ngoco, kapostolo Petulu ua handekele ngueni “Ndaviti ka londele muilu.” (Vili. 2:34) Yoano mukua ku Mbatiza neni ua ‘sulile na sipilitu santu.’ (Luka 1:13-16) Kaha Yesu ua handekele ngueni ka kuesi yala ua hiana Yoano mukua ku mbatiza, kasi ua handekele naua ngueni Yoano ka ka pu muangana muilu. (Mat. 11:10, 11) Cili, Yehova ua pangesele sipilitu santu mu ku hana vaze va mala ngolo ya ku linga viuma via ku komouesa, vunoni ka i pangesele mu ku va lania linga va ka yoyele muilu. Vuno eci ca lomboloka ngecize kuononoka cavo ca puile ca cindende ku hiana ca vaze va ka ya muilu ni? Houe. Muomu Yehova a ka va sangula linga va ka yoyele ha mavu mu citungu.—Yoa. 5:28, 29; Vili. 24:15.

16. Vivezikiso vika va lavelela cingi ca vangamba va Njambi lelo?

16 Cingi ca vangamba va Njambi va ka yoyela ha mavu. Ngeci mua Avilahama, Sala, Ndaviti, Yoano mukua ku Mbatiza na vamala na vampuevo vavengi va ku laza, va kele na lulavelelo lua ku ka yoya ha mavu mu ku sika ca vuangana vua Njambi.—VaHe. 11:10.

17. Vihula vika tu ka lilongesa mu cilongesa ci na hatako?

17 Mu ku linga vamo va ku vuavesa na lelo kasi va kala hamo na vangamba va Yehova, eci ce ku katula vimo vihula. (Ku-So. 12:17) Ca ku muenako, Vati va na pande ku li muenamo vaze va ku vuavesa? Nga umo mu cikungulukilo cenu a putuka ku lia mbolo na ku nua viniu ha mulalelo, vati mua pande ku mu muenamo? Vati co nga vantu vaco va putuka ku livuezelela? Vuno mua pande ku lisosomua ni? Tu ka tantekeya vikumbululo mu cilongesa ci na hatako.

^ cin. 5 Tunde mu muaka ua Pentekosta ya  33 T.K.N, Yehova ua hana vamo Vakua Kilistu lulavelelo lua ku lifuila​—lua ku ka sika hamo na Yesu muilu. Vati ava Vakua Kilistu va kala na vusunga ngecize va va hangula mpundu? Vika vie ku soloka ku muntu na tambula cilanio caco? Cino cilongesa ci ka tsindika ha cilongesa ca tuhukile mu Vutala vua Janeiro ya 2016. Kaha ci ka kumbulula evi vihula via seho.

^ cin. 2 LIZI LI VA LOMBOLOLA: Ku vuavesa na sipilitu santu: Yehova ue ku pangesa sipilitu santu yeni mu ku hangula muntu a ka sika hamo na Yesu muilu. Ku hitila mu sipilitu santu, Njambi ue ku hana “ntompo ya vusuana” ni nguetu citantekeyeso ca ku lutue. (Efe. 1:13, 14) Ava Vakua Kilistu vaco va hasa ku handeka nguavo,“sipilitu ivene; a ambulula vukaleho.” Ni nguetu i va sololuela ngecize fueto yavo va ka i tambuila muilu.—Loma 8:16.

^ cin. 5 LIZI LI VA LOMBOLOLA: Muntu nga va na mu vuavesa ka ca lombolokele ngecize ali mpundu na vusunga vuose ngecize a kaya muilu, vunoni na pande ku lihakela kapandi ka ku pua mukua vusunga, na ha ku tsa ceni ni ntsimbu kanda i putuke lamba ya kama.—Efe. 4:30; Ku-So. 7:2-4; Talenu vihula via vakua ku tanda ku mwbr ya Abril, 2019.

^ cin. 10 Nga mu tonda ku tantekeya vi ca lomboloka ku “semuua luvali,” talenu Vutala, vua 1 de Abril 2009 mafo 3-12.

MUASO 27 Ku Soloka ca Vana va Njambi

^ cin. 57 VI LI HA VIKUPULO: Cipue nga tuli mu kamenga omo lia lutsilielo luetu ni tue ku ambulula na ku longesa mu ciyulo, tu hasa ku lavelela muono ka ue ku hua omo Vuangana vua Njambi vu ka tu sika.