Skip to content

Skip to table of contents

 CILONGESA 3

Mua kala na Seho ya Kama kuli Yehova Njambi Yenu!

Mua kala na Seho ya Kama kuli Yehova Njambi Yenu!

Ua tu vulukile mu tua zeyele omo lia vusiua.”​—VISA. 136:23, NW

MUASO 33 Mbilenu Cisoti Cenu Kuli Yehova

VI TU LILONGESAMO *

1-2. Visoti vika ve ku lihita navio cingi ca vangamba va Yehova kaha vika vie ku izamo?

ACI singaniekenu ha viuma evi vitatu vi hasa ku soloka mu muono ua muntu. Umo muanetu ua mukuendze va mu uana na vuvezi vue ku liana. Kaha umo muanetu mukua ku fuitangana va mu tundisa ha vipangi, vutuhu ue ku lihakela kapandi ka ku tonda vipanga vieka vunoni kesi na ku viuana naua. Kaha umo ndumbuetu ua ka sinakazi ali na ku tualelaho ku ku lupa, kaha omo liaco kesi na ku hasa ku puisamo via kele na ku linga laza mu cipanga ca Yehova.

2 Nga nenu muli na ku hita mu visoti ngeci muevi vi tua tumbula vuovuno, mu hasa ku livua ngue ka muesi na imo seho yahi. Evi visoti viaco vi hasa ku mi zima ndzolela, ku mi lingisa ku livua vungoco kaha na ku tanganesa vusamba vueni na vakueni vantu.

3. Vati Satana na vaze ve ku hungumuna ve ku muenamo muono ua vantu?

3 Ano mavu e ku muesa cifua ce ku muenamo muono Satana. Ntsimbu yose Satana ue ku lingisa vantu va limone ngue ka vakele na seho. Ua kuisile Eva a livue ngue a hasa ku uana cimo ku zituka ca ku lifuila, oku ni na tantekeyamo ngueni nga Eva a muesa lisino kuli Njambi, a ka tsa cili vene. Satana ua lihaka mu ku ntuamenena mingoso ya kama, pulitika, na malombelo a makuli mu mavu ose. Ngeci mukemuo ka ce ku tu komuesa ku mona ngecize, cingi ca vakua mingoso, pulitika, na vakuluntu va malombelo ve ku muesa vifua via Satana mu ku hona ku singimika muono ua vantu.

4. Vika tu lilongesa mu cilongesa cino?

 4 Yehova ua tonda tu livue mua cili, ngeci mukemuo ue ku tu hana vukuasi vu tu tondeka nga tu hita mu visoti vie ku tu lingisa ku livua vungoco. (Visa. 136:23; Loma 12:3) Cino cilongesa ci ka tu kuasa ku mona vati Yehova ue ku tu kuasa nga tu hita mu (1) visoti via cihindu, (2) ku hona vimbongo ni, (3) ku pinda na vukulupe. Kaha ambe vukulupe vu tu lingisa ku hona ku puisamo vi tua pangele laza mu cipanga ca Yehova. Vunoni ha katete, tu citaleni vusunga vu hasa ku tu lingisa ku handeka nguetu Yehova ua tu haka seho.

YEHOVA UA TU HAKA SEHO

5. Vusunga vuka vu muesa ngecize vantu va kala na seho ya kama ku meso a Yehova?

5 Vutuhu Yehova ua tu tanga ku mpumputa ya livu, vunoni tua kala na seho ku meso eni, ka tua puile ngue mazilo a ngoco. (Njen. 2:7) Ca ku muenako, tu hasa ku handeka vene nguetu tua kala na seho kuli Yehova. Muomu Njambi ua tu tangele na vuhasi vua ku muesa vifua vieni. (Njen. 1:27) Yehova ua tu haka ku vukama ku hiana nkala viuma viose via tangele hano ha mavu, mu ku tu hana mpoko ya ku sika mavu na tusitu va kalaho.—Visa. 8:4-8.

6. Vusunga vukuavo vuka vu tu lingisa ku handeka ngecize Yehova ua haka seho ku vantu va ku hona ku tantuluka?

6 Cipue mu nima ya Andama ku vulumuna, Yehova ua tualeleho ku haka seho ku vantu. Ua tu haka seho ya kama ngeci ua hetele ha ku tu tuma muaneni Yesu mu ku pua nkombelo ku vipi vietu. (1 Yoa. 4:9, 10) Yehova tangua a ka pangesa ngolo ya nkombelo yaco mu ku sangula ni ku hindula “vakua vuviuke na vakua vuhenge” vatsa, omo lia vupi vua Andama. (Vili. 24:15) Kaha Mbimbiliya ya muesa ngecize tua kala na seho ya kama ku meso a Yehova. Mua vusunga seho i tua kala nayo ku meso a Yehova ka ya hitukilile ha cihindu cetu, ku hona vimbongo ni vene ha miaka i tua kala nayo.—Vili. 10:34, 35.

7. Vusunga vuka vukuavo vue ku lingisa vangamba va Njambi ku tsiliela ngecize Yehova ua va haka seho mpudu?

7 Tuli na vusunga vukuavo naua vu tu lingisa ku tsiliela ngecize Yehova ua tu haka seho. Vusunga vuka? Muomu ua tu lania linga tu mu suene mu hiehi. (Yoa. 6:44) Mu tue ku lihakela kapandi ka ku suena kuli Yehova neni naua ue ku suena kuli yetu. (Tia. 4:8) Yehova ue ku pangesa naua ntsimbu ya kama na kapandi ka ku tulongesa na ku tu muesa ngecize tua pua va seho kuli ikeye. Kaha a tantekeya vati muono uetu u hasa ku pua mu ntsimbu ino na vati tu ka fua ku lutue. Kaha naua ue ku tu sungamesa muomu ua tu lema. (Visi. 3:11, 12) Mua vusunga ovu vua pua vukaleho vua muesa ngecize Yehova ua tu haka seho mpundu!

8. Vati mezi a ku Visamo 18:27-29 a kuata ku cifua ci tue ku muenamo visoti vietu?

8 Vamo va muene Muangana Ndaviti ku pua cilinge ca ngoco, vunoni Ndaviti ua tantekeyele ngecize Yehova ua mu lemene cikuma na ku mu kuasa. Kaha ku tantekeyamo ca kuasele Ndaviti omo ua kele na ku hita mu visoti. (2Sam. 16:5-7) Nga tu hita mu visoti ni ku livua vungoco, Yehova a hasa ku tu kuasa ku mona visoti viaco mu njila ya cili kaha na ku vula vitanga viaco. (Tandenu Visamo 18:27-29.) Nga tuli na vukuasi vua Yehova na vimo viahi vi hasa ku tu vindika ku mu pangela na ndzolela. (Loma 8:31) Tu ci simutuilenu ha viuma vitatu mpundu vi tu vuluisa ngecize Yehova ua tu lema na ku tu haka seho.

NGA MULI NA KU PINDA NA VUVEZI VUA KAMA

Ku tanda Mbimbilliya ce ku tu kuasa ku vula visinganieka via ku vihia vie ku iza omo lia ku vavala (Talenu vinanga 9-12)

9. Vati ku vavala ce ku kuata ku cifua ci tue ku limuenamo?

9 Ku vavala ci hasa ku tu zeyesa cikuma mu visinganieka, na ku tu lingisa ku livua ngue ka tua kele naua na seho kuli uose ouo. Ce ku vuisa na  ntsuama nga vantu va mona ngecize tua hitukila lika honi ha vukuasi vua vakuetu. Cipue nga vakuetu ka va tantekeyele via vuvezi vuaco, tu hasa ku pinda na visinganieka via ntsuama omo lia ku kokoloka ca ndzili yetu. Cipue mu visoti via cifua eci Yehova kasi a hasa ku tu kolesa. Mu njila ika?

10. Kuliya na Visimo 12:25, vika vi hasa ku tu kuasa nga tu pinda na vuvezi?

10 Mu tue ku pinda na vuvezi, “lizi lia cili” li hasa ku tu lembezieka. (Tandenu Visimo 12:25.) Mu Mbimbiliya, mua kala mezi a Yehova a muesa ngecize ua tu haka seho ya kama cipue nga tu vavale vati. (Visa. 31:19; 41:3) Nga tu pua na ku tanda lizi lia Njambi ku sua kumo, Yehova a ka tu kuasa ku pinda na visinganieka via ku pihia vie ku iza omo lia ku vavala.

11. Vati muanetu Jorge ua muene vukuasi vua Yehova mu muono ueni?

11 Tu talenu via lihitile navio muanetu Jorge. Mua puile mukuendze, ua putukile ku vavala kaha vuvezi vueni vua li vuezelele mu ku hita ca ntsimbu. Ua handekele ngueni: “Ka nja singaniekele nga nje ku hetele ha ku kala na visinganieka via ku henga omo lia vuvezi vuange, kaha na ntsuama ya vantu omo lia cifua ci ve ku nji muenamo. Nja kele na singanieka ntsimbu yose vati muono uange u ka aluluka omo vuvezi vuya na ku kola. Nja lizivile vungoco, ngeci nja vundilile kuli Yehova a nji kuase.” Vati Yehova ua kuasele vaJorge? Omo lia ku livua vungoco, va nji kaniamesele ku tanda Visamo, muomu mukanda uaco ua muesa ngecize Yehova ue ku niunga vangamba veni. Nja lihakelele kapandi ka ku hituluka mu vimo vinimbu ku sua kumo, kaha ku lingamo ca nji lembeziekele cikuma. Kaha mu ku hita ca ntsimbu vantu va muene ngecize nja kele na ndzolela. Vamuanetu va handekele nguavo, lungano luange lua va kaniamesele cikuma. Ku handeka vusunga, hakeho ha nja muene ngecize Yehova ua kumbuluile civundilo cange! Yehova ua nji kuasele ku mona  visoti viange mu njila ya cili. Kaha Nja putukile ku tuala mana ku vize vi ya handeka Mbimbiliya ku tuala ha vati Yehova ue ku nji muenamo vutuhu nja kala na cihindu ca cindende.

12. Nga mu lua na visoti via cihindu, vika mua pande ku linga mu kale na vusunga ngecize Yehova a mi kuasa?

12 Nga muli na ku hita mu vitanga via cihindu, kalenu na vusunga ngcize Yehova a tantekeya cisoti cenu. Vundilenu Yehova linga a mi kuase ku mona visoti vienu mu njila ya cili. Cikuavo naua omo mu tanda Mbimbiliya setekenu ku mona mezi a Yehova a handeka mpundu ha cisoti cenu. Tualenu mana ha mikanda ize ya muesa ngecize Yehova ua haka seho ku nkala ngamba yeni. Ku lingamo ci ka mi kuasa ku mona ngecize Yehova ua lema vose vaze ve ku mu pangela na mutima uose.—Visa. 84:11.

NGA MULI NA KU PINDA NA KU HONA VIMBONGO

Ku vuluka ngecize Yehova ua kulahesa ku tu hana viose via tu kambela, ci ka tu kuasa cikuma nga tuli na ku pinda na cisoti ca ku hona vipangi (Talenu vinanga 13-15)

13. Vati yala ue ku livua nga va mu fumisa ha vipangi?

13 Ku handeka vusunga, mitue ya vindzivo ve ku linga cose va tonde via ku suka vusoko vuavo. Vunoni aci singaniekenu nga umo muanetu va mu tundisa ha cipangi ca ku hona mulonga. A linga cose a uane cipanga ceka vunoni cahi. Cisoti caco ci hasa ku lingisa muanetu ku livua vungoco. Vati ku singanieka ha viuma via tu kulahesa Yehova ci hasa ku mu kuasa?

14. Vusunga vuka vu tulingisa ku tsiliela nguetu Yehova ue ku puisamo vikulaheso vieni?

14 Yehova ue ku puisamo viose vie ku kulahesa. (Yeho. 21:45; 23:14) Ue ku lingamo omo lia vusunga vua vuingi. Vua ku livanga, omo lia lizina lieni. Cikuavo naua mu Lizi lieni Mbimbiliya Yehova ua kulahesa ngueni a ka niunga mua cili vangamba veni kaha na ku puisamo via na likuminia. (Visa. 31:1-3) Kaha a tantekeya ngecize nga ka niungu vuino vangamba veni ci ka va lingisa ku singanieka ngue Yehova ka va hekele seho, muomu va pua mutamba ua vusoko vueni. Cili vene Yehova ua tu kulahesa ku tu  hana viose vi tu tonda cipue via mu lutsilielo ni vene via ku muvila, kaha tu li na vusunga ngecize a ka puisamo mpundu via na likuminia!—Mat. 6:30-33; 24:45.

15. (a) Visoti vika va lihitile navio vakua Kilistu va ku livanga? (b) Vusunga vuka tu hasa ku uana ku Visamo 37:18, 19?

15 Ku tantekeya ngecize Yehova ue ku puisamo vikulaheso vieni, ce ku tu lingisa ku tsiliela muli ikeye lika ambe tu hite mu visoti via vuhutu. Aci singaniekenu via solokele ku vakua Kilistu va ku livanga. Mu va putukile ku luisa cikungulukilo ca mu Yelusalema, “vose va sanduokele ku vanga vapostolo lika va salelemo.” (Vili. 8:1) Singaniekenu honi vika viezilemo. Visoti via ku hona vimbongo via putukile! Eci halumo ca lingisile vaze vakua Kilistu ku seza vindzivo kaha na vipanga viavo. Vunoni ambe ngoco, Yehova ka va sezele, va tualeleho ku mu pangela na ndzolela. (Vili. 8:4; VaHe. 13:5, 6; Tia. 1:2, 3) Mu ku linga Yehova ua kuasele vakua Kilistu va ku livanga, netu tu li na vusunga nguetu a tu kuasa.—Tandenu Visamo 37:18, 19.

KU PINDA NA VISOTI VIA VUKULUPE NI VUSINAKAZI

Ku tuala mana ku vize vi tu hasa ku linga nga tu na kulupa, ci ka tu hana vusunga ngecize Yehova kasi ua tu haka seho na ku haka seho ku cipanga ci tue ku mu lingila na lukakatela (Talenu vinanga 16-18)

16. Vika vi hasa ku tu lingisa ku limona ngue cipanga cetu ka cesi na seho kuli Yehova?

16 Nga tu na kulupa, halumo tu hasa ku singanieka ngecize tuli na ku linga via vindende mu cipanga ca Yehova. Muangana Ndaviti halumo neni mukemuo mua kele na ku livua omo mua kulupile.” (Visa 71:9) Vati Yehova a hasa ku tu kuasa?

17. Vika tu lilongesa ku viuma vi va lihitile navio vandumbuetu Jheri?

17 Aci talenu vi va lihitile navio vandumbuetu Jheri. Va va laniene ku ciuano ca hitile mu Ndzivo ya Vuangana ca handekele via ku vuahesa vindzivo vi ve ku lemesela vangamba va Yehova. Ua handekele ngueni: “Nji kasinakasi, nji ntuluue kaha naua na vimo vi nji zivuka vene viahi linga Yehova a nji pangese. Ku nja  kele na seho.” Ku vutsiki vuaco vaJheri va vundilile mu ku sokolola mutima uavo kuli Yehova. Lia mukuavo omo va ka hetele mu ku Ndzivo ya Vuangana, va lisosomuene nga cili vene ve ku vipuisilemo. Vunoni mu ku hita ca programa, umo muanetu ua hanene cimpande ua ntsindikile ngecize, vutongue vuetu vua seho vua pua cizango ca ku tava ku tu longesa kuli Yehova. VaJheri va vulukile nguavo: ‘‘Njili na cizango caco! Ngeci nja putukile ku lila, muomu nja muene ngecize Yehova ua ku mbuluile civundilo cange. Ua nji muesele ngecize nkuma kuli vimo via seho vi nja kala navio vi nja pandele ku hana, ngeci Yehova ua kele na cizango ca ku nji longesa!” Va vuezeleko naua nguavo: “Mu nja ka hetele ku ciuano nja lisosomuene na ku livua vungoco. Vunoni nja tundileko na ndzolela na ku livua ngecize nkuma nja kala na seho!”

18. Vati Mbimbiliya ya muesa ngecize Yehova a ka tualelelaho ku haka seho ku vize vi tu hasa ku mu lingila ambe nga tua kulupa?

18 Nga tu na ku kulupa, tua pande ku kala na vusunga ngecize Yehova kasi a hasa ku tu pangesa. (Visa 92:12-15) Yesu ua tu longesele ngecize ambe nga tue ku mona nguetu tue ku linga via vindende mu cipanga ca Yehova, kasi ua haka seho ku viose vi tue ku mu lingila cipue nga via vindende cikuma. (Luka 21:2-4) Ngeci mukemuo tualenu mana ku viuma vi mu hasa ku linga. Ca ku muenako, mu hasa ku lekako vakuenu via Yehova, ku kundika vamuanoko mu vivundilo na ku va kaniamesa va tualeleho ku kolesa lutsilielo luavo. Mua vusunga, vie ku lingisa Yehova ku mi mona ku pua vangamba veni, kati omo lia viuma vi mu hasa ku puisamo, vunoni cizango ci mua kala naco ca ku mu ononoka.—1 Kol. 3:5-9.

19. Vusunga vuka tu uana ku Loma 8:38, 39?

19 Tua vezika cikuma ku pangela Yehova, Njambi ue ku haka seho ku viose vi tue ku mu lingila! Ua tu tangelele ku linga cizango ceni, ngeci ku lemesa ca vusunga capua mutamba ua seho mu muono uetu. (Ku-So. 4:11) Ambe nga vakua mavu va tu mone vulinge vua ngoco, vunoni Yehova ke ku tu vuila ntsuamua. (VaHe. 11:16, 38) Nga tu hita mu visoti via cihindu, ku hona vimbongo ni ku kulupa, tua pande ku vuluka ngecize na vimo viahi vi hasa ku tu hangununa ku cilemo ca Tatetu ua muilu.—Tandeu Loma 8:38, 39.

^ cin. 5 Mua hitaho laza mu vitanga via mi lingisile ku livua vungoco ni? Vutumbe vua cino cilongesa ku mi vuluisa seho i mua kala nayo ku meso a Yehova. Kaha ci ka lombolola vati mu hasa ku livua ku pua va seho cipue nga mu hita mu vitanga viose ovio.

MUASO 30 Njambi Yange, Tata na Kavusamba