Skip to content

Skip to table of contents

Iya Muangana ua Vuangana vua Njambi?

Iya Muangana ua Vuangana vua Njambi?

Njambi ua tumine vakua ku soneka Mbimbiliya vavengi va soneke vitantekeyeso vi ka kuasa vantu ku tantekeya iya a ka pua Muangana ua Vuangana vua Njambi. Vitantekeyeso viaco evi:

  • Va ka mu hangula kuli Njambi. “Nji na tumbika muangana uange . . . kaha nji ka ku hia vakua vifuti mu ku pua vusuana vuove, Na haze ha lenga mavu mu ku pua vupite vuove.”—Visamo 2:6, 8.

  • A ka pua suana ya Muangana Ndaviti. “Muomu kuli etu kua semukila kakeke, kuli etu va na tu hie muana ua yala . . . Ku-vuezelela ca vunguvulu vueni na ca ciyulo ka ci ka hua, Ha citumamo ca Ndaviti, na ha vuangana vueni, Mu ku vu kolesa.”—Isaya 9:6, 7.

  • A ka Semukila mu Mbetelema. “Ove, Mbetelema . . . , kuli ove ku ka nji tuhukila umo ikeye a ka pua mukua ku sika . . . ikeye aka mana haze ha lenga mavu.”—Mika 5:2, 4.

  • Vantu va ka mu viana. “Va mu yenguile, na vantu va mu vianene. . . . Vunoni va mu tuile mbandu omo vivulumuna vietu, Va mu havuile [palakanene] mu vipi vietu.”—Isaya 53:3, 5.

  • Va ka mu sangula na ku mu haka ku vukama. “Muomu ko u ka seza muono uange ku Vukalo vua Vatsi; Cipue ko u ka tava uove mukua ku lela ku mona ku pola. . . . Mu livoko liove lia cilio mua kala ku viukilila ku miaka yose ya ya-ye.”—Visamo 16:10, 11.

Yesu Ikeye ua Fuila ku pua Muangana

Mu mavu ose, evi vitantekeyeso via litombola na muntu umo lika, Yesu Kilistu. Ngeci, umo kangelo ua lekele Maliya naye ya Yesu ngueni: “Njambi a ka mu hia citumamo ca vuangana ca ise Ndaviti, . . . Na vuangana vueni ka vu ka hua.”—Luka 1:31-33.

Yesu ka puile muangana mua kele ha mavu, houe. Muomu a ka sika vantu ku tundilila muilu mu ku pua Muangana ua Vuangana vua Njambi. Omo lia vika Yesu ua fuila ku pua Muangana? Tu hilulenu via lingile mua kele hano ha mavu:

  •   Ua hakele seho ku vantu. Yesu ua kuasele vantu va vifua na visemua viose, vanike, vakuluntu, vamala na vampuevo, ka talele ku vuhutu cipue vupite vuavo. (Mateo 9:36; Mako 10:16) Omo umo mukua mbumba ua mu lambelele ngueni: “Nga ua zange u hasa ku nji lelesa.” Yesu ua mu vuilile cikeketima kaha ua mu kanguisile.—Mako 1:40-42.

  • Yesu ua tu longesele vati tu hasa kuya Njambi ku mutima. Ngueni: “Ka mu hasa ku pangela Njambi na vufuko.” Ua handekele naua ngueni, tua pande ku lingila vakuetu, vize vi tua tonda vakuetu va tu lingilevio. Eci citume va ci luka nguavo Citume ca Olu. Ua muesele naua ngecize Njambi ke ku tuala lika mana ku vilinga vietu, vunoni na ku visinganieka vietu na cifua ci tue ku livuilamo ku mutima. Ngeci mukemuo linga tuye Njambi ku mutima, tua pande ku zangama na viuma vi tu tavesa mu mutima uetu. (Mateo 5:28; 6:24; 7:12) Yesu ua tsindikile ngecize linga tu hase ku kala na ndzolela ya vusunga, tua pande ku tantekeya via tonda Njambi kuli yetu kaha na ku lingamo.—Luka 11:28.

  • Yesu ua longesele vika ca lomboloka ku muesa cilemo. Mezi a Yesu na vilinga vieni via kele na ngolo kaha via kuatele vantu ku mitima. Ngeci “Vivunga vize via komokele ku longesa ceni: muomu ua va longesele ngue mukua ngolo.” (Mateo 7:28, 29.) Ua va longesele ngueni: “Lemenu vitozi venu.” Kaha neni vene ua lingilemo, muomu ua kundikile vaze va tondele ku mu tsiha mu civundilo, ngueni: “Tata, vecele ku vipi; viavo muomu ka vi tantekeyele evi vi va ku linga.”—Mateo 5:44; Luka 23:34.

Yesu na fuila cikuma ku pua Muangana ua mavu. Muomu ua kala na ngozi na vuhuanga. Vuno tangua lika a ka putuka ku sika?