Skip to content

Skip to table of contents

Hangulenu ku Kuasa Vuangana vua Njambi Ntsimbu Ino!

Hangulenu ku Kuasa Vuangana vua Njambi Ntsimbu Ino!

Aci singaniekenu nga livazi lia kama lili na ku iza, kaha Nguvulu i hana mutambi mu visandzi nguayo: “TINENU! TONDENU KUA KU VANDA!” Vati mu linga? Mua vusunga mu ka tonda cihela ca cili ku mu ka vanda.

Na vuno vene, tu vose hano ha mavu tua lavelela limo “livazi” lia kama. Yesu ua lukile livazi liaco ngueni “lamba ya kama cikuma.” (Mateo 24:21) Livazi liaco ka citava ku li tina. Vunoni ci tava ku vanda. Mu njila ika?

Mu cimpande ceni ca ha muncinda, Yesu Kilistu ua hele eci ci mamuna: “Ha katete lengeyenu vuangana vueni [Njambi], na vuviuke vueni.” (Mateo 6:33) Vati tu hasa ku lingamo?

Ha katete lengeyenu Vuangana vua Njambi. Eci ca lomboloka ngecize, tua pande ku tuameka Vuangana vua Njambi ku lutue lua viose. (Mateo 6:25, 32, 33) Omo lia vika? Muomu mavuangana a vantu ka hasa ku manusula visoti via vantu. Vunoni Vuangana vua Njambi vukevuo lika vu ka puisamo eci cipanga ca ci kalu.

Lengeyenu vuviuke vueni. Tua pande ku linga cose tu yoye muaya masiko na vitume via Njambi. Omo lia vika? Muomu ku sembulula masiko aco na ku linga muose mua na zange muntu, via pua ku li hindila cihilo. (Visimo 16:25) Vunoni nga tu yoya muaya vitume viaco, ka tu kayi lika Njambi ku mutima, vunoni netu vavene tu ka yoya vuino.—Isaya 48:17, 18.

Ha katete lengeyenu vuangana vua Njambi na vuviuke vueni. Yesu ua mamuine ngueni vamo va ka hasa ku tanguka, mu ku singanieka nguavo ku kala na vimbongo via vingi ce ku neha ku lembama. Vamo ve ku ecelela visoti via muono vi va lemuuise  mu cifua ca ku linga, ka va kele naua na ntsimbu ya ku lengeya Vuangana vua Njambi.—Mateo 6:19-21, 25-32.

Vunoni, Yesu ua kulahesele ngecize vaze ve ku hakuila Vuangana vua Njambi, Njambi a ka va hana viose vi ve ku tonda mu muono lelo lino kaha na vivezikiso via ya-ye ku lutue.—Mateo 6:33.

Vutuhu vandongesi va Yesu ku sekulu ya ku livanga, va kele na ku lengeya Vuangana vua Njambi ha katete, visoti na lamba via tualeleleho. Vunoni va uanene vutinino. Vati omuo?

Va niungile vitume via mu Mbimbiliya, kaha eci ca va niungile ku visoti vi va lihitile navio vaze va sembuluile vitume via Njambi. Lutsilielo lua kama lu va kele naluo ngecize Vuangana vua Njambi tangua vu keza, lua va kuasele ku pinda na visoti via ku linga na ha meso vui. Kaha Njambi ua va hele “ngolo ya ku hiana cikumakuma” linga va hase ku kolesa.—2 Kolintu 4:7-9.

NENU MU PUTUKA KU LENGEYA VUANGANA HA KATETE NI?

Vakua Kilistu ku sekulu ya ku livanga vononokele lisiko lia Yesu kaha ha katete va lengeyele Vuangana vua Njambi. (Kolose 1:23) Kuli vamo ve ku lingamo lelo ni?

Eyo! Vakaleho va Yehova va nongonona ngecize tuli ku matangua a ku kotokela, vuovuno Vuangana vua Njambi vu ka nongesa ano mavu. Ngeci ve ku linga cose mu ku puisamo aa mezi a Yesu: “Kaha zimpande ezi vene zia cili zia vuangana va ka zi ambulula ku vifuti viose, zi ka pua vukaleho vua kuli vakua vifuti viose; amba vuose ku-kotoka ca mavu ci keza.”—Mateo 24:14.

Nenu mu tava muzimbu ua cili ni? Tua mi vundila mu tambuluise vakua mbonge ya laza ya Mbeleya, ku Masendonia. Mu va vuile muzimbu ua cili ua Vuangana kuli kapostolo Paulu, va tavele muzimbu uaco “na mutima ua ku viuka.” Mu nima yaco “va hiluile visoneka” va mone nga viuma vi va vuile kuli Paulu via puile via vusunga, kaha va putukile ku ononoka vize vi va lilongesele.—Vilinga 17:11, 12.

Nenu mu hasa ku lingamo. Nga mu lengeya Vuangana vua Njambi na vuviuke vueni, mu ka uana vutinino mu ntsimbu ino na ku lavelela vivezikiso via ya-ye ku lutue.