Skip to content

Skip to table of contents

Lihanguilenu Muono Uenu ua ku Lutue!

Lihanguilenu Muono Uenu ua ku Lutue!

VUNO CITAVA MU LIHANGUILE MUONO UENU UA KU LUTUE NI? Vantu vamo va tsiliela nguavo, muono uavo va va sonekelauo laza, ka citava va lihanguile. Mu ve ku hona ku puisamo vizango viavo, ve ku likela na ku handeka nguavo. “Evi ka va nji sonekelelevio!”

Vamo ve ku limona vungoco omo lia ku hona vutuhukilo mu tuyando na mapakeso a mu mavu ano. Halumo va seteka ku alulula miono yavo, vunoni mu ve ku limuena ndzita, vumbanditu, viyovo via mavu na mavezi vi tangula vizango viavo. ve ku handeka nguavo. ‘Na seho yahi!’

Mua vusunga viuma nga via aluluka mu muono, vie ku kuata ku vizango vietu. (Ekelesiaste 9:11) Vunoni, ku tuala ha muono uenu ua yaye ua ku lutue, mu hasa ku lihanguila. Mua vusunga, Mbimbiliya ya muesa ngecize nenu mu hasa ku lihanguila muono ua ku lutue. Talenu vi ya handeka.

Mosesa, ua puile ntuamena ua vaIsaleli, ku laza ua lekele vantu tele kanda va kovele mu Cifuti ca va Kulahesele Njambi Ngueni: “Nji na hake ku meso ove muono na ku-tsa, civezikiso na cisingo; ngoco vene hangula muono linga u yoye yove na mbuto yove; mu ku lema Yehova Njambi yove, ku ononoka ku lizi lieni, na ku mu kakatela.”Ndeutelonomi 30:15, 19, 20.

“Nji na hake ku meso ove muono na ku-tsa civezikiso na cisingo ngoco vene hangula muono linga u yoye.”​—Ndeutelonomi 30:19

Cili! Njambi ua patuile vaIsaleli mu vundungo ku Ingito kaha va lavelele ku ka yoya muono ua ndzolela mu cifuti ca va kulahesele. Vunoni evi viose ka vie ku lisolokele ngoco. Va pandele ku “hangula muono.” Vati omuo? ‘Mu ku lema Yehova Njambi yavo, ku ononoka ku lizi lieni, na ku mu kakatela.’

Na ku ntsimbu ino, kasi citava mu lihanguile, kaha viose vi mu hangula ku linga via kuata ku muono uenu ua ku lutue. Nga mu hangula ku lema Njambi, ku halakana lizi lieni na ku mu kakatela, mu ka hangula muono—cili, Muono ka ue hua ha mavu miaka yose. Vunoni vinanga vika mua pande ku kava linga mu vi puisemo?

HANGULENU KU LEMA NJAMBI

Cilemo ca pua cifua ca Njambi ca kama. Kapostolo Yoano va mu huiminine ku soneka ngecize “Njambi ikeye cilemo.” (1 Yoano 4:8) Ngeci mukemuo cipue Yesu mu va mu hulile via lisiko lia kama, ua kumbuluile ngueni: “U ka lema muangana Njambi yove na mutima uove uose, na muono uove uose, na mana ove ose.” (Mateo 22:37) Vusamba vua vusunga na Yehova Njambi ka vua pandele ku hitukila ha vuoma ni ku mu ononoka ku ndzimba, houe. Vunoni ha cilemo mpundu. Omo lia vika honi tua pande ku hangula ku mu lema?

Cilemo ca Yehova ku vana veni ca pua ngeci mua ca umo cisemi ua cilemo. Vutuhu visemi va ku hona ku tantuluka ve ku longesa, ku kaniamesa, ku kuasa, na ku sungamesa vana vavo muomu va tonda va yoye vuino. Vika co visemi ve ku lavelela ku vana? Va tonda vana vavo va va leme na ku niunga viose vi ve ku va leka linga va kale mua cili. Mu ku mona cenu, Tatetu ua muilu ua ku tantuluka kati na pande ku lavelela tu muese ku santsela na seho ku viose vie ku tu pangela ni?

 HALAKANENU LIZI LIENI

Mu lilimi li va sonekele Mbimbiliya, lizi “ku halakana” lia lombolola naua “ku ononoka.” Ca pua ngue mumo vene nga mu leka muana ngueni “Halakana visemi vove?” Ngeci mukemuo, ku halakana kuli Njambi ca pua ku lilongesa na ku niunga mezi eni. Mu ku linga ka tu hasa ku ivua mpundu lizi lia Njambi, tu hasa ku mu halakana mu ku tanda na ku ononoka Lizi lieni Mbimbiliya—1 Yoano 5:3.

Yesu ntsimbu imo ua handekele vimo via muesa seho ya ku halakana lizi lia Njambi mua handekele ngueni: “Kati mbolo lika i yoyesa muntu, vunoni na mezi ose a ku fuma mu kanua ka Njambi.” (Mateo 4:4) Ngeci mua seho ya via kulia via ku muvila ua ntsitu, Lizi lia Njambi lia hiana seho. Omo lia vika? Muangana Solomone ua sonekele ngueni: “Mangana a na pu vungami [ ni eku niunga] ngue zimbongo mu zie ku pua vungami [ni ku niunga] vunoni ku hiana cikuma ca mana cikeco eci, omo mangana a niunga muono uo uze ali nao.” (Ekelesiaste 7:12) Mana na Mangana a ku tunda kuli Njambi a hasa ku tu niunga ntsimbu ino na ku tu kuasa ku hangula viuma na mana vi ka tu tuala ku muono ua ya ye.

KAKATELENU KULI IKEYE

Mu vuluka cisimo ca tele Yesu ci tua tumbula mu cimpande ci na hiti ni? Ua handekele ngueni: “Mbelo ya indende na njila ya lisuata, ya ya ku muono, kaha va vandende lika va i uana” (Mateo 7:13, 14) Tu hasa lika ku endela vuino mu njila yaco, nga tuenda hamo na mundambo a i tantekeya linga tu ka hete ku tu ya—ku muono ua ya ye. Ngeci mukemuo, kuli vusunga vua vuingi vua pande ku tu lingisa ku suena mu hiehi na Njambi. (Visamo 16:8) Vati tu hasa ku lingamo?

Nkala litangua, kuli viuma via vingi vi tua tonda ku linga kaha na vimo vi tua lema ku linga. Evi viuma viaco, vi hasa ku mi lia ntsimbu ya kama ni ku mi tangula ni halumo ku mi honesa ntsimbu ya ku linga viuma via tonda Njambi. Ngeci mukemuo Mbimbiliya ye ku tu vuluisa nguayo: “Ngoco vene talenu ngecize mu ende na ku zangama, kati ngue visiname, vunoni ngue vakua mangana; Lilandelienu ntsimbu, muomu matangua ano a api.” (Efeso 5:15, 16) Tu ka suena mu hiehi na Njambi nga tu puisa vusamba vuetu neni ku pua vua seho ya kama cikuma mu muono.—Mateo 6:33.

YENI MU LIHANGUILA

Mua vusunga, viahi mu hasa ku linga mu alulule via ku nima, vunoni mu hasa ku ka yoya muono ua cili ku lutue na vantu va mua lema. Mbimbiliya nguayo, Tatetu ua muilu, Yehova Njambi, ua tu lema cikuma, kaha ue ku tu leka viuma via tonda tu linge. Tenu mezi a handekele kapolofeto Mika:

“Na ku lekesa, A muntu, cize ca viuka; kaha Yehova na ku tumbuila vika, vunoni ku linga vuoloke, na ku lema ngozi, na ku enda na ku konkama hamo na Njambi yove?”Mika 6:8.

Nenu mu tava cilanio ca Yehova linga muende neni mu ka tambule vivezikiso via na tulikila ve kuenda neni ni? Yeni mu lihanguila!