Skip to content

Skip to table of contents

 CIMPANDE CA HELU | KULIHI MU HASA KU UANA KU-LEMBEZIEKA?

Tu Vose Tua Tonda ku tu Lembezieka

Tu Vose Tua Tonda ku tu Lembezieka

Mu vuluka ntsimbu imo ku vunike mu mua livulumuine? Halumo mu mua uile mua lituile mbandu ni ku tungunuka livuli. Mu vuluka vati va noko va mi lembeziekele ni? Halumo va mi kusile ha mbandu na ku mi kutaho. Vutuhu mua lilile, vunoni va mi vumbatelele na ku mi lembezieka kaha mua livuile vuino. Mua vusunga, ku ntsimbu yaco ku lembezieka ca kele mu hiehi ntsimbu yose.

Vunoni muono ue ku kaluua cikuma omo tu ya na ku kola. Visoti vietu vi ya na ku livuezelela, vunoni ua ku tu lembezieka uahi. Vitanga via mu vukuluntu, via vikalu ku vi lombolola, ka citava ku vi manusula lika mu ku vumbatela ca visemi na mezi avo a mu kanua. Aci talenu aa malungano.

  • Mua hitaho laza mu visoti via ku mi tundisa ha vipanga ni? Va Julian nguavo mu va va fumisile ha vipanga, va livuile vungoco. Va lihuile nguavo ‘Vati nji tala vakua ndzivo yange?’ ‘Mu pue miaka i nji na panga, vika va li na ku nji muena vulinge vua ngoco?’

  • Halumo mu li na ku hita mu vitanga muomu vulo vuenu vu na pihia. Va Raquel va handekele nguavo, “Omo yaliange ua nji sile ca ku hona ku nji sika vingonde 18 ku nima, nja vuile vusiua vua kama. Nja vuile ngue mutima uange ua litepe ha kati, nja vuile ku vavala ha muvila na mu visinganieka. Nja kele na liova.”

  • Halumo mu li na ku lua na vuvezi vua kama, ku vu mona ngue ka mu kanguka. Ntsimbu imo, mu hasa ku livua ngue Yombi, ua liniengele ngueni: “Nji zinda muono uange; ka nji hianga ku yoya ntsimbu yose.” (Yombi 7:16) Ni halumo mue ku livua ngue va Luis va li na miaka 80 va handekele nguavo: “Ntsimbu imo nje ku ivua lika ngue nja vandamena ku-tsa.”

  • Citava halumo ku-tsa ca muntu u mua lema cikuma ce ku mi lingisa ku tonda ku mi lembezieka. Va Robert va handekele nguavo: “Muanange mua tsile ku mponde ya mu ndeke, ha katete ka nja tavele, kaha mu nima nja vuile ku vavala ci va setekesa mu Mbimbiliya nguavo mukuale u ka tuva mutima uove.”—Luka 2:35.

Va Robert, va Luis, va Raquel, na va Julian va uanene ku lembezieka mu vintsimbu vize via ku kaluua. Va va lembeziekiele kuli Umo ua hiana ngozi— ueka uahi Njambi ua Ngolo Yose. Vati ue ku lembezieka? Vuno citava nenu a mi lembezieke ni?