Skip to content

Skip to table of contents

Ku Yoya Vuino na Vusoko na Vavusamba

Ku Yoya Vuino na Vusoko na Vavusamba

Vantu vavengi ce ku va kaluuila ku likuata vusamba vua cili na vusoko ni vavusamba vavo. Talenu vimo vitume via mu Mbimbiliya vi hasa ku mi kuasa ku yoya vuino na vakuenu.

TUAMEKENU VAKUENU

CITUME CA MU MBIMBILIYA: “Na umo uahi a yongole vieni ivene, vunoni enu vose vize via vakuenu.”​—⁠Filipu 2:4.

VI CA LOMBOLOKA: Tu ka likata mua cili na vakuetu nga tu tuala mana ku viuma vi tu hasa ku va lingila kati vi va tu lingila lika vakevo. Ku lituala cikuma mana etu vavene ce ku tsiha vusamba na vakuetu. Ca ku muenako, muntu ua ambata ni ua somboka nga ua tuala cikuma mana ku vizango vieni lika, citava mu nima ya ntsimbu a hasa kuenda mukua ndzivo yeni vungungu. Cikuavo naua na umo uahi ua zanga ku kala na kavusamba ue ku lihalesa na viuma via li navio ni ua handeka lika vize via tantekeya. Limo livulu ngualio: “Vaze ve ku lituala cikuma mana kaha ka ve ku singanieka vakuavo, ve ku kala na visoti via vingi.”

VI MU HASA KU LINGA:

  • Kuasenu vakuenu. Vavusamba va cili va likulahela umo na mukuavo kaha ve ku likuasa. Vamo vakua ku tondesesa mizimbu nguavo, vantu va lema ku kuasa vakuavo ka ve ku vavala litima kaha va kala na ciyulo mu mutima.

  • Kalenu na cikeketima. Cikeketima ca pua kuivua ku vavala cevua mukuetu ni nguetu ku lihaka mu cihela ceni. Kaha naua nga tu kala na cikeketima ka tu ka seseka ni ku lenia vakuetu na vutumbe vua ku va vuisa ku vavala ha mutima.

     Nga tu pua vakua cikeketima, tu ka kala na lukakatela na vakuetu. Kaha naua cikeketima ci ka tu kuasa ku kala na vavusamba va ku visemua via ku liseza-seza ca ku hona ku muesa kahangu.

  • Sikamenu na vakuenu. Nga mu pua na ku sikama na vakuenu mu ka va tantekeya vuino. Kaha nga mu tonda ku kala na kavusamba ua cili, mua pande ku uana ntsimbu ya ku sikama neni na ku simutuila viuma via seho kuli ikeye. Ngeci mukemuo, puenu na ku halakana vuino kavusamba kenu na ku haka seho ku viuma via mi leka. Cikuavo naua mizimbu ya vuovuno ya muesa ngecize “ku simutuila ca cili ce ku neha ndzolela.”

HANGULENU NA MANA VAVUSAMBA

CITUME CA MU MBIMBILIYA: “Vusamba vua vupi vu pihisa vilika [ni vilinga] via cili.”​—⁠1 Kolintu 15:33.

VI CA LOMBOLOKA: Vantu va mu likata navo va hasa ku mi lingisa ku kala na vilinga via cili ni via ku vihia. Kaha vakua ku lilongesa via vilinga via vantu nguavo, vavusamba va hasa ku alulula via vingi mu muono uetu. Ca ku muenako nga mu kala ha kati ka vantu vakua ku sipa ni halumo umo na tsihi vulo, nenu citava mu hasa ku putuka ku sipa ni ku tonda ku tsiha vulo vuenu.

VI MU HASA KU LINGA: Likatenu vusamba na vantu va kala na vifua ni vilinga via cili vi mu hasa ku tambuluisa. Ngeci mua vantu va kala na kasingimiko, vakua ngozi na vihuanga.

VITUME VIKUAVO VIA MU MBIMBILIYA

Talenu vivideo viemana ha Mbimbiliya vi va tuhula mu ku kuasa vaze va liambata, vakuendze na vahumbe kaha na vanike linga va yoye vuino mu vusoko

KATI MU HANDEKE VIUMA VI VAVALESA VAKUENU.

“Lilimi lia vakua mangana likelio cihindu.”​—⁠VISIMO 12:18.

PUENU VIHUANGA.

“Mukua ku hana-hana a ka hindala.”​—⁠VISIMO 11:⁠25.

YOYENU NA VAKUENU NGUE MU MUA TONDA VA YOYE NENU.

“Ngoco vene viuma viose mu hianga vantu va mi lingilevio, mukemuo vene va lingilienuvio enu naua.”​—⁠MATEO 7:12.