Skip to content

Skip to table of contents

 CILONGESA 1

Vivezikiso vie ku iza mu ku Lipokuesa

Vivezikiso vie ku iza mu ku Lipokuesa

KU LIPOKUESA CA PUA VIKA?

Ku lipokuesa ca pua vuhasi vua

  • ku tula mutima

  • ku lisimpitika

  • ku manusula viuma ha ntsimbu yavio ambe nga ka tua zangele ku vi linga

  • ku tuameka vizango via vakuetu

OMO LIA VIKA KU LIPOKUESA CA TONDEKA?

Vanike va ku lipokuesa ve ku vula ntsindiye ya ku linga via ku vihia, ambe nga vi soloka ngue via cili. Cikuavo naua, vanike va ku hona ku lipokuesa ve ku

  • pua vakua luozi

  • vavala litima

  • likovelesa mu ku sipa, ku nua vuala, ni ku pangesa vidroga

  • lia njanja ni ku kala na mutupu

Umo muzimbu nguauo, vanike vakua ku lipokuesa mu ve ku kola, ve ku kala na visoti via vindende ku tuala ha cihindu na ku niunga vimbongo, kaha ce ku va asiuila ku ononoka masiko a mu cifuti. Kuliya nou muzimbu, Mulongisi Angela Duckworth ua ku Universidade ya ku Pensilvania ua handekele ngueni: “Ku lipokuesa ka ca puile ca ku vihia.”

MUA KU LONGESELA VANA VA PUE VAKUA KU LIPOKUESA

Puenu na ku viana kaha na ku puisamo mezi enu.

CITUME CA MU MBIMBILIYA: “Vihandeka vienu vi pue ngecize, Eua, eua; Houe, houe.”​—Mateo 5:37.

Vanike ve ku eseka visemi mu ku lindiangola ni ku niamuna—ambe vene ha mbunga. Kaha nga visemi va va hana viose vi va tonda, vanike va ka nangama ku lingamo ntsimbu yose nga va tonda vimo.

Cikuavo naua, nga visemi va viana vimo na ku puisamo mezi avo, kanike a ka lilongesa cuma ca seho mu muono—ka tu hasa ku kala na viose vi tu tonda. Ndotolo David Walsh ua sonekele ngueni: “Vantu ve ku kala na viose vi va tonda linga vevue ndzolela, vunoni ka ve ku kala mpundu nayo.” Kaha “ca pua vuhenge ku ecelela vana va kole mu ku singanieka nguavo citava va kale na viose vi va tonda.” *

 Ku vindika kanike ni ku viana ku mu hana vimo ci ka mu kuasa ku lipokuesa mua ka kola, ca ku muenako, a ka hasa ku viana ku pangesa vidroga, ku linga vupangala ni viuma vikuavo via ku pihia.

Kuasenu vana venu vevuisise vie kuiza mu ku linga via cili ni via vipi.

CITUME CA MU MBIMBILIYA: “Viose vize vie ku kuna muntu, vikevio via li ka tia naua.”​—Ngalata 6:7.

Muanenu na pande ku ivuisisa ngecize mu vilinga vietu mue ku iza vimo, kaha ku hona ku lipokuesa ce ku koka lika luvinda. Ca kumuenako nga muanenu ue ku niengua vuasi, ci ka lingisa vantu ku mu sondoloka. Cikuavo naua nga a pua ua ku lipokuesa ambe nga va na mu sangumuna, ni ku pua mukua lukakatela, vantu va ka lema ku likata neni. Kuasenu vana vevuisise ngecize va ka yoya muono ua cili nga va pua va ku lipokuesa.

Longesenu vana va tantekeye vika via hiana seho.

CITUME CA MU MBIMBILIYA: ‘Tantekeyenu viuma vize via hiana ku viuka.’​—Filipu 1:10.

Ku lipokuesa ce ku tu ohiela ku via ku vihia; na ku tu sindiya ku linga viuma ka tuesi na cizango ca ku vi linga vutuhu via tondeka. Vana va tondeka ku va longesa ku tuameka viuma via hiana seho na ku vi puisamo. Ca ku muenako, ha katete na pande ku manusula vipanga vi va na mu tumu ku sikola, amba vuose aye mu kueha.

Puenu lungano lua cili.

CITUME CA MU MBIMBILIYA: “Nji na mi hie cimueso, linga enu mu ka linge ngue omo nji na lingi nenu.”​—Yoano 13:15.

Muanenu ue ku mona vati mue ku linga nga kua soloka vimo via mi luvalesa. Muana na pande ku muena ku lungano luenu ngecize ku lipokuesa ce ku lingisa viuma ku enda vuino. Ca ku muenako, nga muanenu a mi sangumuna linga a mone lukakatela luenu, vuno mue ku tenuka vuasi ni mue ku lisimpitika?

^ cin. 20 Va vi tundisa mu livulu Não: Por Que Crianças—de Todas as Idades—Precisam Ouvir Isso e Como os Pais Podem Dizer “Não.”