Skip to content

Skip to table of contents

 Mutamba 9

Lemesenu Yehova mu Vusoko

Lemesenu Yehova mu Vusoko

“Lemesenu uze ua tangele lilu na mavu.”​—Ku-Solola 14:7

Ngue mu mu na lilongesa mu mukanda uno, Mbimbiliya ya kala na vitume via vingi vi hasa ku mi kuasa na vakua ndzivo yenu. Yehova a tonda mu kale na ndzolela. Ikeye ua likuminia ngueni nga mu tuameka ku-lemesa ceni, “a ka mi vuezelelako viuma vikuavo viose.” (Mateo 6:33) A tonda mpundu mu pue kavusamba keni. Yose ntsimbu i mu uana i pangesenu mu ku kolesa vusamba vuenu na Njambi. Ka kuesi ku vezika ca kama ca hiana eci.​—Mateo 22:37, 38.

 KOLESENU VUSAMBA VUENU NA YEHOVA

MBIMBILIYA NGUAYO: “‘Kaha nji ka pua Isuenu, Nenu mu ka pua vana vange va vamala na . . . va vampuevo, mukemuo mua na handeka Muangana” Yehova. (2 Kolintu 6:18) Njambi a tonda mu pue kavusamba keni ua ha mutima. Njila imo i ka mi kuasa ku lingamo, ya pua ku vundila. Yehova na mi lania ngueni “vundilenu na ku huima cahi.” (1 Tesalonika 5:17) Ikeye ua kala na cizango ca ku mona vili mu mitima yenu na visoti vi mu lua navio. (Filipu 4:6) Nga mu vundila na vakua ndzivo yenu, va ka mona nguavo nkuma Njambi ua pua ua vusunga kuli enu.

Omo mu handeka na Njambi, mua pande ku mu halakana. Mu hasa ku lingamo mu ku lilongesa Lizi lieni na mikanda ya vakua Kilistu. (Visamo 1:1, 2) Puenu na ku singanieka ha vize vi mue ku lilongesa. (Visamo 77:11, 12) Mua pande ku kunguluka ntsimbu yose linga mu ivuilile Njambi.​—Visamo 122:1-4.

Njila ikuavo i mu hasa ku kolesa vusamba vuenu na Yehova ya pua ku ambulula. Ku tualelelaho ku ambulula, ci ka mi kuasa ku suena mu hiehi na Njambi.​​—Mateo 28:19, 20.

VI MUA PANDE KU LINGA:

  • Tondenu ntsimbu ya ku tanda Mbimbiliya na ku vundila tangua na tangua

  • Tuamekenu via Njambi ku lutue lua viose ha ndzivo yenu

2 TOVALESENU KU LEMESA CA MU VUSOKO

MBIMBILIYA NGUAYO: “Suenenu kuli Njambi, kaha ikeye a ka suena kuli enu.” (Tiango 4:8) Mua pande ku soneka programa ya ku lemesa mu vusoko ntsimbu yose. (Njenisisi 18:19) Vunoni kuli vikuavo naua vitondeka. Mu na pande ku tuameka Njambi mu muono uenu tangua na tangua. Kaniamesenu vusamba vua vusoko vuenu na Njambi mu ku simutuila vieni ‘omo mu tumama mu ndzivo yenu, nomo mu enda mu njila, nomo mu kosa nomo mu hinduka.’ (Ndeutelonomi 6:6, 7) Lihakelenu kapandi ngeci mua Yehosua ua handekele ngueni: “Ange ni na ndzivo yange, tu ka pangela Yehova.”​—Yehosua 24:15.

VI MUA PANDE KU LINGA:

  • Kalenu na programa ya ku kuasa muntu ku muntu ha ndzivo yenu