Skip to content

Skip to table of contents

 Mutamba 2

Litsilielenu Umo na Mukuavo

Litsilielenu Umo na Mukuavo

“Ngoco vene ava Njambi na va pandakana muntu kati aka va hangunene.”—Mako 10:9

Yehova ua tu sika ngueni: “Kati mu linge vungungu.” (Malakiya 2:16) Eci ca pua ca seho mu vulo, muomu mu vulo nga muli vungungu vaze va liambata ka va hasa ku likulahela umo na mukuavo. Kaha ku litsiliela umo na mukuavo ca pua ca seho mu ku kolesa cilemo.

Kuli viuma via vingi vili na ku pindisa malo, matangua ano. Linga mu kolese vulo vuenu, mua pande ku lihakela kapandi ka ku linga viuma vivali.

 TUAMEKENU VULO VUENU KU LUTUE

MBIMBILIYA NGUAYO: ‘Tantekeyenu viuma vize via hiana ku viuka.’ (Filipu 1:10) Vulo vuenu vua pua cimo ca viuma via seho ya kama mu muono uenu. Mua pande ku vu tuameka ku lutue.

Yehova a tonda mu hake mana kuli mukua ndzivo yenu na ku ‘yoya hamo mu ndzolela.’ (Ekelesiaste 9:9) Ua muesa ha toma ngecize ka mua pandele ku mbila mukua vulo vuenu ku mukulo, vunoni lengeyenu vize vi mi nehela ndzolela umo ku mukuavo. (1 Kolintu 10:24) Lingisenu mukua ndzivo yenu a mone ngueni ua kala na seho ya kama kuli enu.

VI MUA PANDE KU LINGA:

  • Tondenu ntsimbu ya ku kala hamo na mukua ndzivo yenu, tualenu mana kuli ikeye lika

  • Puenu na ku singanieka mu “yetu” kati “yange”

 2 NIUNGENU MUTIMA UENU

MBIMBILIYA NGUAYO: “Uose a tala mpuevo na lisungu, na lingi neni laza vupangala mu mutima ueni.” (Mateo 5:28) Nga muntu ua kala mu vulo a liecelela ku singanieka via vupangala, ci na pu vene ngue na ka limona na muntu ueka.

Yehova ngueni ua pande ku “niunga mutima uove.” (Visimo 4:23; Yelemiya 17:9) Linga mu hase ku niunga mutima noho mu niunge meso enu. (Mateo 5:29, 30) Kavenu lungano lua Yombi, uze ua lingile litavasiano na meso eni ngueni ka ka tala mpuevo ueka na lisungu. (Yombi 31:1) Kati mu tave na limo litangua liahi ku tala via vuntselentsele. Kaha lihakelenu kapandi ka ku viana ku likata cikuma na nkala muntu mukua vilio vieka.

VI MUA PANDE KU LINGA:

  • Muesenu ku vose ngecize mua ambata ni mua somboka

  • Hakenu seho ku visinganieka via mukua ndzivo yenu, kaha likelenu nkala vusamba vu hasa ku katula lifuua