Skip to content

Skip to table of contents

 KAPITULU 19

Kalenu mu Hiehi na Yehova

Kalenu mu Hiehi na Yehova

1, 2. Kulihi tu hasa ku uana vutinino matangua ano?

ACI singaniekenu nga mu li na ku enda mu njila kaha ku soloka luhundzi lua kama. Kuilu kuose vui. Mihiato i putuka ku hiatula na miziviliko kaha niondzi i putuka ku noka. Mua vusunga mu ka tonda cihela linga mu vande. Kaha mu ka viukilila cikuma nga mu uana cihela ca cili kaha ca kuma, ni vati?

2 Matangua ano tuli na ku yoya mu ntsimbu ya ikalu ngeci mueyi. Viuma ha mavu vi li na ku pihia cikumakuma. Halumo mue ku lihula nguenu ‘Kulihi nji hasa ku uana vutinino? Mu Mbimbiliya, mukua visamo ua sonekele ngueni: “Nji ka tumbula Yehova nguange, ‘Ikeye vutinino vuange na mbonge yange; Njambi yange, i nja tsiliela.’” (Visamo 91:2) Mua vusunga, Yehova a hasa ku tepulula visoti vietu, na ku tu hana lulavelelo lua cili ku lutue.

3. Vati tu hasa ku puisa Yehova vutinino vuetu?

3 Vati Yehova a hasa ku tu niunga? A hasa ku tu kuasa mu visoti vietu muomu ua kala na ngolo ku tuvakana uose a tonda ku tu vulumuna. Cipue nga viuma via ku pihia vi tu solokela mu ntsimbu ino, tu hasa ku kala na vusunga nguetu Yehova a ka vi sungamesa ku lutue. Mbimbiliya ya tu mamuna nguayo: “Kalenu mu cilemo ca Njambi.” (Yunda 21) Tua pande ku kala mu hiehi na Yehova linga tu tambule vukuasi vueni nga tu hita mu visoti. Vati tu hasa ku lingamo?

TAVENU KU CILEMO CA MI MUESA NJAMBI

4, 5. Vati Yehova ua tu muesa cilemo ceni?

4 Linga tu kale mu hiehi na Yehova tua pande ku singanieka  vati Ikeye na muesa cilemo ceni kuli etu. Aci singaniekenu ha viuma viose via tu hana Yehova. Ua tu hana mavu a ku sula na viuma via ku vuaha kaha na tusitu vavengi. Ua sulisaho na via-ku-lia via ku tovala kaha na mema a cili a ku nua. Ua tu lekesa naua lizina lieni na vifua vieni via cili mu Mbimbiliya. Kaha helu lia viose evi, ua tu lekesa naua cilemo ceni mu ku tuma Muaneni Yesu ha mavu a ku tu tsile. (Yoano 3:16) Kaha omo lia cikombelo ca Muaneni tuli na lulavelelo lua cili lua ku lutue.

5 Yehova ua tumbika Vuangana vua Mesiya, nguvulu ya muilu ize i ka manusula tuyando tuose vuovuno. Ovu Vuangana vu ka puisa mavu citungu mu tu ka yoya miaka yose mu ciyulo na ndzolela. (Visamo 37:29) Njila ikuavo ya na tu muesa Yehova cilemo ceni ya pua ku tu longesa vati tu hasa ku yoya mua cili ntsimbu ino. Ua tu lania naua tu pue na ku vundila kuli ikeye muomu ue ku halakana vivundilo vietu ntsimbu yose. Mua vusunga, Yehova ua muesa mpundu cilemo ceni ku vantu vose.

6. Vati mu hasa ku tava ku cilemo ca mi muesa Yehova?

6 Vati mu hasa ku tava ku cilemo ca tu muesa Yehova? Mu ku muesa ngecize mua santsela ku viose via mi lingila. Vunoni ce ku vuisa vusiua ku mona ngecize, cingi ca vantu ka ve ku santsela. Cipue ku matangua a Yesu ku via kele. Ntsimbu imo, Yesu ua kanguisile vakua mbumba va ku pua likumi, vunoni umo lika ua ile ku ka mu santsela. (Luka 17:12-17) Tu tonda ku pua ngeci mua uze yala ua santselele Yesu. Ntsimbu yose tua pande ku santsela Yehova.

7. Vati tua pande ku lema Yehova?

7 Tua pande naua ku muesa cilemo cetu kuli Yehova. Yesu ua lekele vandongesi veni ngecize va na pandele ku  lema Yehova na mitima yavo yose, na miono yavo yose, na mana avo ose. (Tandenu Mateo 22:37.) Vika a lomboloka aa mezi?

8, 9. Vati tu hasa ku muesa Yehova nguetu tua mu lema?

8 Vuno ku handeka nguetu tua lema Yehova cikeco lika ci tondeka ni? Houe. Nga tua lema Yehova na mutima uose, na muono uose kaha na mana ose, tu ka muesa cilemo cetu kuli ikeye mu vilinga. (Mateo 7:16-20) Mbimbiliya nguayo nga tua lema Njambi, tu kononoka masiko eni. Vuno ca pua ca cikalu ni? Houe, muomu masiko a Yehova “kati a akalu.”​—Tandenu 1 Yoano 5:3.

9 Nga tu ononoka Yehova, tu ka kala na muono ua cili na ndzolela. (Isaya 48:17, 18) Vunoni vika vi tu kuasa ku kala mu hiehi na Yehova? Tu vi tantekeyenu.

TUALELENUHO KU SUENA MU HIEHI NA YEHOVA

10. Omo lia vika mua pande ku tualelelaho ku lilongesa via Yehova?

10 Vati mua likuata vusamba na Yehova? Ku hitila mu ku longesa Mbimbiliya, mu na hasa ku tantekeya mua cili Yehova kaha mu na likuata vusamba neni. Ovu vusamba vu na pu ngue tuhia tu mua pande ku sambeya ntsimbu yose. Ngeci mua tuhia tue ku tondeka ku tu sambeya linga kati tu zime, mua pande ku tualelelaho ku lilongesa via Yehova linga vusamba vuenu vu kole.​—Visimo 2:1-5.

Cilemo cetu kuli Yehova ca pua ngue tuhia, tua pande ku ci sambeya linga ci tualeleleho ku sukuma

11. Vati vilongesa via Mbimbiliya vi hasa ku mi kuasa?

11 Omo mu ka tualelelaho ku lilongesa Mbimbiliya, mu ka tantekeya viuma via vingi vi ka mi ya ku mutima. Tu talenu vati vandongesi vavali va Yesu va vuile omo Yesu ua kele na ku va lomboluela vumo vupolofeto vua mu Mbimbiliya. Va handekele nguavo: “Ka tua vuile ku mutima vo, omo ua handekiele netu mu njila, omo ua tu languluilile visoneka?”​—Luka 24:32.

12, 13. (a) Vika vi hasa ku soloka ku cilemo cetu kuli Njambi? (b) Vati tu hasa ku niunga cilemo cetu kuli Yehova?

 12 Ngeci mu va vuile vandongesi omo vevuisisile Visoneka, nenu halumo mua putukile kuenia na ndzolela mu mua putukile ku ivuisisa Mbimbiliya. Eci ca mi kuasa ku tantekeya Yehova na ku mu lema. Mua vusunga ka mu tondo cilemo caco ci tontole.—Mateo 24:12.

13 Omo mu na pu honi kavusamba ka Njambi, mua pande ku linga cose linga vusamba vuenu neni vu kole. Mua pande ku tualelelaho ku lilongesa via Yehova na Yesu na ku hilula ha viuma vi muli na ku lilongesa kaha na ku vi pangesa mu muono uenu. (Yoano 17:3) Omo mu tanda ni ku lilongesa Mbimbiliya, lihulenu nguenu: ‘Vika eci cimpande ci nji longesa hali Yehova Njambi? Omo lia vika nja pande ku lema Yehova na mutima uange uose kaha na muono uange uose?’​—1 Timoteo 4:15.

14. Vati civundilo ci hasa ku kolesa cilemo cetu kuli Yehova?

 14 Nga mua kala na kavusamba, mua vusunga mue ku simutuila ntsimbu yose linga vusamba vuenu vu kole. Na vuno vene, nga tu handeka ntsimbu yose na Yehova mu civundilo, cilemo cetu kuli ikeye ci ka kola. (Tandenu 1 Tesalonika 5:17.) Civundilo ca pua vuana ua tunda kuli Tatetu ua muilu. Ngeci mukemuo tua pande ku handeka neni na mutima uose. (Visamo 62:8) Ka tua pandele ku hilukila hilukila vivundilo, vunoni tua pande ku handeka mpundu vize vi tu tonda. Mua vusunga nga tu tualelelaho ku lilongesa Mbimbiliya na ku vundila na mutima uose, tu ka kolesa cilemo cetu kuli Yehova.

KU LEKAKO VAKUETU VIA YEHOVA

15, 16. Vati mue ku mona cipanga ca ku ambulula?

15 Nga tu tonda ku tualelelaho ku likuata vusamba na Yehova tua pande ku lekako vakuetu via lutsilielo luetu. Ku lekako vakuetu via Yehova ca pua ku vezika ca kama. (Luka 1:74) Kaha ca pua cipanga ca kundikile Yesu kuli Vakua Kilistu va vusunga vose. Tu vose tua pande ku ambulula muzimbu ua cili ua Vuangana vua Njambi. Mu na putuka laza ku lingamo ni?—Mateo 24:14; 28:19, 20.

16 Kapostolo Paulu ua hakele seho ya kama ku cipanga ca ku ambulula, ua ci lukile ngueni “vufuko.” (2 Kolintu 4:7) Ku lekako vantu via Yehova Njambi na vutumbe vueni ca pua cipanga ca seho ya kama ci mua pande ku linga. Muomu ca pua ku pangela Yehova, kaha ikeye ua haka seho ya kama ku viose vi mue ku mu lingila. (VaHevelu 6:10) Cikuavo naua, ku ambulula ci hasa ku kuasa kati lika uze mu ambuluila vunoni nenu vavene, muomu mu ka kuasa vakuenu ku suena kuli Yehova na ku ka tambula muono ka ue ku hua. (Tandenu 1 Kolintu 15:58.) Ka kuesi cipanga ceka ci hasa ku mi vuisa ndzolela ku hiana eci!

17. Omo lia vika ku ambulula ci na pu cipanga ca vuasi-vuasi?

 17 Ku ambulula Vuangana ci na pu cipanga ca vuasi-vuasi. Tua pande ku “zimbula lizi” kaha na ku “kala na vuasi” mu cipanga caco. (2 Timoteo 4:2) Vantu va na pande ku ivua muzimbu ua Vuangana vua Njambi. Muomu Mbimbiliya nguayo: “Litangua lia kama lia Yehova li li ha hiehi, li li ha hiehi, li zangula cikuma.” (Zefania 1:14; Havakuke 2:3) Mua vusunga, vuovuno Yehova a ka nongesa ano mavu a Satana. Ngeci mukemuo tua pande ku mamuna vantu, linga va hangule ku pangela Yehova, ntsimbu kanda ku nonga ci hete.

18. Omo lia vika tua pande ku lemesa Yehova hamo lika na vakuetu Vakua Kilistu va vusunga?

18 Yehova a tonda tu mu lemese hamo lika na vakuetu Vakua Kilistu va vusunga. Mbimbiliya nguayo: “Kaha tu liyongolienu ha kati ketu linga tu sangumuke cilemo na vipanga via ku viuka; Kati tu likele ku likunguluila hamo, ngue cilika ca vamosi, vunoni ku limamuna vene; na ku hiana cikuma omo mu mona litangua lize li li na ku suena ku hiehi.” (VaHevelu 10:24, 25) Tua pande ku linga cose linga tu pue na ku kunguluka ntsimbu yose. Ku likungulula na vamuanetu mu lutsilielo, ya pua ntsimbu ya cili cikuma ya ku lilembezieka na ku likaniamesa umo na mukuavo.

19. Vika vi hasa ku tu kuasa ku lema vamuanetu Vakua Kilistu?

19 Omo mu pua na ku kunguluka, mu ka uana vavusamba va cili va ka mi kuasa ku lemesa Yehova. Mu ka tantekeya vamuanetu va ku liseza-seza, vaze ve ku linga cose mu ku lemesa Yehova ngeci muenu. Ka va puile va ku tantuluka kaha ve ku sevuka ngeci muenu naua. Ngeci mukemuo, liviukisilenu linga mu pue na ku vecela nga va sevuka. (Tandenu Kolose 3:13.) Puenu na ku tala ha vifua via cili via vamuanoko Vakua Kilistu, muomu ku lingamo ci ka mi kuasa ku va lema na ku suena kuli Yehova.

 MUONO UA VUSUNGA

20, 21. ‘Muono ua vusunga’ ua pua uka?

20 Yehova a tonda vavusamba veni vose va yoye muono ua cili cikuma. Mbimbiliya ya tu longesa nguayo muono u tu ka yoya ku lutue u ka pua ua cili cikuma ku hiana matangua ano.

Yehova a tonda mu ka tambule ‘muono ua vusunga.’ Mu ka u tambula ni?

21 Ku lutue tu ka yoya miaka yose, kati lika miaka 70 ni 80. Tu ka yoya ‘muono ua ya-ye’ na cihindu ca ku tantuluka, ciyulo na ndzolela mu citungu ca cili. Muono uaco ukeuo u ya luka Mbimbiliya nguayo ‘muono ua vusunga.’ Vutuhu Yehova ua tu kulahesauo, vunoni tua pande ku lihakela kapandi kose linga tu “kuate” ku muono uaco.​—1 Timoteo 6:12, 19.

22. (a) Vati tu hasa ‘ku kuata ku muono ua vusunga’? (b) Omo lia vika ka kuesi na vimo viahi vi tu hasa ku panga linga va tu fuete muono ua ya-ye?

22 Vati tu hasa ku ‘kuata ku muono ua vusunga’? Tua pande ku ‘linga mua ngozi” na ku kala na “vilinga via ku viuka.” (1 Timoteo 6:18) Eci ca lomboloka ngecize tua pande ku linga vize vi tue ku lilongesa mu Mbimbiliya. Vunoni muono ua vusunga’ ka uemanene ha ngolo yetu. Ka kuesi na vimo viahi vi tu hasa ku panga linga tu fuile ku tu fueta muono ua ya-ye. Muomu ua pua vuana vua ka hana Yehova ku vangamba veni va ku ononoka omo lia “kavumbi” keni. (Loma 5:15) Tatetu ua muilu a tonda mpundu ku hana ovu vuana ku vangamba veni va ku ononoka.

23. Omo lia vika mua pande ku hangula ku linga via cili mu ntsimbu ino vene?

23 Lihulenu nguenu, ‘Vuno nji li na ku lemesa Njambi mu njila ya tava ni?’ Nga mu mona ngecize kuli vimo vi mua pande ku alulula mu muono, mua pande ku vi alulula ntsimbu ino vene. Nga tu kulahela Yehova na ku lihakela kapandi ka ku mu ononoka Yehova mu viose, kaha a ka pua vutinino vuetu. A ka niunga vantu veni va ku ononoka  mu matangua a akalu a ku manusuila ca ano mavu a Satana. Kaha Yehova a ka tu kovelesa mu Citungu linga tu ka yoyelemo miaka yose, ngue mua tu kulahesa. Cili vene, mu hasa ku kala na muono ua vusunga nga mu hangula ku linga via cili mu ntsimbu ino vene!