Skip to content

Skip to table of contents

 KAPITULU 16

Hangulenu ku Lemesa Njambi

Hangulenu ku Lemesa Njambi

1, 2. Vika mua pande ku lihula, kaha vika ca puila ca seho ku lingamo?

MU CILONGESA cenu ca Mbimbiliya, mua lilongesa ngecize cingi ca vantu vakua ku litumbula nguavo vangamba va Njambi, ve ku longesa ni ku linga viuma via zinda Njambi. (2 Kolintu 6:17) Ngeci Yehova ua tu tuma ku tunda mu malombelo a makuli ni nguetu “Mbambilone ya kama.” (Ku-Solola 18:2, 4) Vati mua pande ku linga? Nkala muntu na pande ku lihanguila, kaha naua tua pande ku lihula nguetu: ‘Vuno nji tonda ku lemesa Njambi mu njila ya tonda ikeye ni? Ni nji tonda ku mu lemesa ngue mu nje ku linga laza?’

2 Nga mu na fumu laza ku vulombelo vua makuli, mu na lingi vuino. Vunoni halumo kasi kuli vimo vilinga ni vilika via mu vulombelo vua makuli vi mua lema. Tu ci simutuilenu vimo vilinga viaco na ku mona vika ca puila ca seho ku vimona ngue mue ku vimona Yehova.

KU LEMESA TUMPONIA NA VAKULU

3. (a) Omo lia vika vamo ci hasa ku va puila ca cikalu ku likela ku pangesa tumponia mu ku lemesa? (b) Vika ya handeka Mbimbiliya ku tuala ha ku pangesa tumponia mu ku lemesa Njambi?

3 Vamo vantu ve ku pangesa tumponia ni viuma vieka mu ku lemesa Njambi miaka ya ingi. Nga nenu mua kalako na vimo, ci hasa ku mi puila ca cikalu ku likelavio ni mu hasa ku singanieka nguenu ku lemesa Njambi ca ku hona viuma evi ca pua vuhenge. Vunoni vulukenu nguenu Yehova ikeye ue ku tu leka vati tua pande ku mu lemesa. Kaha Mbimbiliya ya longesa mpundu nguayo Njambi ka tondele ku mu lemesa na tumponia.Tandenu Ezundu 20:45; Visamo 115:4-8; Isaya 42:8; 1 Yoano 5:21.

4. (a) Vika ka tua pandele ku lemesela vakulu? (b) Omo lia vika Yehova ua vindikile vantu veni ku seteka ku handeka na vatsi?

 4 Vamo vantu va hasa ku pihisa ntsimbu ya kama ni ngolo yavo mu ku seteka ku vuisa ndzolela vakulu. Vintsimbu vimo ve ku va lemesa. Vunoni tua lilongesa ngecize vatsi ka va hasa ku tu kuasa ni ku tu vulumuna. Muomu ka vesi na muono. Mua vusunga, ca pua vusonde ku seteka ku handeka navo, muomu nkala muzimbu u soloka ngue u na tundu kuli kavusoko ua tsa laza, ue ku tunda mpundu kuli vandemone. Ngeci mukemuo, Yehova ua vindikile vaIsaleli ku seteke ku handeka na vatsi ni ku panga vifua vikuavo via mahamba.—Ndeutelonomi 18:10-12; talenu Matota 26 na 31 ku ntsongo ya livulu.

5. Vika vi hasa ku mi kuasa ku likela ku pangesa tumponia mu ku lemesa Njambi ni ku lemesa vakulu?

5 Vika vi hasa ku mi kuasa ku likela ku pangesa tumponia mu ku lemesa Njambi ni ku likela ku lemesa vakulu? Tandenu Mbimbiliya na ku hilula vuino vati Yehova ue ku mona viuma viaco. Kuli ikeye tumponia ni vakulu via pua “cizila” ni nguetu vie ku mu vuisa niengo. (Ndeutelonomi 27:15) Vundilenu kuli Yehova ntsimbu yose linga a mi kuase ku mona viuma ngue mue ku vi mona ikeye na ku mu lemesa mu njila ya tonda. (Isaya 55:9) Kalenu na vusunga nguenu Yehova a ka mi hana ngolo ya ku mbila viose via likuata na ku lemesa ca makuli.

TUA PANDE KU LINGA CILIKA CA NATALE NI?

6. Vika va hanguila 25 ya Dezembro ku pua litangua lia cilika ca ku semuka ca Yesu?

6 Natale ya tsimana cikuma mu mavu ose, kaha cingi ca vantu ve ku singanieka nguavo ca pua cilika ca ku vuluka ku semuka ca Yesu. Vunoni Natale ya likuata na vulombelo vua makuli. Limo livulu lia lombolola ngualio vakua Loma vaze ka va lemesele Njambi, va kele na ku linga cilika ca ku  semuka ca litangua ha 25 ya Dezembro. Kaha vakuluntu va malombelo va tondele linga cingi ca vantu vaco va tave Vukua Kilistu, ngeci mukemuo va putukile ku linga cilika ca ku semuka ca Yesu ha 25 ya Dezembro, vutuhu litangua liaco kati likelio lia semukile Yesu. (Luka 2:8-12) Vunoni vandongesi va Yesu ka va kele na ku linga cilika caco. Limo livulu likuavo ngualio mu miaka 200 tunde ha semukilile Yesu “na umo uahi ua tantekeyele litangua lia semukile Yesu kaha va vandende lika va tondele ku tantekeya litangua liaco.” (Sacred Origins of Profound Things). Natale ya putukile lika mu nima ya miaka ya ingi, tunde ha ntsimbu ya kele Yesu hano ha mavu.

7. Vika Vakua Kilistu ka ve ku lingila cilika ca Natale?

7 Vantu vavengi va tantekeya ngecize Natale na vilika via ku lihana vuana vi ve ku linga vantu ha litangua liaco, via tunda kuli vakua mavu. Ca ku muenako, ku miaka ya ku nima vakua Inglaterra na vimo vihela via ku Amerika, va vindikile Natale omo lia ku pua cilika ca vakua mavu. Uose u va kuatele a linga cilika caco va kele na ku mu hana kasitiku. Vutuhu ngoco mu nima ya ntsimbu vantu va putukile naua ku linga cilika caco. Vika Vakua Kilistu va vusunga ka ve ku lingila Natale? Muomu ve ku tonda kuya Njambi ku mutima mu viose vi va linga.

TUA PANDE KU LINGA VILIKA VIA KU SEMUKA NI?

8, 9. Omo lia vika Vakua Kilistu va katete ka va kele na ku linga vilika via ku semuka?

8 Cilika cikuavo ci ve ku linga cikuma vantu ca pua ca litangua lia ku semuka. Vuno Vakua Kilistu va pande ku linga vilika via ku semuka ni? Mu Mbimbiliya va tumbulamo lika vilika via ku semuka vivali, vunoni vantu va vi lingile ka va puile vakua ku lemesa Yehova. (Njenisisi 40:20; Mako 6:21) Vantu va kele na ku linga vilika via ku semuka mu ku singimika vanjambi va makuli. Ngeci mukemuo Vakua Kilistu va  ku livanga “va muene vilika via ku semuka ca muntu ku pua vilika via vakua mavu.”—The World Book Encyclopedia.

9 Vakua Loma na vaNgelengu va ku ntsenkulu va tsilielele nguavo ha ku semuka ca nkala muntu ha kele cimo cimbembesi kaha cimbembesi caco ca niungile uze muntu mu muono ueni uose. Limo livulu ngualio “eci cimbembesi ca fumine kuli njambi ua litangua lia semukile muntu uaco.”​—The Lore of Birthdays.

10. Omo lia vika Vakua Kilistu ka va pandele ku linga vilika via ku semuka?

10 Mu ku mona cenu, vuno Yehova ue ku tava vilika via likuata na malombelo a makuli ni? (Isaya 65:11, 12) Houe, ke ku vi tava. Vikevio ka tue ku lingila vilika via ku semuka ni nkala vilika vieka via likuata na vulombelo vua makuli.

VUNO CA KALA NA SEHO NI?

11. Vika vamo ve ku lingila vilika ha matangua a ku huima? Vika via pande ku kala na seho ya kama kuli yenu?

11 Vamo vantu va tantekeya nguavo Natale na vimo vilika vikuavo via tunda kuli vakua mavu, vunoni kasi ve ku vi linga. Muomu cingi cavo, ve ku singanieka nguavo matangua aco eku pua ntsimbu ya cili ya ku kala hamo na vavusoko. Nenu mue ku singanieka ngoco ni? Ku hitisa litangua hamo na vavusoko vuenu ka ca puile vupi. Yehova ua tangele vusoko, kaha ua tonda tu yoye mua cili navo. (Efeso 3:14, 15) Vunoni tua pande ku tuala mana ku ku likuata vusamba na Yehova ku tuvakana ku vuisa vavusoko vuetu ndzolela mu ku linga vilika via likuata na vulombelo vua makuli. Ngeci mukemuo, kapostolo Paulu ua handekele ngueni tualelelenuho ‘ku tantekeya vize via lema Muangana.’​—Efeso 5:10.

12. Vika vie ku lingisa Yehova ku viana vimo vilika via matangua a ku huima?

12 Vavengi ve ku singanieka nguavo vantu ka va pandele  ku lisosomua ku tantekeya kuiko kua tunda cilika, vunoni ku lingamo ca kala na seho kuli Yehova. Muomu Yehova ke ku tava vilika via tunda mu vulombelo vua makuli. Ca ku muenako, vakua Ingito va kele na ku lingila vanjambi vavo vilika via vingi. Mu nima ya ku patuka ku vundungo mu Ingito, vaIsaleli va tambuluisile cimo ca vilika via vakua Ingito na ku ci sana nguavo “ciuano kuli Yehova.” Vunoni Yehova ua va hele kasitiku omo lia ku lingamo. (Ezundu 32:2-10) Ngeci mukemuo, ngue mua handekele Isaya, tua pande ku viana ku ‘kuata ku cimosi ca ku zuala!—Tandenu Isaya 52:11.

MUESENU KASINGIMIKO MU KU LOMBOLUELA VAKUENU

13. Vihula vika mu hasa ku kala navio omo mu likela ku linga vilika via matangua ku huima?

13 Omo mu likela ku linga vilika via matangua a ku huima, mu hasa ku kala na vihula via vingi. Vihula ngeci mua: Vati nji ka linga nga vakuetu ku vipanga va nji hula vika ka nje ku lila Natale? Vati nji pua na ku linga nga muntu a nji hana vuana vua Natale? Vati nji linga nga mukua vulo vuange a tonda nji linge cimo cilika ca litangua lia ku huima? Vati nji hasa ku kuasa vana vange linga kati vevue vusiua omo lia ku hona ku linga cimo cilika ca ku huima ni cilika cavo ca ku semuka?

14, 15. Vati mu hasa ku linga nga muntu a mi meneka na mezi a cilika ca litangua lia ku huima ni a mi hana vuana?

14 Ca pua ca seho ku lisinganiekela etu vavene vati tua pande ku kumbulula nkala muntu. Ca ku muenako, nga muntu a mi leka ngueni “Natale i mi hite mua cili” ka ci tondeka ku holoka, mu hasa lika ku handeka nguenu “nja santselako” kunahu. Vunoni nga muntu uaco a tonda ku tantekeya vikuavo, citava ku mu lomboluela mua cili. Vunoni mua pande ku handeka na ngozi, liano na kasingimiko. Mbimbiliya nguayo: “Vihandeka vienu vi kale na kavumbi  ntsimbu yose, via ku tova na muongua, linga mu tantekeye vati mu na pande ku kuania vantu vose.” (Kolose 4:6) Mu hasa ku va leka nguenu mua lema ku kala na vakuenu na ku hana vuana, vunoni ka mue ku lingamo ha vilika via matangua a ku huima.

15 Vati mua pande ku linga nga muntu a mi hana vuana? Mbimbiliya ka ya tumbikile masiko a muesa viose via na pande ku linga muntu, vunoni ya handeka nguayo ka tua pandele ku linga nkala cuma ci ka tu vuisa citakutaku. (1 Timoteo 1:18, 19) Vintsimbu vimo halumo muntu ali na ku mi hana vuana ka tantekeya ngueni enu ka mue ku linga cilika caco. Ni nga a tantekeyamo, a hasa ku handeka ngueni: “Nja tantekeya ngecize ka mue ku linga eci cilika, vunoni nji tonda ku mi hana evi.” Ha ntsimbu yaco mu hasa ku hangula nga mu tava vuana vuaco ni kuahi. Vunoni viose vi mu hangula ku linga, lihakelenu kapandi ka ku linga vize ka vi mi sila citakutaku. Ka tu tondo ku linga na vimo viahi vi hasa ku pihisa vusamba vuetu na Yehova.

NENU NA VAVUSOKO VUENU

Vakua ku lemesa Yehova va kala na ndzolela

16. Vati mua pande ku linga nga vavusoko vuenu va tonda ku linga cimo cilika ca litangua lia ku huima?

16 Vati mua pande ku linga nga vavusoko vuenu va tonda ku linga cimo cilika ca litangua lia ku huima? Ka mua pandele ku va luisa. Muesenu ngozi na ku singimika vizango viavo muomu nenu mu tonda va singimike vizango vienu. (Tandenu Mateo 7:12.) Vunoni nga vavusoko vuenu va tonda mu kale navo ha litangua lia ku huima, vati mua pande ku linga? Ntsimbu kanda mu linge na vimo viahi, vundilenu kuli Yehova linga a mi kuase ku linga viuma mu njila ya cili. Singaniekenu vuino ha citanga caco, kaha tondesesenu vimpande via handekaho mu mikanda yetu. Kaha kati mu suve ngecize vutumbe vuenu kuya Yehova ku mutima ntsimbu yose.

17. Vati mu hasa ku kuasa vana venu omo vakuavo va linga vilika via matangua a ku huima?

 17 Vati mu hasa ku kuasa vana venu omo vakuavo va linga vilika via matangua a ku huima? Vintsimbu vimo puenu na ku va lingila viuma via cili vi va lema. Mu hasa naua ku va tungumuna na vuana. Kaha vuana vua kama vu mu hasa ku hana ku vana venu, vua pua ku tonda ntsimbu ya ku kala hamo navo na ku va muesa cilemo.

KOVELENU MU KU LEMESA CA VUSUNGA

18. Vika tua pande ku kungulukila ntsimbu yose?

18 Linga tuye Yehova ku mutima, tua pande ku tunda mu ku lemesa ca makuli na ku viana vilika ni matangua avio a ku huima. Kaha na ku kovela mu ku lemesa ca vusunga. Mu njila ika? Mu ku kunguluka ntsimbu yose. (Tandenu VaHevelu 10:24, 25.) Viuano via kala na seho ya kama mu ku lemesa ca vusunga. (Visamo 22:22; 122:1) Muomu ku viuano via Vakua Kilistu tue ku likaniamesa umo na mukuavo.​—Loma 1:12.

19. Vika ca puila ca seho ku lekako vakuenu vusunga vua mu Mbimbiliya vu mua lilongesa?

19 Cuma cikuavo ca mu ku lemesa ca vusunga, ca pua ku lekako vakuenu viuma vi mua lilongesa mu Mbimbiliya. Vantu vavengi vali na ku yanda omo lia viuma via ku pihia vi li na ku soloka ha mavu. Halumo mu tantekeya vamo ve ku mona lamba yaco. Va lekenuko via lulavelelo luenu lua ku lutue. Omo mu tualelelaho ku kunguluka na Vakua Kilistu na ku lekako vakuenu vusunga vu mua lilongesa mu Mbimbiliya, mu ka mona ngecize cizango ca ku pua mukua vulombelo vua makuli na vilika viavo ci ka mi tunda. Kalenu na vusunga ngecize, mu kevua ndzolela kaha Yehova a ka mi vezikisa cikumakuma omo mu lihakela kapandi ka ku mu lemesa mu njila ya cili.​—Malakiya 3:10.