Skip to content

Skip to table of contents

 CIHULA 6

Vati Nji Hasa ku Viana Ntsindiye ya Vakuetu?

Vati Nji Hasa ku Viana Ntsindiye ya Vakuetu?

SEHO YA KALAHO

Nga u liimanena ove ivene, yove u endesa muono uove, ka u ka tavesa vakuenu va ku endesele muono uove.

NGA YOVE, VATI U NE KU LINGA?

Aci singanieke ha cimueso eci: Makayi na mana kaha a mona vavusamba veni vavali va ku sikola vali na ku iza, kaha evua mu vitsiha keke. Mu simano ino, va na mu eseka luvali linga a sipe. Olu lu veza ngeci lua mu citatu.

Kavusamba ua katete a handeka ngueni:

“Kasi lika liove? Nji na ku nehela kavusamba.”

Kaha omo a tumbula lizi “kavusamba,” a tenia liso oku a tuhula vimo mu mboloso na ku seteka ku hana Makayi.

Makayi a mona likaya mu kati ka minie. Kaha vuoma vueni vu livueza.

Kaha Makayi a handeka ngueni: “Houe, nja ku leka laza nguange ka nje ku. . . ”

Kavusamba ua mu civali, a mu vatuisila lizi ngueni: “Ove vuheve vuze, munjunju ngue kanike!”

Makayi a tava na ku simpa ngueni: “Kati vuoma!”

Kavusamba ua mu civali, a kuata Makayi ha citsili kaha a handeka mu civuovuo ngueni: “Tambula lika.”

Kavusamba ua katete a suenesa likaya kuli Makayi na ku yeveta ngueni: “Ka tu lelako vantu. Na umo uahi a ka vi tantekeya.”

Nga yove Makayi, vati u ne ku linga?

 SINGANIEKAHO VUINO!

Vuno vavusamba va Makayi va singanieka mpundu ha viuma vi ve ku linga ni? Citava ka va singaniekeleho. Vunoni va tangukile ku ntsindiye ya vakuavo. Omo lia ku tonda ku lifua na vakuavo ngeci ve ku tava vakuavo va va pikule.

Nga nove u ne ku hitile mu ceseko ngeci mueci, vati u ne ku lingile mu ku vula ntsindiye ya vakuenu?

  1. LIVANGE KU SINGANIEKA HA CESEKO

    Mbimbiliya nguayo: “Mukua liano a mona vupi, kaha a vanda: vunoni visiname va hitako kaha va ci yandela.”​—⁠Visimo 22:⁠3.

    Vintsimbu via vingi citava ku mona ceseko ntsimbu kanda ci hete. Ca ku muenako, nga u mona civunga ca vakuenu ku lutue vali na ku sipa. Nga u livanga ku singanieka ha ceseko u ka hasa ku ci vula.

  2. SINGANIEKAHO

    Mbimbiliya nguayo: “Kalenu na mutima ua ku tantuluka.”​—1 Petulu 3:⁠16.

    Lihule nguove: ‘Nga nji kava mbunga, vati nji kevua ku mutima mu nima ya ntsimbu?’ Mua vusunga, u hasa kuya ku mutima ua vakuenu mu ntsimbu ya indende. Vunoni vati u kevua mu nima ya co ? U tava ku tsiha vuntu vuove linga u vuise vakuenu ndzolela ni?​—Ezundu 23:⁠2.

  3. HANGULA MUA KU LINGA

    Mbimbiliya nguayo: “Mukua mangana evua vuoma.”​—Visimo 14:⁠16.

    Cipue mu ntsimbu ino ni ku lutue, nkala muntu a ka lihanguila viuma mu muono na ku hita mu viose vi kezamo. Mbimbiliya ya handeka via vamala ngeci mua Yosefe, Yombi, na Yesu va hanguile viuma via cili mu muono. Vunoni ya handeka naua via vantu ngeci mua Kaini, Esau na Yundasa, va hanguile viuma via ku pihia mu muono. Ove vika u ka hangula?

Mbimbiliya nguayo: “Linga via cili.” (Visamo 37:⁠3) Nga u na singanieka laza ha viuma vi kezamo kaha u na hangula vati u linga, ci ka pua ca casi ku leka vantu vi u linga kaha u ka tambula vilunguiso.

Kati u lisosomue​—ka ci tondeka ku handeka via vingi vingi. Ku handeka lika nguove HOUE na lizi lia ku kaniama ci hasa ku manusula visoti. Ni linga u muese mpundu nguove ka u lingimo, u hasa ku handeka nguove:

  • “Kati u nji tandeko!”

  • “Ka nje ku linga ovio!”

  • “Mukuetu, ngue ka u nji tantekeya? Vika u lipakesela!”

Lihungu lia kala ha ku viana vuasi na lizi lia ku simpa. Nga u lingamo, u hasa ku komoka vuasi vu va kala navo vakuenu mu ku likela ku ku pindisa!

Nga u tava ntsindiye ya vakuenu, u pua ngue likina li ve ku ehesa vakuenu

 MUA KU LINGILA NGA VAKUENU VA KU PINDISA

Inga u tava ntsindiye ya vakuenu, u pua ngue likina li ve ku ehesa vakuenu

Nga vakuenu va ku zola ni ku ku tsopa, vati u linga? Ca ku muenako, nga va handeka nguavo: “Ove nkuma munjunju ngeci?” Tantekeya vutumbe vuavo—vali na ku ku sindiya ku linga via ku pihia. Vati ua pande ku linga? Kuli viuma vivali vi u hasa ku linga.

  • U hasa ku tava ku yengula cavo. (“U li na vusunga, nji li na liova!” Mu nima yaco mu lombololuele omo lia vika.)

  • U hasa ku hiluisila ntsindiye kuli ikeye. Lombolola vika u na vianena, kaha mu ende ha vuongo. (“Ange nguange u ua ku zangama, nkuma ue ku sipa!”)

Nga vakuenu va tualelelaho ku ku sindiya, tundaho! Vuluka ngecize, nga u simbula cikuma, vakuenu va vueza ku ntsindiye. Vunoni mu ku tundaho, u ka muesa ngecize ka u tavesa vakuenu va alulule vuntu vuove.

Mua vusunga, ka u hasa ku vanda ku ntsindiye ya vakuenu. Vunoni u hasa ku hangula vi u tonda ku linga, ngeci mukemuo endesa muono uove ove ivene mu ku lombolola na ku kava vize vi ua tsiliela. Ku ntsongo ya viose, yove ua pande ku lihanguila viuma mu muono!—Yehosua 24:15.