Skip to content

Skip to table of contents

 CIHULA 3

Vati Nji Hasa ku Handeka na Visemi?

Vati Nji Hasa ku Handeka na Visemi?

SEHO YA KALAHO

Nga u litombola na visemi vove,u yoya mua cili.

NGA YOVE, VATI U NE KU LINGA?

Aci singanieke ha cimueso eci: Lia mu Citatu ku vutsiki. Yoano ua miaka 17, na mane ku linga vipanga via ha ndzivo, kaha na viukilila cikuma muomu ntsimbu yeni ya ku huima inapuho! Kaha a suameka TV na ku tumama mu cituamo ca lema.

Kaha ise a mana ha mbelo, vunoni ka ca mu ile ku mutima.

Kaha a tenuka ngueni: “Yoano! Vika uli na ku pihisila ntsimbu ku TV, kati nga u kuasa ntsongo yove ku vipanga vi va na mu hanene ku sikola? Ka ue ku linga via ku ku leka!”

Vunoni Yoano a ningula na lizi lia kama linga ise evueko, ngueni: “Va na putuka.”

Ise a suenako, ngueni: “Ove, nguove vati?”

Yoano a kumbuluila muitsi ngueni: “Viahi, Tate.” Oku na kutumu luholo.

Kaha ise a tenuka cikuma honi, ngueni: “Ove, nange u handeka ngoco?”

Nga yove Yoano, vati u ne ku lingile, linga kati u likuanie na Iso?

SINGANIEKAHO VUINO!

Ku handeka na visemi ca pua ngue ku endesa likalu. Nga u uana cingoua, u hasa ku ila mu njila yeka.

Ngeci mua cingoua ka ci hasa ku tsiha vungendzi vuove, na vuno vene u hasa ku uana njila yeka ya ku handeka na visemi

 CA KU MUENAKO:

Umo muana mpuevo ua lizina Kalumbu, ngueni: “Ce ku nji puila ca cikalu ku handeka na vatata. Vintsimbu vimo nje ku handeka navo kaha nguavo ‘Nguove vati? nange u na kala na ku handeka?’”

KULI VINANGA VITATU VIA HASA KU LINGA KALUMBU.

  1. Ku tenukila ise.

    Kalumbu a tambakana, ngueni “Tate, halakanenu kuno via seho nji handeka

  2. Ku likela ku handeka na ise.

    Kalumbu a luvala na ku likela ku leka ise cisoti ci ali naco.

  3. Ku lavelela ntsimbu ya cili ya ku leka ise cisoti ceni.

    Kalumbu a handeka mpundu na ise ntsimbu yeka, ni a linga ku mu sonekela mukanda.

Nga Kalumbu na ku vundilile vukuasi, cinanga cika u ne ku mu leka?

ACI SINGANIEKE: VasaKalumbu va na tuala mana ku vieka—ngeci ka va muene vusiua vua muana. Ngeci mukemuo, nga Kalumbu a hangula Cinanga A, ise kevuisisa vika na nienguela. Mua vusunga eci cinanga ka ci hasa ku lingisa ise ku mu halakana, kaha ka ci muesa

kasingimiko cipue kavumbi kuli ise. (Efeso 6:2) Ku lingamo ka ci kuasa na umo uahi.

Ngeci mua cingoua ka ci hasa ku tsiha vungendzi vuove, na vuno vene u hasa ku uana njila yeka ya ku handeka na visemi

Kaha vutuhu ca casi ku hangula Cinanga B, vunoni mukua mangana ka ci hangula. Omo lia vika? Muomu linga Kalumbu a tuvakane cisoti ceni, noho a lekeko ise—kaha linga ise a mu kuase, ha katete na pande ku tantekeya cisoti cika ali naco. Ngeci mukemuo ku holoka ka ci kuasa na vimo viahi..

Vunoni nga a hangula Cinanga C, ka ka tavesa cingoua ku tsiha vungendzi vueni. A ka tonda ntsimbu yeka ya ku simutuila na ise. Kaha nga a hangula ku soneka mukanda, a livua mua cili mu ntsimbu oyo vene.

Ku soneka mukanda ci hasa ku mu kuasa ku lombolola vuino cisoti ceni. Omo VasaKalumbu va ka tanda mukanda uaco, va kevuisisa vuino via na tondele ku va leka muana. Ngeci mukemuo cinanga C, ci kuasa vose vavali vaIse na muana. Cipue ku ku handeka mpundu na ise ni soneka mukanda, eci cinanga ca litombola na cimamuna ca Mbimbiliya ca tu mamuna nguaco “tu kavangeyenu viuma via ku lingisa ciyulo.”—Loma 14:19.

Vinanga vika vikuavo a hasa ku kava Kalumbu?

Nga u na hasako cimo, ci soneke muintsi. Kaha soneka vika vi hasa ku iza mu ku kava cinangacaco.

 PUA NA KU LOMBOLOLAVUINO VISINGANIEKA VIOVE.

Vuluka ngecize vintsimbu vimo, vi ue ku handeka ka vie ku litombola na vize vi ve ku singanieka visemi vove.

CA KU MUENAKO:

Visemi va hasa ku ku hula nguavo vika u na holokela ngeci lelo. Kaha nguove: “Viahi, ka nji tondo ku vi handeka.”

Vunoni visemi vove va hasa ku singanieka nguavo u na handeka nguove: “Ka nja mi tsilielele cikuma. Ambe visoti viange nji leka vakuetu, kati yenu.”

Aci singanieke nga u li na ku hita mu visoti, kaha visemi vove va tonda ku ku kuasa. Vunoni nga u va leka nguove: “Kati mu lisosomue. Nji hasa ku likuasa ange ivene.”

  • Vati va hasa ku ivuisisa visemi vove?

  • Vati mu ne ku kumbuluile mu njila ya cili?