Skip to content

Skip to table of contents

 CILONGESA 4

Yesu Kilistu Iya?

Yesu Kilistu Iya?

1. Vati muono ua Yesu ua putukile?

Vika via lingisile Yesu ku pua mukua cikeketima?​—MATEU 11:29; MAKO 10:13-16.

Yesu ua puile kangelo muilu tele kanda a cize ha mavu. (Yoano 8:23) Njambi ua tangele Yesu tele kanda a tange viuma viose kaha Yesu ua kuasele Ise mu ku tanga viuma viose vikuavo. Yesu va mu sana nguavo “muana umo lika” ua Njambi muomu Yehova ua mu tangele lika lieni. (Yoano 1:14) Yesu ua puile Muluua ua Njambi ngeci va mu luka nguavo “Lizi.”​—Tandenu Visimo 8:22, 23, 30; Kolose 1:15, 16.

2. Vika uezilile Yesu ha mavu?

Njambi ua tumine muaneni ha mavu, muku nunguluila muono ueni mu lizimo lia umo muana mpuevo kanda a cili mona na yala. Lizina lieni Maliya, ua ka Yundeya. Yesu ka kele na ise ua muntu. (Luka 1:30-35) Yesu uezile ha mavu linga (1) a ku longese vusunga hali Njambi, (2) a tu sile lungano lua vati tu hasa ku pangela Njambi ambe nga tu hita mu vieseko, kaha (3) na ku hana muono ueni ua ku tantuluka muku tu “kula.”​—Tandenu Mateu 20:28.

3. Omo lia vika etu vantu va pandele ku tu kula?

Ku kula capua ndando ive ku fueta linga va patule muntu na lingi mulonga. (Ezundu 21:29, 30) Vusinakazi na Kutsa ka via kele mu vutumbe vua Njambi mua tangele vantu. Vati tua tantekeya ngoco? Muomu Njambi ua nanguile Andama, ngueni nga a linga vize vi va sana mu Mbimbiliya nguavo “vupi” a ka tsa. Andama nga ku linga vupi kuahi  nga ka tsile. (Njenisisi 2:16, 17; 5:5) Mbimbiliya i longesa nguayo vupi vua “kovelele” ha mavu ku hitila muli Andama. Ngeci mukemuo Andama ua tambuisile vupi ku mbuto yeni yose kaha mueza ku-tsa. Tua pande ku tu kula linga tu patuke mu kutsa ci tua tambula kuli Andama.​—Tandenu Loma 5:12; 6:23.

Iya ue ku hasele ku fueta ndando ya ku tu patula ku kutsa? Muntu ku muntu ue ku tsila vupi vueni. Na umo muntu mukua vupi a hasa ku fueta vupi vua vakuavo uahi.​—Tandenu Visamo 49:7-9.

4. Vika ua tsililile Yesu?

Yesu ua puile ua ku tantuluka. Ka ca tondekele linga a tse omo lia vupi vueni​—muomu ikeye ka vulumuine. Njambi ua soluele cilemo ceni kuli etu muku tuma muaneni linga a ku tu tsile. Yesu neni ua soluele cilemo ceni kuli yetu mu ku-ononoka kuli Ise na ku tava ku-iza kua ku tu tsila.​—Tandenu Yoano 3:16; Loma 5:18, 19.

Talenu video Omo lia Vika Yesu ua Tsile?

5. Vika a li na kulinga Yesu?

Yesu mua kele ha mavu ua kanguisile mavezi, ua sanguile vatsi na ku-ovola vantu va kele mu vusonde. Mu cifua eci Yesu ua soluele viuma via ka linga ku lutue ku vantu va ku-ononoka. (Mateu 15:30, 31; Yoano 5:28) Mua tsile Yesu, Njambi ua mu sanguile na muvila ua Sipilitu. (1 Petulu 3:18) Yesu ua ka lavelelele ku livoko lia cilio lia Njambi noho Yehova ua mu hele Ngolo ya kupua muangana ha mavu ose. (Hevelu 10:12, 13) Muangana Yesu a li na ku sika muilu, kaha vandongesi veni vali na kuambulula ou muzimbu ua cili ha mavu ose.​—Tandenu Ndaniele 7:13, 14; Mateu 24:14.

Vuovuno Yesu a ka pangesa ngolo ya vuangana vueni, linga a ka fumiseko lamba yose na ku nongesa vaze ve ku yandesa vakuavo. Vose ve ku muesa lutsilielo luavo muli Yesu mu ku mu ononoka, va ka tambula muono ka ue ku hua mu citungu ha mavu.​—Tandenu Visamo 37:9-11.