Skip to content

Skip to table of contents

 CILONGESA 14

Vuno Njambi ua Kala na Lukungulukilo Ni?

Vuno Njambi ua Kala na Lukungulukilo Ni?

1. Omo lia vika Njambi ua viukisile Isaleli ya laza?

Njambi ua kunguluile vana va Avilahama muku va puisa cifuti kaha na ku va hana masiko. Cifuti caco ua ci sanene ngueni Isaleli kaha ua ci puisile vutulikilo vua lizi lieni na ku lemesa ca vusunga. (Visamo 147:19, 20) Linga, vantu va ku vifuti viose va ka uane kuvezika ku hitila muli Isaleli.​—Tandenu Njenisisi 22:18.

Njambi ua hanguile vana va Isaleli ku-pua Vakaleho veni. Muzimbu uavo ua muesa kuvezika ci va hasa ku uana vantu nga vononoka ku masiko a Njambi. (Ndeutelonomi 4:6) Ku hitila muli Isaleli vantu veka va hasele ku tantekeya Njambi.​—Tandenu Isaya 43:10, 12.

2. Omo lia vika vakua kilistu va vusunga va kala na lukungulukilo?

Mu ntsimbu imo omo lia kuhona ku ononoka, Njambi ua vianene Isaleli kaha mu cihela cavo ua hingisilemo cikungulukilo ca vakua Kilistu. (Mateo 21:43; 23:37, 38) Vuovuno, mu cihela ca Isaleli, vakua Kilistu va vusunga vakevo honi vapua Vakaleho va Yehova.​—Tandenu Vilinga 15:14, 17.

Yesu ua kunguluile vakua ku mu kava linga va ambulule na ku puisa vantu va ndongesi mu vifuti viose. (Mateo 10:7, 11; 24:14; 28:19, 20) Cino cipanga caco cili ha ntuitui, ku vu manusuilo vua viuma via ntsimbu ino. Ca kulivanga, ku mona vati Yehova na kungulula makulukazi a vantu vaku vifuti viose mu ku lemesa ca vusunga. (Kusolola 7:9, 10) Vakua kilistu va vusunga va kala mu lukungulukilo mu kuli kolesa na kuli kuasa umo na mukuavo. Mu mavu ose veku lilongesa viuma vimo lika mu Mbimbiliya ku vikungulukilo viavo.​—Tandenu VaHevelu 10:24, 25.

 3. Vati lua putukile Lukungukilo lua Vakaleho va Yehova mu vi ntsimbu vino?

Lukungulukilo lua Vakaleho va Yehova lua ntsimbu ino lua putukile mu muaka ua 1870. Kua kele kamo kacivunga ka vakua ku lilongesa Mbimbiliya va putukile ku nongonona vusunga vua Mbimbiliya vuze vua zimbalele laza. Va tantekeyele nguavo nkumani Yesu ua viukisile lukungulukilo lua vakua Kilistu linga va ambulule. Kaha mukemuo va putukile cipanga ca kuambulula vuangana ku vifuti viose. Mu 1931 va hanguile ku va sana Vakaleho va Yehova.​—Tandenu Vilinga 1:8; 2:1, 4; 5:42.

4. Vati va likungulula Vakaleho va Yehova?

Mu sekulu ya kuli vanga, cikungulukilo ca vakua Kilistu ku vifuti via vingi vakele na ku uana vukuasi ku cikota ca civunga ca va ntuamena ca tavele Yesu ku-pua Mutue ua cikungulukilo. (Vilinga 16:4, 5) Mu cifua cimo, Vakaleho va Yehova va mu mavu ose veku uana vukuasi vua ku fuma ku Civunga ca vantuamena ca vakuluntu. Cino Civunga ca Va ntuamena ca Vakaleho va Yehova veku kavangeya vipanga via ku langulula, ku-tuhula, na ku havazela mavulu a kuli longesa nao Mbimbiliya mu malimi aku tuvakana 600. Civunga ca va ntuamena ceku kolesa na kuendesa vikungulukilo vi tuvakana 100.000 mu mavu ose. Mu vi kungulukilo viose muakala va mala va ku hia va vahaka mu ku tuamenena. Ava va mala veku niunga na cilemo vutanga vua Njambi.​—Tandenu 1 Petulu 5:2, 3.

Vakaleho va Yehova va likungulula linga va ambulule muzimbu ua cili na ku puisa vantu vandongesi. Tue kuambuluila vantu ku ndzivo ku ndzivo. (Vilinga 20:20) Tue ku hana vilongesa via Mbimbiliya ku vantu vaze va lema mpundu vusunga. Vunoni Vakaleho va Yehova ka ca puile lika Cikungulukilo. Tua pua vusoko vua kala na cisemi ua cilemo. Tua pua vandolome na va ndokazi ve kuli lela umo na mukuavo. (2 Tesalonika 1:3) Vantu va Yehova va likungulula muku lemesa Njambi na ku kuasa vakuavo, vapua vusoko vua ndzolela ya kama ha mavu hose.​—Tandenu Visamo 33:12; Vilinga 20:35.