Skip to content

Skip to table of contents

 CILONGESA 48

Muana Ntuluue ua Sangukile

Muana Ntuluue ua Sangukile

Mu ntsimbu ya citania, Yehova ua lekele Eliya ngueni: ‘Ya ku Zalefate. Umo ntuluue a ka ku hana via-ku-lia.’ Mua ka hetele ha vimbelo via mbonge, Eliya ua muene ntuluue ua cihutu ali na ku kunga vikuni. Kaha ua mu pingile mema a ku nua. Omo ntuluue ua ile ku ka mu ambatela, Eliya ua mu sanene naua ngueni: ‘Sukulukambu, nji neheleko civalavala ca mbolo.’ Vunoni ntuluue ua handekele ngueni: ‘Ka njesi na mbolo na imo yahi ya ku ku hana. Nji li lika na tuvunga na mazi linga nji linge via-ku-lia viange na muanange.’ Eliya ua mu lekele ngueni: ‘Kati u lisosomue. Yehova na kulahesa ngueni nga u nji lingila mbolo, vunga na mazi ove ka vi ka hua ku vanga ha ku ka nokela niondzi naua.’

Ngeci ntuluue ua ile mu ndzivo ku ka lingila mbolo kapolofeto ua Yehova. Ngue mua kulahesele Yehova, ntuluue na muaneni va kele na via-ku-lia ntsimbu yose noho ha ca huilile citania. Vinjava vieni via vunga na mazi via tualeleleho ku sula.

Vunoni kua solokele luvinda lua kama. Muana ntuluue ua yala ua vavalele, kaha ua tsile. Ngeci ua vundilile Eliya a mu kuase. Eliya ua  mu tambuile muana ha mavoko na ku mu tuala ku hondo ya kuilu. Ua ka mu langekele ha muhela na ku vundila ngueni: ‘Yehova, sukulukambu sangula ou kanike.’ Ua tantekeya omo lia vika eci cuma ce ku lingile Yehova ca puile ca komouesa? Muomu ngue mu tua tantekeya, tunde ku nima na ku heta ku ntsimbu ize ka va sanguile muntu na umo uahi. Cikuavo naua, ntuluue na muaneni ka va puile vaIsaleli.

Vutuhu ngoco, kanike ua sangukile, ua putukile naua ku huima! Eliya ua lekele ntuluue ngueni: ‘Tala! Muanove na sanguka.’ Ntuluue ua vuahelele cikuma ngeci ua lekele Eliya ngueni: ‘Ove mpundu u ngamba ya Njambi. Nja tantekeyamo muomu ue ku handeka lika vize vie ku ku leka Yehova.’

“Singaniekenu makololo, ka ve ku kuva, cipue ku tia; ndzivo ya ku tulikila cipue cisete ka vesi navio, kaha Njambi a li na ku va lisa: seho yenu kati ya hiana cikumakuma tuzila!”—Luka 12:24