Skip to content

Skip to table of contents

 CILONGESA 50

Yehova Ohiela Yehosafate

Yehova Ohiela Yehosafate

Yehosafate muangana ua Yunda, ua nongesele mitula ya Mbale na tumponia via kele mu cifuti. Ua tondele vantu va tantekeye masiko a Yehova. Ngeci ua tumine vamiata na vaLevi ku longesa vantu masiko a Yehova mu Yunda yose.

Vifuti vi va lihatele navio via kele na vuoma vua ku luisa Yunda muomu via tantekeyele ngecize Yehova ua kele na vantu veni. Vintsimbu vimo va kele na ku tualela Muangana Yehosafate vuana. Vunoni vakua Amone na vakua Moave, na vaze va kele ku Seile vezile mu ku luisa Yunda. Yehosafate ua tantekeyele ngecize ua tondekele vukuasi vua Yehova. Ua tumine ku kungulula vamala, vampuevo na vanike vose mu Yelusalema. Kaha ua tsikamene ku lutue lua vose na ku vundila ngueni: ‘Yehova, nga ka tuesi nove, ka tu hasa ku vula. Sukulukambu tu leke vi tua pande ku linga.’

Kaha Yehova ua mu kumbuluile ngueni: ‘Kati mu ivue vuoma. Nji ka mi kuasa. Kalenu ku vihela vienu, manenu mu mone vati nji mi ohiela.’ Vati Yehova ua vovuele?

Lia mukuavo ku cimene, Yehosafate ua hanguile vakua ku imba na ku va leka va caule ku lutue lua civunga ca masualale. Va cauile ku tunda ku Yelusalema na ku lipela lia ku luila ku cihela ci va lukile nguavo Tekoa.

Kaha omo vakua ku imba va kele na ku sangaziala Yehova na ndzolela na lizi lia kama, Yehova ua luililile vantu veni. Ua tanganesele vakua Amone na vakua Moave ngeci va putukile ku litsihanga vakevo vavene, kaha na umo uahi uovokele. Vunoni Yehova uohielele vaYundeya, masualale na vasasendote. Vantu va ku vifuti viose vi va lihatele navio va vuile via lingile Yehova, kaha va tantekeyele ngecize Yehova kasi ua kele na ku ohiela vantu veni. Vati Yehova ue ku ohiela vantu veni? Ue ku vohiela mu vinjila via vingi. Kaha ke ku tondeka vukuasi vua vantu mu ku lingamo.

“Ka mua pandele ku lua ndzita eyi: litumbikienu, manenu ngoco, kaha monenu vuovole vua Yehova hamo nenu.”​—2 Mizimbu 20:17