Skip to content

Skip to table of contents

 CILONGESA 42

Yonatase ua Puile Yala ua ku Simpa na Lukakatela

Yonatase ua Puile Yala ua ku Simpa na Lukakatela

Muana Saulu ua mukuluntu, Yonatase, ua puile lisualale ua ku simpa. Ndaviti ua tumbuile Yonatase ngueni ua puile mukua vuasi ku hiana cihungu kaha ua ngolo ku hiana ndumba. Tangua limo, Yonatase ua muene masualale va vaFilisteo 20 vali ha muncinda. Kaha ua lekele muakuasi ueni ngueni: ‘Tu ka lua navo nga Yehova a tu hana citantekeyeso. Kaha nga vaFilisteo va tu leka tu kanduke, tu ka va luisa.’ VaFilisteo va tambakanene nguavo: ‘Kandukenu tua ku lue!’ Kaha va Yonatase na mukuasi ueni va londele ha muncinda na ku ka va vula.

Mu ku linga Yonatase ikeye muana Saulu ua mukuluntu, tele ikeye ue ku hingile ha vuangana. Vunoni Yonatase ua tantekeyele ngecize Yehova na hangula Ndaviti ku pua muangana ua Isaleli, kaha ka mu vuilile cipululu. Yonatase na Ndaviti va likuatele vusamba vua kama. Va likuminyine ku liniunga umo na mukuavo. Yonatase ua hele Ndaviti  cikovelo ceni, mukuale, vuta vua lungusa na muiva ueni ku pua citantekeyeso ca vusamba vuavo. Nove ua tonda ku kala na kavusamba ua cili ngue Yonatase ni?

Omo Ndaviti ua kele na ku tina Saulu, Yonatase ua ka mu lekele ngueni: ‘Pua ua ku kaniama na ku simpa. Yehova na ku hangula u ka pue muangana. Cipue tata a tantekeya ngoco.’

Vintsimbu via vingi, Yonatase ua hakele muono ueni mu vusonde linga a kuase kavusamba keni. Ua tantekeyele ngecize muangana Saulu ua tondele ku tsiha Ndaviti, ngeci ua ka mu lekele ngueni: ‘Ci ka pua vupi nga u ka tsiha Ndaviti; viahi na lingi via ku pihia. Ikeye ue ku ku kuasa lika.’ Saulu ua nienguele cikuma na Yonatase. Mu nima ya imo miaka, Saulu na Yonatase va ka tsile hamo lika ku ndzita.

Mu nima ya ku tsa ca Yonatase, Ndaviti ua tondele muana Yonatase ua yala Mefimbosete. Ndaviti mua uanene Mefimbosete, ua mu lekele ngueni: ‘Mu ku linga iso ua puile kavusamba kange ua kama, nji ka ku niunga mu muono uove uose. Kaha u ka kala ku nganda yange na ku lia ku mesa yange.’ Eci ca muesa ngecize Ndaviti ka suvile kavusamba keni Yonatase na limo litangua liahi.

“Mu lileme umo na mukuavo, ngue omo nji na mi leme enu. Na umo uahi ali na cilemo ca ku pulakana eci, umo a tulila vavusamba veni muono ueni.”—Yoano 15:12, 13