Skip to content

Skip to table of contents

 CILONGESA 41

Ndaviti na Saulu

Ndaviti na Saulu

Mu nima ya Ndaviti ku tsiha Ngoliata, Muangana Saulu ua mu hanguile ku pua ntuamena ua civunga ca masualale veni. Ndaviti ua vulile vindzita, kaha ua tsimanene cikuma. Nkala ntsimbu ya hilukile ku ndzivo ku tunda ku ndzita, vampuevo va kele na ku mu sesa oku va kina na ku imba nguavo: ‘Saulu na tsihi makulukazi, vunoni Ndaviti na tsihi makumi a makulukazi!’ Ngeci Saulu ua vuilile Ndaviti cipululu kaha ua tondele ku mu tsiha.

Ndaviti ua kele na vutongue mu ku sika halupa. Tangua limo omo Ndaviti ua kele na ku sikila Saulu halupa, Saulu ua mu asele likunga. Ndaviti ua lihengele vuasi, kaha likunga lia ka kovelele mu civumbe. Tunde tangua olio Saulu ua setekele ku tsiha Ndaviti vintsimbu via vingi. Mu nima ya ntsimbu, Ndaviti ua tininine mu musenge.

Kaha Saulu ua kunguluile masualale 3.000 kaha va ile mu ku tonda Ndaviti. Saulu ua kovelele mu mpako ya muncinda ya vandele Ndaviti na masualale veni, vunoni ka va muene.  Ngeci masualale va Ndaviti va mu yevetelele nguavo: ‘Muata, tsiha Saulu ntsimbu u na mu vezika.’ Kaha Ndaviti ua yombele Saulu na ku teta ku cikovelo ceni. Vunoni Saulu ka vuileko. Mu nima yaco, Ndaviti ua vuile ku mutima ku vavala muomu via lingile ka via muesele kasingimiko ku muntu ya hangula Yehova. Kaha ka tavesele masualale veni ku tsiha Saulu. Ndaviti ua tambakanene Saulu na ku mu leka ngueni nga ua mu tsihile mua uanene vukovelelo vua ku lingamo. Vuno Saulu ua likelele ku luisa Ndaviti ni?

Houe. Saulu ua tualeleleho ku tonda Ndaviti linga a mu tsihe. Ndaviti na muihua ueni Avisayi va livembele na ku kovela mu cilombo ca Saulu. Va uanene vose va na kosa, na mukua ku niunga Saulu neni ua kosele. Kaha Avisayi ua yevetelele Ndaviti ngueni: ‘Ntsimbu tu na mu vezika! Me nji mu tsihe.’ Vunoni Ndaviti ua kumbuluile ngueni: ‘Mu ecele, Yehova tangua a ka mu hana kasitiku. Tu ambate lika likunga lieni na njava yeni ya mema.’

Ndaviti ua londele ha muncinda ua kele ku hiehi na cilombo ca Saulu. Kaha ua tambakenene ngueni: ‘Avenele, vika ka ua niungilile muangana uove? Njava na likunga lieni vi li kuiko?’ Saulu ua vuile lizi lia Ndaviti ngeci ua handekele ngueni: ‘Nga u na nji tsihile, vunoni ku ua lingilemo. Nji li na vusunga nguange yove u ka nji suana ha vuangana vua Isaleli.’ Kaha Saulu ua hilukile ku nganda yeni. Vunoni Ndaviti ka va mu zindile ku vose vakua ndzivo ya Saulu.

“Nga ci tava, ngue na cizango cenu cose kalenu na ciyulo na vantu vose. Vakua cilemo cange, kati mu lilinguile enu vavene, ci kale ngano ku vutenu vua Njambi.”—Loma 12:18, 19