Skip to content

Skip to table of contents

 CILONGESA 37

Yehova a Handeka na Samuele

Yehova a Handeka na Samuele

Sasendote ua Kama Eli ua kele na vana vavali va vamala va puile vasasendote ku tavenakulu. Mazina avo Hofeni na Finehase. Ka vononokele masiko a Yehova, kaha va kele na ku linga mua ku pihia vantu veni. Omo vaIsaleli va kele na ku hana vikombelo viavo kuli Yehova, Hofeni na Finehase va puile na ku tambulaho ntsitu ya cili ku pua yavo. Vutuhu Eli ua vuile vi va kele na ku linga vana veni, ka lingileko na cimo cahi. Vuno Yehova ua tavesele evi ku tualelelaho ni?

Vutuhu Samuele ikeye ua puile kanike kuli Hofeni na Finehase ka temunuine vilinga viavo. Yehova ua viukililile cikuma na Samuele. Vutsiki vumo tele Samuele na kosa, Samuele ua vuile lizi li mu sana. Kaha ua hindukile na ku ya kuli Eli na ku handeka ngueni: ‘Yange uno!’ Vunoni Eli ua mu lekele ngueni: ‘Ka nja ku sanene. Hiluka u ka kose.’ Kaha Samuele ua hilukile ha muhela. Vunoni kasi ua vuile lizi li mu sana naua. Kaha omo Samuele ua vuile lizi ntsimbu ya mu citatu, Eli ua muene ngecize Yehova ikeye ua kele na ku sana Samuele. Kaha ua mu lekele ngecize, nga evua lizi li mu sana naua, na pande ku tava ngueni: ‘Yehova handeka. Ngamba yove na ku halakana.’

Kaha Samuele ua hilukile ha muhela. Mu nima ya kantsimbu ua vuile lizi li mu sana: ‘Samuele! Samuele!’ Kaha ngueni: ‘Handeka, ngamba yove na ku halakana.’ Kaha Yehova ua mu lekele ngueni: ‘Leka Eli  nguove nji ka mu hana kasitiku ikeye na vusoko vueni. Muomu na tantekeya ngecize vana veni va li na ku linga viuma via ku pihia mu tavenakulu yange, vunoni kesi na ku lingako na cimo cahi.’ Kaha lia mukuavo ku cimene Samuele ua sokoluele mapito a ku tavenakulu ngue mue ku linga. Vunoni ua kele na vuoma vua ku leka sasendote ua kama via mu lekele Yehova. Ngeci Eli ua mu sanene na ku mu hula ngueni: ‘Muanange, vika Yehova na handeka nove? Nji leke viose.’ Kaha Samuele ua lekele Eli viose via mu lekele Yehova.

Omo Samuele ua kolele, Yehova ua kele neni. Ku tunda cifuti cimo ku ya cifuti cikuavo, vaIsaleli vose va muene ngecize Yehova ua hanguile Samuele ku pua kapolofeto na ngazi.

“Vuluka naua Sakatanga uove ku matangua a vukuendze vuove.”—Ekelesiaste 12:1