Skip to content

Skip to table of contents

 CILONGESA 35

Hana a Vundila Muana

Hana a Vundila Muana

Umo kaIsaleli ua lizina Elekana ua kele na vampuevo vavali, Hana na Penina, vunoni ua lemene cikuma Hana. Penina ua kele na ku pakesa Hana ntsimbu yose muomu ikeye ua kele na vana va vengi, vunoni kavuhale keni Hana ka kele na muana na umo uahi. Muaka ku muaka, Elekana ua kele na ku tuala vusoko vueni ku tavenakulu ya ku Silo mu ku lemesa. Ntsimbu imo mu va ileko ua muene ngecize mpueyeni Hana ua luvalele cikuma omo lia ku hona vana. Ngeci ua handekele ngueni: ‘Sukulukambu kati u lile mpueyange. Uli nange. Kaha nja ku lema.’

Mu nima ya ntsimbu, Hana ua ile kua lika lieni mu ku vundila. Kaha ka likelele ku lila omo ua kele na ku vundila vukuasi kuli Yehova. Ngeci ua kulahesele Yehova ngueni: ‘Yehova, nga u nji hana muana, nji ka mu hana kuli ove, kaha a ka ku pangela muono ueni uose.’

Sasendote ua Kama Eli, ua muene Hana ali na ku zaza kaha ua singaniekele ngueni na penda. Vunoni Hana ua mu lekele ngueni: ‘Houe, kukuange, ka nja pendele. Nji li na visoti via kama, kaha nji li na ku lekako Yehova.’ Eli ua muene ngecize via singaniekelele Hana kati vikevio ngeci ua mu lekele ngueni: ‘Njambi yetu a ku hane vi u na mu vundila.’ Hana ua livuile mua cili kaha ua  ile. Mu ntsimbu ya indende, Hana ua sulumuine muana kaha ua mu lukile Samuele. Mua vusunga Hana ua vuile ndzolela ya kama!

Vutuhu ngoco Hana ka suvile cikulaheso ca lingile kuli Yehova. Mu nima ya ku sumuna Samuele, ua mu tualele a ka pangele ku tavenakulu. Kaha ua lekele Eli ngueni: ‘Ou ikeye uze muana i nja vundilile. Nja mu hana kuli Yehova a mu pangele muono ueni uose.’ Elekana na Hana va kele na ku ya mu ku meneka Samuele muaka ku muaka na ku mu tualela cikovelo ca ciha. Yehova ua hele naua Hana vana vatatu va vamala na vavali va vampuevo.

“Vundilenu, kaha va ka mi hia; lengeyenu, kaha mu ka uana.”—Mateo 7:7