Skip to content

Skip to table of contents

 CILONGESA 13

Yakomba na Esau va Lihamba

Yakomba na Esau va Lihamba

Yehova ua kulahesele Yakomba ngueni a ka mu niunga ngue mua niungile Avilahama na Isake. Yakomba ua ka tungile ku Halane kua ka uanene mpuevo ya ka ambatele, ua ka kele na vusoko vua kama, kaha naua na vupite ua vuingi.

Kaha Yehova ua lekele Yakomba ngueni: ‘Hiluka ku cifuti cove.’ Kaha Yakomba na vusoko vueni va katukile vungendzi vua ku hilukamo. Omo va kele mu vungendzi, kuezile vamo kuli Yakomba na ku mu leka nguavo: ‘Muanoko Esau ali na ku iza hamo lika na vamala 400!’ Yakomba ua kele na vuoma ngueni Esau a ka mu luisa na vusoko vueni. Ngeci ua vundilile Yehova ngueni: ‘Sukulukambu nji ohiele ku livoko lia mukuluntu uange.’ Kaha lia mukuavo Yakomba ua tumine vumo vuana Esau vua vampanga, vampembe, vangombe, tumelu na vimulu.

Ku vutsiki vuaco omo Yakomba ua kele lika lieni ua muene kangelo! Kangelo ua putukile ku lua neni. Va luile vutsiki vuose na ku cimene. Vutuhu Yakomba ua honene, vunoni ka likelele. Kaha kangelo ua handekele ngueni: ‘Nji ecele nji ye.’ Vunoni Yakomba ua handekele ngueni: ‘Houe, ka nji ku eca noho u nji vezikise.’

Kaha kangelo ua vezikisile Yakomba. Amba vuose Yakomba ua tantekeyele ngueni Yehova ka tavesa Esau ku mu vulumuna.

Ku cimene caco, Yakomba ua muene ha laako Esau na vamala va ku pua 400. Yakomba ua tuamene ku lutue lua vusoko  vueni, kaha ua ka tsikamene ku mikono ya muanaye lua ku pua 7. Esau ua tuntile na ku ka vumbatela Yakomba. Va ntsongo na mukuluntu va putukile ku lila, kaha va lihambele. Mu ku mona cove, vati Yehova ua vuile omo ua muene Yakomba na lingi muze?

Mu nima yaco, Esau ua hilukile kuimbo lieni na Yakomba neni. Yakomba ua kele na vana 12. Mazina avo va puile va Luvene, Simeone, Levi, Yunda, Ndane, Nafatali, Ngande, Asele, Isakale, Zembulone, Yosefe, na Mbenjamini. Umo ua vana—va Yosefe, Yehova ua mu pangesele mu ku kohiela vangamba veni. Ua tantekeya vati ua lingile? Tu ci vi tantekeye mu cilongesa ci na hatako.

“Lemenu vitozi vienu, kaha vundilenu ava va li na ku mi yandesa, linga mu pue vana va Isuenu u li muilu.”—Mateo 5:44, 45