Skip to content

Skip to table of contents

 CILONGESA 101

Paulu va mu Tuma ku Loma

Paulu va mu Tuma ku Loma

Vungendzi vua Paulu vua mu citatu vua ku ambulula ceni, vua ka lengelele ku Yelusalema. Kaha va mu kuatele na ku mu soka mu kamenga. Tangua limo ku vutsiki, Yesu ua mu lekele mu cimona ngueni: ‘U ka ya ku Loma na ku ambuluilako.’ Paulu va mu tundisile mu Yelusalema na ku mu tuala ku Sesaliya, kua ka kele miaka ivali. Kaha mu va kele na ku mu sompesa kuli Muangana Festu, Paulu ua handekele ngueni: ‘Nja vundila va ka nji sompese kuli Sezale, ku Loma.’ Ngeci Festu ngueni: “U na lihiti kuli Sezale, kuli Sezale u ka ya.” Kaha va mu tualele mu mbapolo ya ile ku Loma, na vakuavo Vakua Kilistu vavali, Luka na Alistaliku.

Mu va kele mu kalunga kua katukile luhundzi lua kama na mancimba via ambatele matangua a engi. Vose va kele mu mbapolo va singaniekele nguavo va tsa. Vunoni Paulu ua va lekele ngueni: ‘Enu vamala, kangelo na nji lekele mu cilota ngueni: “Kati u ivue vuoma, Paulu. U ka heta ku Loma, kaha vose vali nove mu mbapolo va kovoka.” Simpenu! Ka tu tsi!’

Luhundzi luaco na mancimba lua ambatele matangua 14. Amba vuose, va muene ntunda. Ntunda yaco ya puile lipumbu lia Melita. Kaha mbapolo ya lihituile mu museke ngeci ya tavukile mu vivalavala, vunoni vantu 276 vose va kelemo va ka hetele ku ntunda. Vamo va tanene, vakuavo va likuatelele ku vivalavala via tavukile ku mbapolo na ha ntunda. Vakua Melita va va tambuile na ku va vuekela tuhia linga vote.

Mu nima ya vingonde vitatu, masualale va tualele Paulu ku Loma mu mpapolo. Mua ka hetele, vamuanaye vezile mu ku liuana neni. Mua va muene, Paulu ua santselele Yehova kaha ua simpile. Vutuhu Paulu ua puile lipelesu, va mu tavele ku kala mu ndzivo ya ku fuetela oku va mu niunga kuli umo lisualale. Ua keleko miaka ivali. Vantu vezile mu ku mu mona, kaha ua va ambuluilile via Vuangana vua Njambi na ku va longesa via Yesu. Paulu ua sonekelele naua mikanda ku vikungulukilo via ku Asia Menor na Yundeya. Mua vusunga Yehova ua pangesele Paulu mu ku sanduola muzimbu ua cili ku vifuti.

“Vunoni ku viuma viose tu litumbule ngue vakua ku pangela Njambi, na ku kolesa cikuma, na ku lamba, na ku vuhutu, na ku tuyando.”—2 Kolintu 6:4