Skip to content

Skip to table of contents

 CILONGESA 93

Yesu a Hiluka Muilu

Yesu a Hiluka Muilu

Yesu ua ile na ku liuana na vandongesi veni, mu Ngalileya. Ua va hele lisiko lia seho ya kama ngueni: ‘Yenu na ku puisa vantu va ku vifuti viose vandongesi. Va longesenu viuma vi nja mi longesele enu na ku va mbatiza.’ Kaha ua va kulahesele ngueni: ‘Vulukenu ngecize, nji ka kala nenu ntsimbu yose.’

Mu matangua 40 tunde ha ku sanguka ceni, Yesu ua kele na ku lisolola ku vandongesi veni va vengi mu Ngalileya na mu Yelusalema. Ua va longesele viuma via seho na ku linga vikomoueso via vingi. Mu nima yaco, Yesu ua ka liuanene na vapostolo veni ntsimbu ya ku manusuila ku Muncinda ua Oliveta. Kaha ngueni: ‘Kati mu tunde mu Yelusalema. Tualelelenuho ku vandamena via na mi kulahesa Tata.’

Vapostolo veni ka vevuisisile via va lekele. Ngeci va mu hulile nguavo: ‘U ka pua Muangana ua Isaleli ni?’ Kaha Yesu ngueni: ‘Ntsimbu ya Yehova kanda i ci hete ya ku nji puisa Muangana. Vuovuno mu ka tambula ngolo ku hitila mu sipilitu santu, kaha mu ka pua vakaleho vange. Yenu na ku ambulula ku Yelusalema, Yundeya, Samaliya na ku mitamba yose ya ha mavu.’

Kaha haze vene liselua lia fuikile Yesu na ku mu tuala muilu. Vandongesi va tualeleho ku tala, vunoni ua zimanganene.

Ngeci vandongesi va tundile ku Muncinda ua Oliveta na kuya ku Yelusalema. Va puile na ku likungulula hamo mu hondo ya kuilu na ku vundila. Va lavelele Yesu a va tume vimamuna vikuavo.

“Zimpande ezi vene zia cili zia vuangana va ka zi ambulula ku vifuti viose, zi ka pua vukaleho vua kuli vakua vifuti viose; amba vuose ku-kotoka ca mavu ci keza.”—Mateo 24:14