Skip to content

Skip to table of contents

 CILONGESA 82

Yesu ua Longesele Vandongesi Veni ku Vundila

Yesu ua Longesele Vandongesi Veni ku Vundila

Viose vi va lingile vaFaliseo va vi lingilile ku komouesa vantu. Ambe nga va kuasa muntu, va lingilemo linga va va mone ku vantu. Va kele na ku vundila ku vihela via mbunga linga vose va va mone. VaFaliseo va patekelele vivundilo via laha na ku vi hilukila-hilukila mu visinangonga na ha mankano a vitapalo linga vantu vevueko. Ngeci vantu va komokele omo Yesu ua va lekele ngueni: ‘Kati mu pue na ku vundila ngue vaFaliseo. Ve ku singanieka nguavo nga va handeka via vingi-vingi Njambi a tava vivundilo viavo, vunoni houe.’ Civundilo ca pua ku simutuila ca nkala muntu na Yehova. Kati mu pue na ku hilukila-hilukila viuma vimo lika ntsimbu yose. Yehova a tonda mu mu leke vize mpundu vi mue ku ivua ku mutima.

 ‘Mua pande ku vundila ngecize: “Tatetu u li muilu, va lelese lizina liove. Vuangana vuove vu ize. Cizango cove va ci linge, ngue muilu, ngecize ha mavu.” Yesu ua va lekele naua ngueni citava va vundile via-ku-lia via nkala litangua, va vundile ku vecela ku vipi viavo na vimpande vikuavo via vomine mitima.

Yesu ua handekele naua ngueni: ‘Kati mu likele ku vundila na limo litangua liahi. Tualelenuho ku vundila Isuenu, Yehova, viuma via cili. Cisemi uose ua tonda ku hana viuma via cili ku vana veni. Nga muanove a ku vundila mbolo, u mu hana livue ni? Nga a ku vundila intsi, u mu hana linoka ni?’

Kaha Yesu ua lomboluele vi tu lilongesa ha cimueso eci, ngueni: ‘Nga enu mu tantekeya ku hana vuana vua cili ku vana venu, kaha Isuenu, Yehova, a honoua ku mi hana sipilitu santu yeni ni? Ngeci mukemuo, puenu na ku i vundila.’ Ue ku kava cimamuna ca Yesu ni? Viuma vika ue ku vundila?

“Vundilenu kaha va ka mi hia; lengeyenu, kaha mu ka uana; totenu, kaha va ka mi sokoluela.”​—Mateo 7:7