Skip to content

Skip to table of contents

 CILONGESA 83

Yesu a Lisa Makulukazi a Vantu

Yesu a Lisa Makulukazi a Vantu

Mu ntsimbu ya indende lika tele Pasovala ya muaka ua 32 T.K.N., ili mu hiehi, vapostolo va hilukile ku vungendzi vuavo vua ku ambulula. Va honene cikuma, ngeci Yesu ua ile navo mu vuato ku Mbetesainda kuze ku va tondele ku ka huimina. Vunoni omo vuato tele vu lingila ku heta ku mukulo, Yesu ua muene makulukazi a vantu va va kavele kuze. Vutuhu Yesu ua tondele ku kala lika lieni na vapostolo veni, ua tambuile vantu na cikeketima. Ua kanguisile vavezi vavo na ku putuka ku va longesa. Litangua liose, Yesu ua va longesele via Vuangana vua Njambi. Kaha omo litangua lia tokele, vapostolo veni vezile kuli ikeye na ku handeka neni nguavo: ‘Vantu vali na ndzala. Va tavese vaye va ka tonde via-ku-lia.’

Kaha Yesu ua va lekele ngueni: ‘Ka va pandele kuya. Va hanenu via-ku-via kuno vene.’ Kaha vapostolo va mu hulile nguavo: ‘U tonda tu ka va landele mbolo ni?’ Vunoni Filipu umo ua vapostolo ngueni: ‘Cipue nga tuli na vimbongo via vingi, ka tu hasa ku landela mbolo mbunga yose eyi.’

Yesu ua va hulile ngueni: ‘Via-ku-lia via ku pua kulihi tuli navio?’ Kaha Anduleo ngueni: ‘Tuli lika na vimbolo vitanu na vantsi vavali. Vunoni ka vi pumo.’ Kaha Yesu ngueni: ‘Nehenu kuno oyo mbolo na vantsi.’ Kaha ua lekele vantu ku tumama mu vivunga via vantu 50 na vivunga via vantu va ku pua 100. Ngeci Yesu ua tambuile ize mbolo na vantsi, kaha ua talele muilu na ku vundila. Mu nima yaco ua hele via-ku-lia ku vapostolo veni, kaha va vi tepelele vantu. Vose va ku pua 5.000, vamala, vampuevo na vanike va lile na  ku kuta. Mu nima yaco, vapostolo va kunguilile viose via lisaleleho, linga kati va vi sanduole. Va sulisile vihele 12! Ca puile cikomoueso ca kama ni vati?

Vantu va komokele cikuma via lingile Yesu ngeci va tondele ku mu puisa muangana uavo. Vunoni Yesu ua tantekeyele ngecize ntsimbu ya Yehova ya ku mu puisa muangana ka ya puileho. Ngeci ua tumine vize vivunga via vantu ku hiluka ku membo avo na ku leka vapostolo veni ku ya mu sinia lia cisali ca Ngalileya. Omo va londele mu vuato vuavo, Yesu ua kandukile ku muncinda lika lieni. Omo lia vika? Muomu ua tondele ntsimbu ya ku vundila kuli Ise. Vutuhu ua kele na via vingi cikuma via ku linga, Yesu kasi ua tondele ntsimbu ya ku vundila.

“Kati mu ka pangele via-ku-lia vize vie ku nonga, vunoni via-ku-lia vize vie ku kala-kala ku muono ka ue ku hua ua ya-ye, vikevio Muana muntu a ka mi hiavio.”—Yoano 6:27