Skip to content

Skip to table of contents

 CILONGESA 73

Yoano a Viukisa Njila

Yoano a Viukisa Njila

Yoano, muana Zakaliya na Elizambeta, ua puile kapolofeto mua kolele. Yehova ua pangesele Yoano mu ku longesa vantu ngecize Mesiya ali na ku iza. Vunoni ka ambuluilile mu visinangonga ni mu vimbonge houe, ua ambuluilile mu mpambo. Vantu va tundile ku Yelusalema na mu Yundeya yose mu ku lilongesa kuli Yoano. Ua va longesele ngecize linga vaye Njambi ku mutima, va pandele ku likela vilinga via ku pihia. Mu nima ya ku halakana Yoano, vavengi va liveyele vipi viavo, kaha Yoano ua va mbatizile mu Ndonga ya Yondau.

Yoano ua yoyele muono ua uasi. Ua kele na ku zala vuzalo vua vilambu via tumelu na kulia vambimba na vuci. Vantu va tondele ku tantekeya Yoano. Ambe vaFaliseo na vaSanduseo vakua ku lihaka ku vukama, navo vezile mu ku mu mona. Ngeci Yoano ua handekele ngueni: ‘Mua pande ku alulula vinjila vienu na ku aluluka ku vipi. Kati mu singanieke ngecize mua kala na seho ku hiana vakuenu omo lia ku pua vana va Avilahama. Muomu eci ka ca lombolokele ngecize mu vana va Njambi.’

Vavengi vezile kuli Yoano na ku mu hula nguavo: ‘Vika tua pande ku linga tuye Njambi ku mutima?’ Kaha Yoano ua va kumbuluile ngueni: ‘Uose ali na vikovelo vivali, na pande ku hanako cimo kuli uze kesi naco.’ U tantekeya omo lia vika ua handekele ngoco ni? Ua tondele vandongesi veni va tantekeye ngecize linga vaye Njambi ku mutima va pande ku lema vakuavo.

Yoano ua lekele vakua ku tambula milambu ngueni: ‘Puenu vakua vusunga kati mu pue na ku zangamena vantu.’ Kaha ua lekele masualale ngueni: ‘Kati mu pue na ku tambula ntsambuelo ni ku handeka makuli.’

 Vasasendote na vaLevi navo vezile kuli Yoano na ku mu hula nguavo: ‘Yove iya? Vantu vose va tonda ku ku tantekeya.’ Yoano ua va kumbuluile ngueni: ‘Yange lizi lia mu mpambo, li li na ku tuamenena vantu kuli Yehova, ngue mua ambele kapolofeto Isaya.’

Vantu va lemene via kele na ku va longesa Yoano. Vavengi va kele na ku singanieka nguavo halumo Yoano ikeye Mesiya. Vunoni ua va lekele ngueni: ‘Mukua vukama ali na ku iza. Ambe yange, ka nja fuililile ku zitula mikole ya vinkaku vieni. Ange nje ku mbatiza na mema, vunoni ikeye a ka mi mbatiza na sipilitu santu.’

“Ou uezilile vukaleho ngecize a zimbule vukaleho vua mutana, ngecize vose va tsiliele hali ikeye.”—Yoano 1:7