Skip to content

Skip to table of contents

 CILONGESA 71

Yehova ua Niungile Yesu

Yehova ua Niungile Yesu

Ku cifuti ca kele ku vucelo vua Isaleli, kua kele vantu va tsilielele ngecize vintangantanga vi hasa ku va tuamenena. Tangua limo ku vutsiki, vamo vamala va ku Vucelo va muene cimo ceke ngue ntangantanga ci hita muilu kaha va ci kavele. “Ntangantanga” yaco ya va tuamenenene ku Yelusalema. Vaze vamala va putukile ku hula vantu nguavo: ‘Kulihi ali kanike a ka pua muangana ua vaYundeya? Tu neza mu ku mu tsikamena.’

Omo Helonde, muangana ua Yelusalema ua vuile via muangana ua muha, uomine cikuma mutima. Ngeci ua hulile vasasendote va kama, ngueni: ‘Kulihi a ka semukila muangana uaco?’ Va mu kumbuluile nguavo: ‘Vapolofeto va handekele nguavo a ka semukila mu Mbetelema.’ Ngeci Helonde ua sanene vaze vamala va ku vucelo na ku va leka ngueni: ‘Yenu ku Mbetelema mu ka tonde kanike uaco. Kaha mu ka hiluka mua ku nji leke ku ali. Nange nji tonda ku ka mu tsikamena.’ Vunoni ua handekele makuli.

Kaha “ntangantanga” ya putukile naua kuya. Ngeci vaze vamala va i kavele na ku Mbetelema. “Ntangantanga” ya ka manene helu lia imo ndzivo kaha va kovelele mukati. Va ka uanenemo Yesu na naye, Maliya. Va tsikamene kuli kanike na ku mu hana vuana vua olu, insensu na mirra. Vuno Yehova ikeye ua tumine ava vamala ku tantekeya kua kele Yesu ni? Houe!

Ku vutsiki vuze vene, Yehova ua lekele Yosefe mu cilota ngueni: ‘Helonde a tonda ku tsiha Yesu. Ambata mpueyove na muana mu tinine ku Ingito. U ka kaleko noho ha nji ka ku lekela ngecize vusonde vu nahu, citava mu hilukeko.’ Kaha haze vene, Yosefe na vusoko vueni va ile ku Ingito.

Yehova ua lekele vaze vamala va ku cifuti ca ku Vucelo ngecize ka va pandele ku hiluka kuli Helonde. Kaha omo Helonde ua muene ngecize ka va hilukile kuli ikeye, ua nienguele cikuma. Mu ku linga ka hasele ku uana Yesu, ua tumine ku tsiha vanike vose va vamala va citso ca Yesu mu Mbetelema. Vunoni Yesu va kele na ku mu niunga mua cili ku laako ku Ingito.

 Mu ku hita ca ntsimbu, Helonde ua tsile. Kaha Yehova ua lekele Yosefe ngueni: ‘Vusonde vu nahu citava mu hiluke.’ Ngeci Yosefe, Maliya na Yesu va hilukile ku Isaleli, kaha va tungile limbo liavo mu mbonge ya Nazaleta.

“Ngecize mu li ka pua lizi liange li ku tuhuka ku kanua kange . . . , Kaha li ka vezika ku cize ku nji ka li tuma.”—Isaya 55:11