Skip to content

Skip to table of contents

 CILONGESA 60

Vuangana vu ka Kalako Miaka Yose

Vuangana vu ka Kalako Miaka Yose

Tangua limo ku vutsiki, Muangana Nevukaneza ua kele na cilota ca cikalu. Cilota caco ca mu tangele cikuma, ka hasele ku kosa. Ngeci ua sanene vakua mahesi na ku va leka ngueni: ‘Nji lomboluelenu vi nji na loto.’ Va mu kumbuluile nguavo: ‘Muangana, tu leke vi u na loto.’ Vunoni Nevukaneza ua va lekele ngueni: ‘Houe! Nji lekenu yenu vi nji na loto, nga mu honoua, nji mi tsiha.’ Kaha va mu lekele naua nguavo: ‘Tu leke vi u na loto muangana, linga tu ku lomboluelevio.’ Muangana ua va kumbuluile ngueni: ‘Mu vose mu tonda ku nji onga. Nji lekenu vi nji na loto nguange!’ Va kumbuluile muangana nguavo: ‘Vi u na vundila via vikalu, Muangana. Ka kuesi muntu a hasa ku vi linga.’

Nevukaneza ua nienguele cikuma ngeci ua tumine va tsihe vakua mana vose va kele mu cifuti, hamo lika na Ndaniele, Sandelake, Misake na Avende-nengo. Ngeci Ndaniele ua vundilile muangana a va hane ntsimbu ya ku nongonona cilota. Kaha ikeye na vavusamba veni va vundilile kuli Yehova a va kuase. Vika ua lingile Yehova?

Ku hitila mu cimona, Yehova ua muesele cilota ca Nevukaneza kuli Ndaniele na ku mu leka vika ca lomboloka. Lia mukuavo, Ndaniele ua ile kuli umo mukuamanda ua muangana na ku mu leka ngueni: ‘Kati u tsihe vakua mana. Nji hasa ku lombolola cilota ca muangana.’ Ngeci mukuamanda ua tualele Ndaniele kuli Muangana. Kaha Ndaniele ua mu lekele ngueni: ‘Njambi na ku lekesa via ku lutue. Cilota cove eci: Ua lotele kamponia ua kama, mutue ueni ua olu, ntulo na mavoko eni a palata, lizimo na vintungi vieni via nkengelezi, mikono yeni ya vutale, kaha viliato vieni via vutale vua ku pandakana na vuma. Kaha ku muncinda kua tavukile livue, lia vetele ku viliato via kamponia. Kamponia ua puzukile ngue muzungu na ku pekumuka na luhundzi. Kaha livue liaco lia himpukile muncinda ua kama na ku sulisa mavu ose.’

 Mu nima yaco, Ndaniele ua handekele ngueni: ‘Cilota cove ca lomboloka evi: Vuangana vuove vuemanena mutue ua olu. Kaha vuangana vu ka hatako vua palata. Kaha ku keza vukuavo ngeci mua nkengelezi, vu ka sika mavu ose. Kasi ku ka hata vukuavo vua ku kola ngue vutale. Kaha vuangana vua ku manusuila vu ka hatako, vu ka litepa, imo mitamba i ka kola ngue vutale, ikuavo i ka votsika ngue vuma. Kaha livue lia himpukile muncinda liemanena Vuangana vua Njambi. Vu ka vatuola aa mavuangana ose na ku mana ku miaka yose ya ya-ye.’

Mu nima yaco, Nevukaneza ua ntsikamene ku lutue lua Ndaniele oku na talekesa cihanga ha mavu. Kaha ua handekele ngueni: ‘Njambi yove ikeye na ku lekesa cilota cange. Ka kuesi Njambi ueka ua hiana ikeye.’ Nevukaneza ka tsihile naua Ndaniele, vunoni ua mu puisile ntuamena ua vakua mana vose na ku mu puisa nguvulu ua muhato ua Mbambilone. Ua mono vati Yehova ua kumbuluile civundilo ca Ndaniele ni?

“Kaha va va kungulula ku muhela uze u va tumbula ku Hevelu Alemangendo.”—Ku-Solola 16:16