Skip to content

Skip to table of contents

 CILONGESA 59

Vakuendze Vauana Vononokele Yehova

Vakuendze Vauana Vononokele Yehova

Omo Nevukaneza ua tualele vamiata va Yunda ku Mbambilone, ua tumine muasalale veni va hanguleho vakuendze va ku sungama, kaha va mana ku hiana vakuavo vose. Vakuendze vaco va va hanguilile ku ka va longesa miaka itatu. Vilongesa viaco via pandele ku va kuasa va ka pue vamiata mu Mbambilone. Nevukaneza ua hanguile umo muata ua lizina Asepenaze a va niunge. Vakuendze vaco va pandele ku lilongesa ku tanda, ku soneka na ku handeka limo lilimi lia mu Mbambilone li va lukile nguavo Akande. Kaha va pandele naua ku lia via-ku-lia via kele na ku lia muangana na vaze va mu hatele. Vakuendze vaco va puile Ndaniele, Hananiya, Misaele na Azaliya. Asepenaze ua va lukile mazina eka a mu Mbambilone, Mbeletesazale, Sandelake, Mesake na Avende-nengo. Vuno evi vilongesa via va lingisile ku likela ku pangela Yehova ni?

 Houe. Vaze vakuendze va lihakelele kapandi ka ku ononoka Yehova. Va tantekeyele ngecize ka va pandele ku lia ku via-ku-lia via muangana muomu Lisiko lia Yehova lia muesele ngecize via-ku-lia viaco via puile via ku zuala. Ngeci va lekele Asepenaze nguavo: ‘Sukulukambu kati u tu lise via-ku-lia via muangana.’ Vunoni Asepenaze ua va kumbuluile ngueni: ‘Nga mu viana ku vi lia kaha nga muangana a mona ngecize mu na hokama, a nji tsiha!’

Ngeci Ndaniele ua kuatele mana. Ua lekele mukua ku va niunga ngueni: ‘Sukulukambu pua na ku tu hana lika via-ku-lia via mafo na mema, matangua likumi. Kaha u ka tu setekesa na vakuetu va lia via-ku-lia via muangana.’ Mukua ku va niunga ua tavele.

Mu nima ya ku lingamo matangua likumi, Ndaniele na vavusamba veni vatatu va lelemene na ku kala na cihindu ca cili ku hiana vakuendze vakuavo vose. Yehova ua vuile ndzolela muomu va mu ononokele. Ngeci ua hele Ndaniele mana a ku nongonona vindzozi na vilota.

Mu via huile vilongesa, Asepenaze ua tualele vakuendze vaco kuli muangana Nevukaneza. Kaha ikeye ua handekele navo na ku mona ngecize Ndaniele, Hananiya, Misaele na Azaliya va kele na mana na ku zangama cikuma ku hiana vakuavo vose. Ngeci ua va hanguile va pangele ku nganda yeni, linga a pue na ku va hula via ku linga ku tuala ha vimpande via kama. Yehova ua va hanene mana a ku hiana vakua mana na vakua mahesi vose va kele navo muangana.

Vutuhu va kele mu cifuti ceka, Ndaniele, Hananiya, Misaele na Azaliya ka va suvile ngecize va puile vangamba va Yehova. Nove u ka vuluka Yehova ntsimbu yose, ambe nga visemi vove ka vesi nove ni?

“Na umo uahi a yengule vukuendze vuove; vunoni pua cimueso kuli vaze va tsiliela, mu lizi, mu ku-linga cove, mu cilemo, mu ku tsiliela, mu ku lela.”—1 Timoteo 4:12