Skip to content

Skip to table of contents

 CILONGESA 65

Estele Ovola Vantu Veni

Estele Ovola Vantu Veni

Estele ua puile muana mpuevo ua kaYundeya ua yoyelele ku Susane mbonge ya Pelesia. Mu miaka ya ku nima, vusoko vueni va vu tundisile mu Yelusalema kuli muangana Nevukaneza. Estele va mu lelele kuli mpanjeni Molendekayi, uze ua puile ngamba ya Muangana Ahasuelu ua ku Pelesia.

Mu ku linga Muangana Ahasuelu ua tondele lisano ua muha. Ngeci vangamba veni va mu nehelele vampuevo va ku vuaha cikuma mu cifuti cose hamo lika na Estele. Ha kati ka vose va va mu nehelele, muangana ua hanguile Estele ku pua lisano. Ngeci Molendekayi ua lekele Estele kati a lisolole ngueni ua pua kaYundeya.

Kua kele umo yala ua lizina Hamane ua ku lihalesa cikuma ua puile mukuluntu ua vamiata vose. Ua tondele vantu vose va mu tsikamene nga va mu mona. Vunoni Molendekayi ua vianene, ngeci Hamane ua nienguele cikuma ua tondele ku mu tsiha. Omo Hamane ua tantekeyele ngecize Molendekayi ua puile kaYundeya, ua tumbile ku tsiha vaYundeya vose va kele mu cifuti. Ua ka lekele muangana ngueni: ‘VaYundeya va pua vantu va ku pihia; ua pande ku va manusula.’ Kaha Ahasuelu ngueni: ‘Linga viose vi u tonda,’ kaha ua mu hele mpoko ya ku tumbika lisiko. Hamane ua tumbikile lisiko lia ku tsiha vaYundeya vose mu litangua lia 13 lia ngonde ya Andale. Vunoni Yehova ua muene viose via kele na ku soloka.

Estele ka tantekeyele lisiko liaco. Kaha Molendekayi ua mu tuminelio na ku mu leka ngueni: ‘Ya u ka handeke na muangana.’ Estele ngueni: ‘Uose a ya kuli muangana ca ku hona ku mu lania va mu tsiha. Muangana ka nji laniene mu na hiti matangua 30! Vunoni nji ya. Nga a ka nji inika mbueti, nji ka yoya. Nga kuahi, nji ka tsa.’

Estele ua ile ku nganda ya muangana. Omo muangana ua mu muene, ua mu inikile mbueti yeni. Estele ua ileko, kaha muangana ngueni: ‘Vika u tonda Estele?’ Ua handekele ngueni: ‘Nji tonda ku mi lania na Hamane ku  cilika.’ Ku cilika caco, Estele ua ka va laniene naua ku cilika cikuavo ca mu civali. Ku cilika ca mu civali, muangana ua hulile naua Estele ngueni: ‘Vika nji hasa ku ku lingila?’ Ua handekele ngueni: ‘Kuli umo a tonda ku nji tsiha na vantu vange. Sukulukambu tu ovole.’ Muangana ua hulile ngueni: ‘Iya a tonda ku mi tsiha?’ Ua handeka ngueni: ‘Ou cikenia Hamane.’ Ahasuelu ua nienguele cikuma ngeci ua tumine va tsihe Hamane mu ntsimbu ize vene.

Vunoni na umo uahi ue ku hasele ku tundisako lisiko lia tumbikile Hamane lia ku tsiha vaYundeya, cipue vene muangana. Ngeci muangana ua puisile Molendekayi mukuluntu ua vose kaha ua mu hele mpoko ya ku tumbika lisiko lia liha. Molendekayi ua tumbikile lisiko lia ku tavesa vaYundeya ku liohiela nga va va luisa. Mu litangua lia 13 lia ngonde ya Andale, vaYendeya va luile na vitozi vavo. Ku tundaho, va kele na ku linga cilika ca ku vuluka ku vula cavo muaka ku muaka.

“Va ka mi tuala ku meso a vanguvulu na vamiangana omo yange, ci ka pue vukaleho kuli vakevo na kuli vakua vifuti.”—Mateo 10:18