Skip to content

Skip to table of contents

 CILONGESA 1

Njambi ua Tangele Melu na Mavu

Njambi ua Tangele Melu na Mavu

Yehova Njambi ikeye Sakatanga uetu. Ikeye ua tangele viuma viose, vi tue ku mona na vize ka tu hasa ku mona. Tele kanda a tange viose vi tue ku mona, Yehova ua tangele tungelo va vengi. Ua tantekeya veya va pua tungelo ni? Tungelo va pua vantu va tangele Yehova va ku lifua neni. Ka tu hasa ku va mona, ngue omo ka tu hasa ku mona Njambi. Kangelo ua ku livanga ya tangele Yehova, ua mu puisile mukuasi ueni. Kangelo uaco ua kuasele Yehova ku tanga vintangantanga via kama na via vindende na viuma vikuavo viose. Kaha ua tangele mavu, limbo lietu lia ku vuaha.

Kaha Yehova ua viukisile mavu linga vantu na tusitu va yoyeleho. Ua tangele litangua mu ku tu hana ceke. Ua tangele mincinda, visali na vindonga.

Vika via hateleko? Yehova ua handekele ngueni: ‘Nji ka tuhula muila, viputa na miti.’ Ngeci vusuka vua ku liseza seza, na vintemo via putukile ku kola. Kaha Yehova ua tangele tusitu vose va ku liseza-seza, va ku pulula, va mu mema na va ku kalava. Ua tangele tusitu va vandende ngeci mua tulumba na va kama ngeci mua vanjamba. Kasitu muka ua lema?

Kaha Yehova ua lekele kangelo ua ku livanga ngueni: “Tu tange muntu.” Yehova ua tondele ku tanga vantu mu cifua ca litepa na  tusitu. Ua tondele vantu va hase ku lipangela viuma. Va hase ku handeka, ku zola na ku vundila. Kaha va hase naua ku niunga mavu na tusitu. Ua tantekeya iya ua puile muntu ua katete ni? Tu ci mu tantekeye.

“Ha katete Njambi ua tangele melu na mavu.”—Njenisisi 1:1