Skip to content

Skip to table of contents

 CILONGESA 2

Njambi ua Tangele Yala na Mpuevo va Katete

Njambi ua Tangele Yala na Mpuevo va Katete

Yehova ua tombekele citungu ku cihela ci va lukile nguavo Endene. Citungu caco ca sulile na viputa, miti na tusitu. Kaha Njambi ua tangele yala ua katete Andama, ku mpumputa na ku mu huimina muku mu mazulu. Ua tantekeya via solokele ni? Andama ua himpukile mukua mono! Yehova ua hele Andama cipanga ca ku niunga citungu, kaha ua mu tumine ku luka tusitu vose mazina.

Yehova ua hele Andama lisiko lia seho ya kama. Ua lekele Andama ngueni: ‘Ku miti yose ya vusuka u hasa ku lia ngoco, ku tundisako muti ua ku lifuila. Nga u ka lia ku muti uaco, u ka tsa.

Mu nima ya ntsimbu, Yehova ua handekele ngueni: ‘Nji pangela Andama mukuasi.’ Ngeci ua kosesele Andama mu tulo va kama, kaha Njambi ua tambuile imo mpati ya Andama na ku mu  pangela mpuevo. Lizina lieni Eva. Andama na Eva va puile vusoko vua ku livanga. Vati Andama ua vuile mua muene mpueyeni? Ua vuile ndzolela ya kama na ku handeka ngueni: ‘Naana, Yehova na panga muntu ku mpati yange! Mua vusunga ou mukuetu ua ku lifua nange.’

Yehova ua lekele va Andama na Eva va seme vana na ku sulisa mavu. Ua tondele va kale na ndzolela ya ku pangela hamo na ku puisa mavu ose citungu, ni nguetu ku a viukisa cikuma ngue citungu ca Endene. Vunoni ka via lipuisilemo. Omo lia vika? Tu ka vi tantekeya vuino mu kapitulu ka na hatako.

“Ha katete, ua va tangele yala na mpuevo.”​—Mateo 19:4