Skip to content

Skip to table of contents

 Muzimbu 109

Peter Visits Cornelius

Peter Visits Cornelius

UZE na mana haze ikeye kapostolo Petulu, kaha vaze va li ku nima yeni vakevo va vusamba vueni. Amba co vika ou yala na tsikamena ku meso a Petulu? Na pande ku linga ngecize ni? Ua mu tantekeya ni?

Ou yala ikeye Koloneliu. Kaha ua pua kapitau ua masualale ua ku Loma. Koloneliu ka tantekeya Petulu, vunoni va mu lekele linga a mu lanie ku Ndzivo yeni. Tu ci tantekeye vati viendele.

Vakua ku kava Yesu va ku livanga va puile vaYundeya, vunoni Koloneliu kati kaYundeya. Vutuhu ngoco ikeye ua lema Njambi, ue ku vundila kuli Ikeye kaha ue ku lingila vantu va vengi viuma via cili. Kaha tangua limo ku cinguezi umo kangelo ua mu solokele na ku mu leka ngueni: ‘Njambi na viukilila nove, kaha a ka halakana ku vivundilo viove. Tuma vantu linga va ka ku hiangele umo yala lizina lieni Petulu. Ali ku Yopa ku ndzivo ya Simone, ua tunga ku mukulo ua cisali.’

Haze vene, Koloneliu ua tumine vamo vamala ku ka tonda Petulu. Lia mukuavo, omo vamala va kele ku hiehi na Yopa, Petulu ua kele helu lia ndzivo ya Simone. Kuze, Njambi ua lingisile Petulu ku singanieka ngueni a li na ku mona ntanga ya kama ili na ku suluka muilu. Ha ntanga yaco ha kele tusitu va vifua viose. Kuli ya na lisiko lia Njambi ka ca tavele ku va lia, muomu va puile va ku zuala, vunoni lizi lia handekele ngualio: ‘Petulu, katuka. Tsiha linga u lie.’

Kaha Petulu ua kumbuluileko ngueni: ‘Houe, muomu kanda nji ci lie viuma via ku zuala’. Kaha lizi lia handekele ngualio: ‘Likele ku sana viuma via na lelesa vuovuno Njambi nguove via ku zuala’. Eci cimona ca mu solokelele lutatu. Ntsimbu Petulu a ci komoka vika via lomboloka, vaze vamala va Tumine Koloneliu va hetele ku ndzivo kaha va hulile Petulu.

Kaha Petulu ua sulukile ha ndzivo na ku handeka ngueni: ‘Yange mu li na ku tonda. Vika mu nezila? Omo vaze vamala va lomboluele nguavo kangelo ua solokelele Koloneliu kaha ua mu lekele linga a lanie Petulu ku ndzivo yeni, Petulu ua tavele ku ya navo. Lia mukuavo Petulu na va vusamba vueni va ile mu ku mona Koloneliu ku Sesaliya.

Koloneliu ua kunguluile va vusoko vueni na vavusamba vueni. Mua hetele Petulu, Koloneliu ua mu sesele. Kaha ua uile ku viliato vieni na ku mu tsikamena, ngue mu u na mono aha. Vunoni Petulu ua handekele ngueni: ‘Katuka, nange naua nji muntu’. Eyo, Mbimbiliya ya muesa ngecize ka ca puile ca kuoloka ku tsikama ku viliato via muntu ni ku mu lemesa. Tua pande lika ku lemesa Yehova.

Kaha Petulu ua ambuluile kuli vaze va likunguluile ngueni: ‘Nja mono ngecize Njambi ue ku tava vantu vose vaze va tonda ku mu lemesa’. Ntsimbu a ci handeka, Njambi ua tumine sipilitu santu yeni, kaha vantu va putukile ku handeka malimi a kuli seza-seza. Eci ca komouesele cikuma vandongesi va ku vaYundeya, vaze vezile na Petulu, muomu va singaniekele nguavo Njambi ua tava lika vaYundeya. Ngeci mukemuo eci ca va longesele ngecize Njambi ka halesele ni ku hangula umo muyati ku pua ua seho ku tuvakana ikuavo. Eci ca pua cuma ca cili ci tua pande tu vose ku vuluka, ni vati?

Vilinga 10:1-48; 11:1-18; Ku-solola 19:10.

Study Questions