Skip to content

Skip to table of contents

 Muzimbu 103

Into a Locked Room

Into a Locked Room

OMO Petulu na Yoano va fumine ku cihilo ca Yesu, Maliya ua saleleko lika lieni. Kaha ua putukile ku lila. Ngeci ua kotamene na ku tala mu kati ka cihilo, ngue mu tu na muene ha fikula ili ku nima. Muze ua muenemo tungelo vavali! Va mu hulile nguavo vika u lila?’

Kaha Maliya ngueni: ‘Va na nono muvila ua Muangana uange, kaha ka nji tantekeya kuli va na u hake’. Kaha omo Maliya ua tengulukile ua muene umo Yala. Ua mu hulile ngueni: ‘Iya u tonda?’

Maliya ua singaniekele ngueni uze yala ua pua mukua ku niunga citungu, kaha ngueni halumo ikeye ua ambatele muvila ua Yesu. Ngeci ua handekele ngueni: ‘Nga yove u na mu nono nji leke kuli u na mu hake’. Nkuma uze yala ua puile mpundu Yesu. Na zala muvila uze Maliya ka hasele ku nongonona. Vunoni Yesu ua mu tumbuile ha lizina, ngeci Maliya ua tantekeyele ngueni ikeye Yesu. Kaha ua tuntile ua ka leka vandongesi ngueni: ‘Nji na mono Muangana!’

Kaha mu litangua lize omo vandongesi vakele na ku ya ku limbo lia Emau, kaha umo yala uezile na ku enda hamo navo. Vandongesi va vuile vusiua vua kama muomu Yesu va mu tsihile. Vunoni mu va kele na ku enda, uze yala ua va lomboluele viuma via vingi mu Mbimbiliya vize via va simpisile. Mu ku sulumuina, omo va tulile linga va lie, amba vuose vandongesi va hasele ku nongonona nguavo nkuma Yesu. Kaha Yesu ua zimanganene, kaha vaze vandongesi va hilukile lintunda na ku Yelusalema linga va ka leke vapostolo.

Yesu ua lisoluele naua kuli Petulu. Vakuavo va viukilile omo va vi vuile. Kaha vaze vandongesi vavali va hetele ku Yelusalema na ku ka liuana na vapostolo. Va va lekele vati Yesu ua va solokelele mu tapalo. Kaha tele va ci va leka, ua tantekeya vika via solokele, ni?

Tala ha fikula. Yesu ua solokele muze vene mu hondo, vutuhu ya puile ya ku pata. Vandongesi va viukilile cikuma! Lia puile litangua lia Ndzolela! U hasa ku tanda lungahi Yesu ua lisoluele kuli vakua ku mu kava, ni? Lutanu ni vati?

Kapostolo Tomasi ka keleho, omo Yesu ua va solokelele. Ngeci vandongesi va mu lekele nguavo: ‘Tu na mono Muangana!’ Vunoni Tomasi ua handekele ngueni ku vanga a limuene Yesu na meso amba a tave. Kaha mu nima ya matangua atanu na atatu, vandongesi va likunguluile naua mu hondo ya ku pata, hano honi na Tomasi mua kele. Haze vene Yesu ua solokele naua muze mu hondo. Amba vuose Tomasi ua tavele.

Yoano 20:11-29; Luka 24:13-43.

Study Questions