Skip to content

Skip to table of contents

 Muzimbu 106

Set Free From Prison

Set Free From Prison

TALA ou kangelo na kuata ku lipito lia ku sokolola lia ku kamenga. Ava vantu va a li na ku patula vakevo vapostolo va Yesu. Tu ci tantekeye omo lia vika va va sokelele mu kamenga.

Mua hiti lika matangua a andende fume ha ya muanienene sipilitu santu ha vandongesi va Yesu. Kaha viendele ngecize: Tangua limo ku mutana, Petulu na Yoano va kele na ya ku tembele ku Yelusalema. Ku hiehi na mbelo kua kele umo yala ua cilema fume mu zimo lia naye. Vantu ve ku mu neha kuno matangua ose linga a ku vundile zimbongo kuli vaze ve kuiza ku tembele. Omo ua muene Petulu na Yoano, ua va vundilile va mu hieko viose-ovio vi va kele navio. Vati va lingile?

Va manene na ku tala kuli uze cihutu. Kaha Petulu ua mu lekele ngueni: ‘Ka njesi na zimbongo, vunoni, nji ku hia vi nji li navio. Mu lizina lia Yesu, katuka linga uende!’ Kaha Petulu ua mu kuatele ku livoko lia cilio, kaha haze vene ua tumbukile na ku putuka kuenda. Omo vantu va muene evi, va komokele na ku viukilila omo lia cize cikomoueso.

Kaha Petulu ua handekele ngueni: ‘Eci cikomoueso tu na ci lingi na ngolo ya Njambi, uze ua sanguile Yesu ku vatsi’. Ntsimbu ikeye na Yoano va kele na ku handeka, kuezile vamo vakuluntu va malombelo. Kaha va tenukile cikuma, muomu Petulu na Yoano va kele na ku leka vantu nguavo, Yesu na sanguka ku vatsi. Ngeci va va kuatele na ku va soka mu kamenga.

Lia mukuavo vakuluntu va malombelo va likunguluile. Kaha va nehele Petulu na Yoano hamo na uze yala u va kanguisile. Ngeci vakuluntu va malombelo va va hulile nguavo: ‘Na ngolo yeya mua lingile cize cikomoueso?’

Kaha Petulu ua kumbuluileko ngueni na ngolo ya Njambi, uze ua sanguile Yesu ku vatsi. Vasasendote ka va tantekeyele vati va linga, muomu ka ca tavele va viane cize cikomoueso ca kama. Ngeci va sanene vapostolo na ku va vindika ku ambulula vimpande via Yesu, kaha va vecele.

Mu matangua a hateleko vapostolo va tualeleho kuambula vimpande via Yesu na ku kanguisa vavezi. Kaha ize mizimbu ya sanduokele muaya vantu. Ngeci mukemuo vivunga via vantu va mu vimbonge via zengeleka Yelusalema, va nehele vavezi vavo, linga va va kanguise kuli vapostolo. Evi via lingisile vakuluntu va malombelo ku ivua cipululu, ngeci va kuatele vapostolo na ku va soka mu kamenga. Vunoni ka va kelemo ntunda ya kama.

Ku vutsiki, kangelo ua Njambi ua sokoluele lipito lia ku kamenga, ngue mu u na mono aha. Kaha kangelo ua handekele ngueni: ‘Hamenu ku tembele kaha tualelenuho ku ambulula ku vantu’. Lia mukuavo ku cimene, omo vakuluntu va malombelo va tumine vantu linga va ka hiange vapostolo mu kamenga, va uanene kamenga ka mupulungua. Mu nima ya ntsimbu, va va uanene va li na na ku ambulula mu tembele, ngeci va va tualele ku Mpunga.

Vakuluntu va malombelo, va handekele nguavo: ‘Tua mi vindikile ha toma nguetu kati mu ambulule naua vimpande via Yesu. Vunoni enu mu na sulisa Yelusalema na vilongesa vienu.’ Kaha vapostolo va kumbuluile nguavo: ‘Tua pande ku ononoka kuli Njambi mu ku pua muangana ku hiana ku ku ononoka ku vantu’. Ngeci va tualeleho vene kuambulula “muzimbu ua cili”. Olu lukeluo lungano lua cili lu tua pande ku kava, ni vati?

Vilinga kapitulu 3 ku tuala 5.

Study Questions