Skip to content

Skip to table of contents

 Muzimbu 97

Jesus Comes as King

Jesus Comes as King

MU NIMA ya ntsimbu ya indende, fume ha kanguisilile vaze tupuputa vakua ku vundila vukuasi, Yesu ua ile ku limbo lia kele ku hiehi na Yelusalema. Kaha ua tumine vamo vandongesi veni ngueni: ‘Kovelenu muimbo kaha mu ka uana muana cimulu. Mu vutulenu mu mu nehe kuno.’

Kaha omo va mu nehelele cimulu ua londeleho. Kaha ua ile ku Yelusalema, ya kele ha hiehi. Kaha omo ua ka hetele ku hiehi na mbonge civunga ca kama cezile mu ku liuana neni. Kaha cingi cavo va suluile vikovelo na ku vi ala mu tapalo. Ava co va pokuele mintango ya miti na ku ala mu tapalo kaha va putukile ku tambeka nguavo: ‘Njambi a vezikise muangana eza mu lizina lia Yehova!’

Ku laza mu Isaleli, muangana ua muha ua kele na ku kovela mu Yelusalema oku na tumama ha muana cimulu linga a lisolole ku vantu. Evi vikevio via lingile Yesu. Ava vantu va muesele ngecize va tonda Yesu a pue muangana uavo. Vunoni kati vantu vose va tondele ngoco. Tu ka tantekeya omo lia vika, mu viuma vika soloka omo Yesu a ka heta ku tembele.

Ku tembele Yesu ua kanguisile tupuputa na vakua ku vendukuta. Kaha omo vanike va vi muene va putukile ku imbila Yesu. Vunoni evi via nienguesele cikuma vasasendote kaha va lekele Yesu nguavo: ‘U nevu vi va li na ku handeka ava vanike ni?’

Yesu ua va kuaniene ngueni: ‘Nji nevuko. Ka mua tandele mu Mbimbiliya ha va soneka nguavo: “Ku tunua tua vanike na tukeke, Njambi a ka tuhulako ku zumbangeya?”’ Kaha vanike va tualeleleho ku zumbangeya muangana ua hanguile Njambi.

Netu tu yongola ku pua ngeci mua vaze vanike, ni vati? Vantu vamo va hasa ku tu vindika ku handeka via vuangana vua Njambi. Vunoni tu ka tualelelaho ku leka vakuetu via viuma via cili via ka pangela Yesu vantu vose.

Ize ntsimbu ya kele Yesu ha mavu, kati ikeyo ya putukile ku sika ha vuangana. Vuno tangua lika ika heta ntsimbu yaco? Vandongesi va Yesu va tondele ku i tantekeya. Tu ka lilongesavio mu cilongesa ci na hatako.

Mateo 21:1-17; Yoano 12:12-16.

Study Questions