Skip to content

Skip to table of contents

 Muzimbu 101

Jesus Is Killed

Jesus Is Killed

ACI tale cuma ca ku pihia ci li na ku lingika aha! Yesu va li na ku tsiha. Va na mu sukika ha citi. Va na mu pangeya vimbambo mu mavoko na mu viliato. Vika va na lingila ovu vupi vua cifua eci kuli Yesu?

Muomu vamo vantu va zinda Yesu. Ua tantekeya veya? Umo uavo uze kangelo ua mupi Satana Ndiavu. Ikeye uze ua lingisile va Andama na Eva linga va viane ku ononoka kuli Yehova. Satana ikeye ua lingisile vitozi va Yesu ku panga vupi vua ku pihia ngecize.

Tele ntsimbu kanda va pangeye Yesu ha muti, vitozi vieni va lingile viuma via vipi kuli ikeye. Ua vuluka vati va ile ku citungu ca Ngetesemane amba va ka mu kuate? Veya va puile vaze vitozi? Vaze vakuluntu va vulombelo. Tu ci mone vika via hateleko.

Yesu mu va mu kuatele ku vakuluntu va vulombelo, vapostolo veni va tinine. Va sile Yesu lika lieni ku vitozi, muomu va kele na vuoma. Vunoni kapostolo Petulu na Yoano ka va ile ku laako. Va kavangeyeleko linga va ka mone vati vaze vitozi va ka linga Yesu.

Vasasendote va tualele Yesu kuli mukuluntu Anase, uze ua puile sasendote ua kama. Civunga ka va kele kuze ntunda ya kama. Va tualele Yesu ku ndzivo ya Kayafase, uze ua puile sasendote ua kama ku ntsimbu ize. Vakuluntu va malombelo va ka likunguluile ku ndzivo yeni.

Kuze ku ndzivo ya Kayafase, va mu sompesele. Kaha va nehele vantu linga va ku vangeye Yesu. Kaha vakuluntu va vulombelo vose va handekele nguavo: ‘Yesu na pande ku tsa’. Kaha va mu tinguile vipakela.

Mu via kele na ku lingika viose evi, Petulu tele a li ku mbandza mu citali. Vutsiki vuaco kua kele lisika lia kama ngeci vantu va vuekele tuhia. Mu va kele na kuota tuhia, umo muana mpuevo ua talele Petulu kaha ua handekele ngueni: ‘Ou yala neni ua kele na Yesu.’

Kaha Petulu ngueni: ‘Houe ka nja kele neni’!

Vantu venikile Petulu lutatu nguavo ua kele na kuenda na Yesu. Vunoni Petulu ua vianene. Kaha omo Petulu ua vianene lua mu citatu, Yesu ua tengulukile ua mu tala. Kaha Petulu ua liveyele omo lia visaki via handekele kaha ua ile mu ku lila.

Kaha omo litangua Lia Citanu lia kele na ku ca, vasasendote va tualele Yesu ku cihela ca kama ci va kele na ku likunguluila, ku Mpunga. Kaha kuze kukekuo ku va ka liyonguelele vati va mu linga. Va mu tualele kuli Pontiu Pilato muangana ua muhato ua Yundeya.

Kaha vasasendote va lekele Pilato nguavo: ‘Ou yala ua pua muntu ua ku pihia cikuma. Na pande ku tsa’. Kaha mu nima ya ku hula vihula via vingi kuli Yesu, Pilato ua handekele ngueni: ‘Yange ka nja uanene na umo mulonga muli uno yala.’ Kaha Pilato ua mu tumine kuli Helonde Antipa. Helonde ua puile muangana ua Ngalileya vunoni ua kele mu Yelusalema. Helonde neni ka uanene mulonga muli Yesu ngeci ua mu hiluisile kuli Pilato.

Pilato ua tondele ku ecela Yesu. Vunoni vitozi vieni va tondele ku patula muntu ueka mu cihela ca Yesu. Yala uaco u va tondele ku patula ua puile muizi, lizina lieni Mbalambasa. Vuovuno mu kati ka mutana Pilato ua tuhuile Yesu ku mbandza. Kaha ua lekele vantu ngueni: ‘Talenu! Muangana uenu!’ Vunoni vasasendote va kama va tambekele nguavo: ‘Mu tualenu! Mu tsihenu! Mu tsihenu!’ Kaha Pilato ua tuhuile Mbalambasa linga aye, vunoni va ambatele Yesu linga va ka mu tsihe.

Kaha ku mutana ua cinguezi ua Lia Citanu, Yesu va mu pangeyele ha muti. Kua kele vamo mihuza va va pangeyele hamo na Yesu umo ku cilio mukuavo ku cimosue, vunoni ka u hasa ku va mona aha ha fikula. Kaha tele kanda Yesu aci tse, umo ua mihuza ua mu lekele ngueni: ‘U ka nji vulukako mu u ka kovela mu vuangana vuove.’ Kaha Yesu ua mu kumbuluile ngueni: ‘Mua vusunga nji ku ku leka nguange, u ka kala nange mu Palandaizi.’

Ca puile cikulaheso ca cili, ni vati? U tantekeya palandaizi ya tumbuile Yesu ni? Kuli ya kele ize palandaizi ya pangele Njambi ha katete? Eyo, Ha mavu. Kaha omo Yesu a ka pua muangana muilu, a ka sangula uze yala linga a ka yoye mua cili mu Palandaizi ya iha ha mavu. Tua pande ku viukilila omo lievi, ni vati?

Mateo 26:57-75; 27:1-50; Luka 22:54-71; 23:1-49; Yoano 18:12-40; 19:1-30.

Study Questions