Skip to content

Skip to table of contents

 Muzimbu 82

Mordecai and Esther

Mordecai and Esther

TU CI hiluke tahi imo miaka ku nima, tele Ezela kanda a ci ye ku Yelusalema. Molendekayi na Estele va va puisile vaIsaleli va seho ya kama mu vuangana vua Pelesia. Estele ua puile lisano kaha mpanjeni Molendekayi ua puile muhato ua muangana. Tu ci mone vati via putukile.

Visemi va Estele va tsile tele a ci li kanike ua mundende kaha Molendekayi ikeye ua mulelele. Ahasuelu muangana ua Pelesia ua kele na nganda mu mbonge ya Susane kaha Molendekayi ua puile umo ua vangamba veni. Kaha tangua limo, mpueyeni Vasiti ka muononokele, ngeci ua hanguile mpuevo ueka linga a pue lisano. Ua tantekeya mpuevo muka ua hanguile? Umo muana mpuevo ua cili, lizina lieni Estele.

Ua mono ou yala ua ku lihalesa u va na tsikamena ava vantu vali aha, ni? Ikeye Hamane. Ua pua mukuluntu ua kama mu Pelesia. Hamane ua tondele ngueni Molendekayi ou na tumama aha, a mu tsikamene. Vunoni Molendekayi ka tavele ku tsikama. Na singanieka ngueni kati ca cili ku tsikamena yala ua vupi ngecize. Ngeci Hamane ua nienguele cikuma. Kaha evi vikevio via lingile.

Hamane uendele vungungu vaIsaleli kuli muangana ngueni: ‘VaIsaleli va pua vantu va ku pihia ka ve ku-ononoka ku masiko ove. Va na pande ku tsa’. Vunoni Ahasuelu ka tantekeyele ngueni mpueyeni Estele ua puile kaIsaleli. Ngeci ua halakanene kuli Hamane na ku tumbika lisiko lia ku tsiha vaIsaleli vose.

Kaha omo Molendekayi ua tantekeyele vutumbe vuaco ua vuile vusiua vua kama. Ua tumine muzimbu kuli Estele ngueni: ‘Una pande ku leka muangana, na ku mu lambelela linga a tu ohiele. Mu cifuti ca Pelesia, ca pua ku tsiha lisiko ku ya kuli muangana nga ka va ku laniene. Vunoni Estele ua ileko vutuhu ka va mu laniene. Kaha muangana ua mu inikile na mulamu ueni ua olu, ku muesa ngecize ka va ka mu tsiha. Estele ua laniene muangana na Hamane ku ciuano ca kama. Kuze, muangana ua hulile Estele a handeke viose via tonda. Kaha Estele ua handekele ngueni a ka mu leka lika lia mukuavo, mua keza hamo na Hamane ku ciuano ceka.

Ku ciuano cize Estele ua lekele muangana ngueni: ‘Nange na vantu va muyati uetu va tonda ku tu tsiha’. Ngeci muangana ua nienguele cikuma. Kaha ua hulile ngueni: ‘Iya ouo a tonda ku linga ovio?’

Kaha Estele ngueni: ‘Ou yala, ua ku pihia citozi Hamane!’

Muangana ua nienguele cikuma-kuma. Ngeci na tumine ngueni va tsihe Hamane.

Fume haze, muangana ua hangula Molendekayi ku pua muntu ua mu civali mu vuangana vueni. Kaha Molendekayi ua tumbika lisiko lia liha lize lia tavesele vaIsaleli ku luila miono yavo mu litangua li va tondele ku va tsiha. Omo Molendekayi ua puile muntu ua seho ya kama ngeci vantu va vengi va kuasele vaIsaleli, ngeci va lio vuele ku vitozi viavo.

Livulu lia Estele mu Mbimbiliya.

Study Questions