Skip to content

Skip to table of contents

 MUZIMBU 59

Why David Must Run Away

Why David Must Run Away

MU NIMA ya Ndaviti ku tsiha Ngoliata, Avenele mukuluntu ua masualale vaIsaleli ua tualele Ndaviti kuli Saulu. Saulu na viukilila cikuma na Ndaviti. Ua mu puisile mukuluntu ua masualale veni kaha ua mu tuala ku ndzivo yeni ya vuangana.

Kaha omo masualale va na hiluka ku ndzita na vaFilisteo, vampuevo va na putuka kuimba nguavo: ‘Saulu na tsihi makulukazi, vunoni Ndaviti na tsihi makumi a makulukazi’. Evi vi na lingisa Saulu ku-ivua cipululu, muomu vantu va li na ku sangala cikuma Ndaviti ku tuvakana ikeye. Vunoni Yonatase, muana Saulu ka kele na cipululu. Ikeye ua lemene cikuma Ndaviti kaha na Ndaviti ua mu lemene cikuma. Ngeci vose vavali va pangele litavasiano nguavo vusamba vuavo ka vu ka hua.

Ndaviti ua kele na vutongue vua ku sika halupa, Saulu ua lemene cikuma miaso yaco. Vunoni tangua limo, cipululu ca Saulu ca mu lingisile ku panga vupi vua kama. Ntsimbu Ndaviti ua kele na kuimba, Saulu ua nonene likunga lieni na ku handeka ngueni: ‘Lelo nji pangeya Ndaviti ha civumbe na likunga!’ Vunoni Ndaviti ua lihengele, kaha likunga ku lia mu kuatele. Kaha ntsimbu ikuavo Saulu ua hona naua ku tsiha Ndaviti na likunga. Ngeci Ndaviti ua tantekeyele ngueni na pande ku zangama.

 Ua vuluka litavasiano lia pangele Saulu, ni? Ua handekele ngueni uose uze a ka tsiha Ngoliata a ka ambata muaneni ku pua mpueyeni. Kaha Saulu ua tava ku hana muaneni Mikale kuli Ndaviti, vunoni ngueni ku vanga a ci ka tsihe vaFilisteo va ku pua 100 amba vuose a ku mu hiaye. Aci singaniekeho! Saulu ua kulahelele ngueni Ndaviti va ka mu tsiha kuli vaFilisteo. Vunoni kava ka hasele ku mu tsiha, ngeci Saulu ua mu hele Mikale ku pua mpuevo yeni.

Tangua limo, Saulu ua lekele Yonatase na vangamba veni ngueni a tonda ku tsiha Ndaviti. Vunoni Yonatase ua leka ise ngueni: ‘Kati u vulumune Ndaviti. Na vumo vupi vua na lingi vuahi. Viose via na panga via seho via ku kuasa yove. Na hakele muono ueni mu vusonde linga a tsihe Ngoliata kaha mua ka mu tsihile nove ua viukilile mua kama.’

Saulu ua halakanene kuli muaneni, na ku likuminia ngueni ka li ka tsiha Ndaviti. Kaha Ndaviti ua hilukile naua mu kua ku panga ku ndzivo ya Saulu ngue muze mua laza. Vunoni tangua limo naua, omo Ndaviti ua kele na kuimba miaso, Saulu ua mu asele naua likunga. Kaha Ndaviti ua lihengele ngeci likunga lia ka tuvile ha civumbe. Olu lua puile lua mu citatu! Ndaviti ua muene ngueni nkuma na pande ku tina!

Ku vutsiki vuze vene, Ndaviti ua vombolokele ua ya ku ndzivo yeni. Vunoni Saulu ua tumine vamo vamala vamo linga va ka mu tsihe. Vunoni Mikale ua tantekeyele via tondele ku linga ise. Ngeci ua lekele yalieni ngueni: ‘Mene va ka ku tsiha, u na pande ku tina vutsiki vuno vene’. Kaha vutsiki vuze Mikale ua kuasele Ndaviti ku sevunuka ua tuhukila ha njanena. Mu miaka itanu na ivali, Ndaviti ua vandele ku vihela via kuli seza-seza linga Saulu kati a mu uane.

1 Samuele 18:1-30; 19:1-18.

Study Questions